[1] ᐁᑲᐧ ᒫᑲ ᑭ ᐊᑎ ᐃᐢᐸᔨᐤ, ᒣᑳᐧᐨ ᑳ ᐅᓴᒣᔭᑎᔨᐟ ᐊᔨᓯᔨᓂᐊᐧ ᐁ ᓯᑎᐢᑳᑯᐟ ᑭᑕ ᐯᑕᒥᔨᐟ ᐅᐟ ᐊᔭᒥᐃᐧᓂᔨᐤ ᑭᓭᒪᓂᑐᐊᐧ, ᒋᑭᐯᐠ ᓵᑲᐦᐃᑲᓂᕽ ᑭᓀᓴᕒᐃᐟ ᑭ ᓂᐸᐃᐧᐤ;
[2] ᐁᑯᓯ ᑭ ᐋᐧᐸᐦᑕᑦ ᓂᓱ ᒋᒫᓇ ᓵᑲᐦᐃᑲᓂᕽ ᐁ ᐊᔮᔨᑭ; ᒫᑲ ᐃᐧᔭ ᐅᐸᑭᑕᐋᐧᐊᐧ ᐁ ᑭ ᑲᐹᔨᐟ, ᐁᑯᓯ ᐁ ᑭᓯᐯᑭᓈᔨᐟ ᐅᐟ ᐊᔭᐱᔨᐊᐧ.
[3] ᐁᑯᓯ ᑭ ᐳᓯᐤ ᐯᔭᐠ ᒋᒫᓂᕽ, ᓴᐃᒪᐣ ᐁ ᐅ ᒋᒫᓂᐟ, ᒥᓇ ᐁ ᑭ ᑲᑫᐧᒋᒫᐟ ᓇᐊᐧᐨ ᑖᐃᐧᐨ ᑭᑕ ᐊᑯᑎᑕᔨᐟ. ᐁᑯᓯ ᑭ ᓇᐦᐊᐱᐤ ᐁ ᑭ ᑭᐢᑭᓄᐦᐊᒪᐋᐧᐟ ᑳ ᐅᓴᒣᔭᑎᔨᐟ ᐊᔨᓯᔨᓂᐊᐧ ᒋᒫᓂᕽ ᐅᐦᒋ.
[4] ᐁᑯᓯ ᐃᐢᐱ ᐁ ᑭ ᐳᓂ ᐱᑭᐢᑫᐧᐟ, ᑭ ᐃᑌᐤ ᓴᐃᒪᓇ, ᑎᒥᕽ ᐃᓯ ᓂᒥᑖᐊᐧᐊ, ᒥᓇ ᐸᑲᐢᑕᐁᐧᐅᑯᐠ ᑭᐟ ᐊᔭᐱᐋᐧᐊᐧᐠ ᑭᑕ ᓄᒋ ᑭᓄᓭᐁᐧᔦᐠ.
[5] ᓭᐃᒧᐣ ᐁ ᓇᐢᑫᐧᐊᐧᓯᒥᑯᐟ ᑭ ᐃᑎᐠ, ᑫᐢᑭᓄᐦᐊᒫᑫᔭᐣ, ᑲᐯ ᑎᐱᐢᐠ ᓂ ᑭ ᐊᑐᐢᑳᓈᐣ, ᐁᑯᓯ ᓇᒪ ᑫᑲᐧᐩ ᓂ ᑭ ᐅᑎᓀᓇᐣ; ᐁᔨᐁᐧᕽ ᒫᑲ ᒋᑫᒫ ᐁ ᐃᑌᐧᔭᐣ ᓂ ᑲ ᐸᑲᐢᑕᐁᐧᐋᐧᐊᐧᐠ ᐊᔭᐱᔭᐠ.
[6] ᐃᐢᐱ ᒫᑲ ᐅᒪ ᑳ ᐃᑐᑕᐦᑭᐠ, ᒥᓴᑲᒥᐠ ᑭᓄᓭᐊᐧ ᑭ ᐅᑕᐋᐧᔨᐊᐧ; ᐅᐟ ᐊᔭᐱᐋᐧᐊᐧ ᒫᑲ ᑭ ᐃᐧ ᐱᑯᐸᔨᔨᐊᐧ;
[7] ᐁᑯᓯ ᑭ ᐋᐧᐢᑎᓇᒪᐁᐧᐊᐧᐠ ᐅ ᐃᐧᒉᐋᐧᑲᓂᐋᐧᐊᐧ ᑯᑕᑲ ᒋᒫᓂᕽ ᑳ ᐊᔮᔨᐟ, ᑭᑕ ᐯ ᐃᐧᒋᐃᑯᒋᐠ. ᐁᑯᓯ ᑭ ᐯ ᐃᑐᐦᑌᔨᐊᐧ ᒥᓇ ᐁ ᑭ ᒧᐢᑭᓇᑖᒋᐠ ᐁᓯ ᓂᓯᓂᔨᑭ ᒋᒫᓇ, ᐱᔨᐢ ᐁ ᐃᐧ ᐊᑎ ᑯᓴᐯᑭ.
[8] ᓴᐃᒪᐣ ᐱᑕᕒ ᒫᑲ, ᐃᐢᐱ ᐃᐧᔮᐸᐦᑕᕽ, ᑭ ᐅᒋᐦᒋᐦᑲᐧᓇᐱᐢᑕᐁᐧᐤ ᒋᓴᓴ, ᐁ ᐃᑌᐧᐟ, ᓇᑲᓯᐣ; ᒋᑫᒫ ᓂ ᒪᒑᑎᓯᐣ, ᐅ ᑳ ᑎᐯᔨᐦᒋᑫᔭᐣ.
[9] ᐃᐧᔭ ᓈᐢᐱᐨ ᐁ ᑭ ᒫᒪᐢᑲᑕᕽ, ᐊᓯᒋ ᑲᐦᑭᔭᐤ ᑳ ᐃᐧᒉᐃᐧᑯᐟ, ᐃᔨᑯᕽ ᒥᓴᑲᒥᐠ ᐁ ᑭ ᐅᑕᐋᐧᔨᐟ ᑭᓄᓭᐊᐧ;
[10] ᐁᑯᓯ ᐃᐧᐢᑕᐋᐧᐤ ᒉᒥᐢ ᒥᓇ ᒑᐣ, ᐅᑯᓯᓴ ᓭᐱᑎ ᑳ ᑭ ᐅᐃᐧᒉᐋᐧᑲᓂᒋᐠ ᓴᐃᒪᓇ. ᒋᓴᐢ ᒫᑲ ᐅᒥᓯ ᑭ ᐃᑌᐤ ᓴᐃᒪᓇ, ᐁᑳᐃᐧᔭ ᓭᑭᓯ; ᐊᓄᐦᐨ ᐅᐦᒋ ᑭ ᑲ ᑳᒋᒋ ᐊᐊᐧᐠ ᐊᔨᓯᔨᓂᐊᐧᐠ.
[11] ᐃᐢᐱ ᒫᑲ ᑳ ᓈᑕᑲᒣᐅᑖᒋᐠ ᐅ ᒋᒫᓂᐋᐧᐊᐧ, ᑲᐦᑭᔭᐤ ᑫᑲᐧᐩ ᑭ ᓇᑲᑕᒪᐧᐠ; ᐁᑯᓯ ᐁ ᑭ ᐱᒥᑎᓴᐋᐧᒋᐠ.
[12] ᐁᑯᓯ ᑭ ᐊᔨᑭᐣ, ᒣᑳᐧᐨ ᐁ ᐊᔮᐟ ᐯᔭᐠ ᐅᑌᓈᕽ, ᒋᐢᐟ, ᐯᔭᐠ ᐊᔨᓯᔨᓂᐤ ᐁ ᓵᑲᐢᑭᓀᐢᑳᑯᐟ ᒪᒑᐢᐱᓀᐃᐧᐣ: ᐃᐢᐱ ᐁ ᐋᐧᐸᒫᐟ ᒋᓴᓴ, ᐅᑳᐧᑲᓂᕽ ᑭ ᐃᓯ ᐸᐦᑭᓯᐣ ᐊᐢᑭᕽ, ᒥᓇ ᐁ ᑭ ᑳᑭᓯᒧᑐᑕᐋᐧᐟ, ᐁ ᐃᑌᐧᐟ ᑌᐯᔨᐦᒋᑫᔭᐣ, ᑭᐢᐱᐣ ᐃᑌᔨᑕᒪᓂ, ᑭ ᑳ ᑭ ᐯᑭᐦᐃᐣ.
[13] ᐁᑯᓯ ᑭ ᓱᐃᐧᓂᐢᑫᔨᐤ, ᐁ ᑭ ᓴᒥᓈᐟ, ᐁ ᐃᑌᐧᐟ, ᓂᐟ ᐃᑌᔨᑌᐣ; ᐯᑭᓯ ᒫᑲ. ᐁᑯᓯ ᓭᒫᐠ ᒪᒑᐢᐱᓀᐃᐧᐣ ᑭ ᓇᑲᑎᑯᔨᐊᐧ.
[14] ᐁᑯᓯ ᑭ ᐊᔭᑲᐧᒥᒣᐤ ᐁᑳ ᐊᐃᐧᔭ ᑭᑕ ᐃᐧᐦᑕᒪᐋᐧᔨᐟ: ᒫᑲ ᓯᐯᐧᐦᑌ ᒥᓇ ᑭ ᑳ ᐊᐧᐸᒥᐠ ᐊᔭᒥᐦᐁᐃᐧᔨᓂᐤ, ᒥᓇ ᐸᑭᑎᓂᑫ ᑭ ᐯᑭᐃᑯᐃᐧᐣ ᐅᐦᒋ, ᒧᓯᐢ ᑳ ᑭ ᐃᓯ ᓯᑭᑫᒧᐟ, ᑭᑕ ᐅᐦᒋ ᑭᐢᑫᔨᑕᒥᕽ.
[15] ᒫᑲ ᐋᒋ ᐱᑯ ᐊᐊᐧᓯᒣ ᑭ ᐸᐹ ᐊᒋᒫᐤ: ᒥᓇ ᐁ ᐅᓴᒣᔭᑎᒋᐠ ᐊᔨᓯᔨᓂᐊᐧᐠ ᑭ ᐯ ᒫᒪᐃᐧ ᐃᑐᐦᑌᐊᐧᐠ ᑭᑕ ᓇᑐᑕᑭᐠ, ᒥᓇ ᑭᑕ ᐃᔨᓂᑲᐃᒋᐠ ᐅᐟ ᐋᑯᓯᐃᐧᓂᐋᐧᐊᐧ ᐅᐦᒋ.
[16] ᒫᑲ ᐱᑲᐧᑕᐢᑲᒥᑲᕽ ᑭ ᐃᑐᐦᑌᐤ, ᐁ ᑭ ᐊᔭᒥᐦᐋᐟ.
[17] ᑭ ᐊᔨᑭᐣ ᒫᑲ ᐯᔭᐠ ᐊᓂᐦᐃ ᑭᓯᑳᐊᐧ, ᐁ ᑲᑭᐢᑭᓄᐊᒪᑫᐟ, ᐁᑯᓯ ᐁᑯᑕ ᐁ ᑭ ᐊᔮᒋᐠ ᐸᕒᐊᓯᐊᐧᐠ ᒥᓇ ᐅᔭᓱᐁᐧᐃᐧᔨᓂᐊᐧᐠ, ᐁ ᑭ ᐯ ᐃᑐᐦᑌᒋᐠ ᒥᓯᐁᐧ ᐅᐦᒋ ᑕᐦᑐ ᐅᑌᓇᓯᕽ ᑳᓬᐊᓬᐃᕽ ᒥᓇ ᒍᑎᐊᐃᕽ ᒥᓇ ᒉᕒᐅᓴᓬᐊᒥᕽ; ᐁᑯᓯ ᐅ ᒪᐢᑲᐃᐧᓯᐃᐧᓂᔨᐤ ᑳ ᑎᐯᔨᐦᒋᑫᔨᐟ ᑭ ᐃᐧᒉᐃᐧᐠ ᑭᑕ ᐃᔨᓂᑲᐃᐁᐧᐟ.
[18] ᐁᑯᓯ ᒫᑎᑲ, ᓈᐯᐊᐧᐠ ᑭ ᐯᓯᐁᐧᐊᐧᐠ ᓂᐯᐃᐧᓂᕽ ᓈᐯᐊᐧ ᐁ ᓂᐳᐃᐧᓯᔨᐟ: ᐁᑯᓯ ᑭ ᑳᑫᐧ ᐱᑐᑲᐁᐊᐧᐠ, ᑭᑕ ᐸᑭᑎᓇᒪᐋᐧᒋᐠ.
[19] ᐁᑯᓯ ᐁᑳ ᐁ ᒥᐢᑲᐦᑭᐠ ᑫ ᐃᓯ ᐱᑐᑲᐋᒋᐠ, ᐅᓴᑦ ᐁ ᒥᐦᒉᑎᐃᐧᐦᐟ, ᑭ ᐃᑐᑎᐊᐧᐠ ᑕᑯᐦᐨ ᐋᐧᐢᑲᐃᑲᓂᕽ, ᐁᑯᓯ ᐁ ᑭ ᐸᑭᑖᐯᑭᓈᒋᐠ ᓴᐳ ᐊᐸᑳᐧᓂᕽ ᑭᑭ ᐅ ᓂᐯᐃᐧᐣ ᒣᑳᐧ ᐊᔨᕽ ᐃᑕ ᐁ ᐅᑎᐢᑲᐃᐧ ᐊᔮᔨᐟ ᒋᓴᓴ.
[20] ᐁᑯᓯ ᐃᐢᐱ ᐃᐧᔭᐸᑕᕽ ᐅ ᑖᐯᐧᑕᒧᐃᐧᓂᔨᐤ, ᑭ ᐃᑌᐤ, ᓈᐯᐤ, ᑭ ᒪᒋᑎᐃᐧᓇ ᑭ ᐳᓀᔨᑕᒫᑲᐃᐧᐣ.
[21] ᐁᑯᓯ ᐅᒪᓯᓇᐃᑫᐃᐧᔨᓂᐊᐧᐠ ᒥᓇ ᐸᕒᐊᓯᐊᐧᐠ ᑭ ᒫᒋ ᓇᓈᑲᑕᐁᐧᔨᑕᒪᐧᐠ, ᐁ ᐃᑌᐧᒋᐠ, ᐊᐁᐧᓈᐊᐧ ᑳ ᐃᓯ ᐹᐢᑖᒧᐟ? ᐊᐁᐧᓇ ᑫ ᑭ ᐳᓀᔨᑕᒫᑫᐟ ᒪᒋᐃᑎᐃᐧᓇ ᑭᓭᒪᓂᑐ ᐱᑯ?
[22] ᒫᑲ ᒋᓴᐢ ᐁ ᑭᐢᑫᔨᑕᕽ ᐅ ᓈᑲᑕᐁᐧᔨᒋᑲᓂᔨᐊᐧ, ᑭ ᓇᐢᑫᐧᐊᐧᓯᒣᐤ ᒥᓇ ᑭ ᐃᑌᐤ, ᑫᑲᐧᐩ ᑳ ᒫᒥᑐᓀᔨᑕᒣᐠ ᑭ ᑌᐃᐋᐧᕽ?
[23] ᑕᓂᒪ ᓇᐊᐧᐨ ᐃᐧᔦᑕᕽ, ᑭᑕ ᐃᑌᐧᕽ, ᑭ ᒪᒋᐃᑎᐃᐧᓇ ᑭ ᐳᓀᔨᑕᒪᑲᐃᐧᐣ; ᐊᐁᐧᑲ ᑭᑕ ᐃᑌᐧᕽ, ᐊᐧᓂᐢᑳ ᒥᓇ ᐱᒧᐦᑌ?
[24] ᑭᑕ ᑭᐢᑫᔨᑕᒣᐠ ᒫᑲ ᐃᔨᓂᐃᐧᑯᓯᓵᐣ ᐁ ᐊᔮᐟ ᒪᐢᑲᐃᐧᓯᐃᐧᐣ ᐊᐢᑭᕽ ᑭᑕ ᐳᓀᔨᑕᒫᑫᐟ ᒪᒋᐃᑎᐃᐧᓇ [ᑭ ᐃᑌᐤ ᐊᓂᐦᐃ ᑳ ᓂᐳᐋᐧᐢᐱᓀᔨᐟ], ᑭᐟ ᐃᑎᐣ, ᐊᐧᓂᐢᑳ, ᐅᑎᓇ ᑭ ᓂᐯᐃᐧᐣ ᒥᓇ ᑭᑭᕽ ᐃᑐᐦᑌ.
[25] ᐁᑯᓯ ᓭᒫᐠ ᑭ ᐊᐧᓂᐢᑳᐤ, ᒥᓇ ᐁ ᑭ ᐅᑎᓇᕽ ᐊᓂᒪ ᐃᑕ ᑳ ᑭ ᐱᒥᓯᕽ, ᐃᐧᑭᕽ ᒫᑲ ᐁ ᑭ ᐃᓯ ᓯᐯᐧᑌᐟ, ᐁ ᒪᒥᒋᒫᐟ ᑭᓭᒪᓂᑐᐊᐧ.
[26] ᐁᑯᓯ ᑲᐦᑭᔭᐤ ᑭ ᒪᒪᐢᑳᑕᒪᐧᐠ, ᒥᓇ ᐁ ᑭ ᒪᒥᒋᒫᒋᐠ ᑭᓭᒪᓂᑐᐊᐧ; ᑭ ᓵᑲᐢᑭᓀᐢᑳᑲᐧᐠ ᒫᑲ ᓭᑭᓯᐃᐧᐣ, ᐁ ᐃᑌᐧᒋᐠ, ᑭ ᑭ ᐋᐧᐸᑌᓈᓇᐤ ᒫᒪᐢᑳᒋ ᑫᑲᐧᔭ ᑳ ᑭᓯᑳᐠ.
[27] ᐁᑯᓯ ᒣᐧᐢᑕᐢ ᐃᔨᑯᕽ ᑭ ᐊᐧᔭᐃᐧᐤ, ᒥᓇ ᑭ ᐋᐧᐸᒣᐤ ᐸᑊᓬᐃᑲᓇ ᓬᐃᐸᐩ, ᐁ ᐃᓯᔨᐦᑳᓱᔨᐟ, ᐁ ᐊᐱᔨᐟ ᐃᑕ ᑳ ᑕᓯ ᐅᑎᓂᒥᐟ, ᑎᐸᐦᐃᑫᐃᐧ ᓱᓂᔮᐊᐧ ᐁᑯᓯ ᑭ ᐃᑌᐤ, ᐱᒥᑎᓴᐦᐅᐣ.
[28] ᐁᑯᓯ ᑭ ᓇᑲᑕᑦ ᑲᐦᑭᔭᐤ ᑫᑲᐧᐩ, ᒥᓇ ᐁ ᑭ ᐸᓯᑯᐟ ᐁ ᑭ ᐱᒥᑎᓴᐋᐧᐟ.
[29] ᓬᐃᐸᐩ ᒫᑲ ᑭ ᑭᐦᒋ ᐃᐧᑯᑫᐤ ᐃᐧᑭᕽ; ᒥᓇ ᐁᑯᑕ ᑭ ᐊᔮᐊᐧᐠ ᐁ ᐅᓴᒣᔭᑎᒋᐠ ᐸᑊᓬᐃᑲᓇᐠ ᒥᓈ ᑯᑕᑲ ᑳ ᐃᐧᒋᒥᒋᓱᒥᑯᐟ.
[30] ᐁᑯᓯ ᐹᕒᐊᓯᐊᐧᐠ ᐊᓯᒋ ᐅ ᒪᓯᓇᐦᐃᑫᐃᐧᔨᓂᒥᐊᐧᐊᐧ ᑭ ᐊᔪᑌᐧᐁᐧᒣᐊᐧᐠ ᐅ ᑭᐢᑭᓄᐦᐊᒪᐋᐧᑲᓂᔨᐊᐧ, ᐁ ᐃᑕᒋᐠ, ᑖᓀᑭ ᑳ ᐃᐧᒋ ᒥᒋᓱᒪᔦᑳᐧᐤ ᒥᓇ ᑳ ᐃᐧᒋ ᒥᓂᑫᐧᒫᔦᑲᐧᐤ ᐸᑊᓬᐃᑲᓇᐠ ᒥᓇ ᐅᒪᒑᑎᓴᐠ?
[31] ᐁᑯᓯ ᒋᓴᐢ ᐁ ᓇᐢᑫᐧᐊᐧᓯᒫᐟ ᑭ ᐃᑌᐤ, ᐊᓂᑭ ᑳ ᒥᔪ ᐊᔮᒋᐠ ᓇᒪ ᐃᐧᔭ ᓇᑕᐁᐧᔨᒣᐊᐧᐠ ᐅᓇᓈᑕᐃᐧᐃᐁᐧᐊᐧ: ᒫᑲ ᐊᓂᑭ ᑳ ᐋᑯᓯᒋᐠ.
[32] ᓇᒪᐃᐧᔭ ᓂ ᐯ ᓇᑐᒪᐊᐧᐠ ᑳ ᑲᐧᔭᐢᑳᐧᑎᓯᒋᐠ ᑭᑕ ᑫᐧᐢᑲᑎᓯᒋᐠ ᒫᑲ ᑳ ᒪᒑᑎᓯᒋᐠ.
[33] ᐁᑯᓯ ᑭ ᐃᑎᐠ, ᐅ ᑭᐢᑭᓄᐅᒪᐋᐧᑲᓇ ᒑᐣ ᒥᐦᒉᑖᐧᐤ ᐃᔨᐊᐧᓂᓯᐃᓱᐊᐧᐠ, ᒥᓇ ᒪᐃᐧᒧᐢᒋᑫᐊᐧᐠ, ᐁᑯᓯ ᒣᐧᐦᒋ ᐃᐧᐢᑕᐋᐧᐤ ᐹᕒᐊᓯᐊᐧᐠ ᐅ ᑭᐢᑭᓄᐦᐊᒫᐋᑲᓂᐋᐧᐊᐧ; ᒫᑲ ᐃᐧᔭ ᑭᔭ ᒥᒋᓱᐊᐧᐠ ᒥᓇ ᒥᓂᑫᐧᐊᐧᐠ.
[34] ᐁᑯᓯ ᒋᓴᐢ ᑭ ᐃᑌᐤ, ᑭ ᑲ ᑭ ᐃᓯᐋᐊᐧᐠ ᒋ ᑭᑕ ᐃᔨᐊᐧᓂᓯᐃᓱᒋᐠ ᐊᓂᑭ ᑳ ᐃᐧᒉᐋᐧᒋᐠ ᐅᐃᐧᑭᑐᐊᐧ, ᒣᑳᐧᐨ ᐁ ᐃᐧᒉᐃᐧᑯᒋᐠ ᑭᐦᒋ ᐃᐧᑭᑐᐃᐧᔨᓂᐊᐧ?
[35] ᒫᑲ ᐊᓂᐦᐃ ᑭᓯᑳᐊᐧ ᑭᑕ ᐅᑎᐦᒋᐸᔨᐊᐧ; ᐃᐢᐱ ᑭᐦᒋ ᐃᐧᑭᑐᐃᐧᔨᓂᐊᐧ ᑫ ᒪᐢᑲᒥᐦᒋᐠ, ᐁᑯᐢᐱ ᒫᑲ ᐊᓂᐦᐃ ᑭᓯᑳᐊᐧ ᑫ ᐃᔨᐊᐧᓂᓯᐃᓱᒋᐠ.
[36] ᐁᑯᓯ ᒥᓇ ᑭ ᑕᓯᑕᒪᐁᐧᐤ ᐋᐁᐧᒋᑲᐣ; ᓇᒪᐃᐧᔭ ᐊᐃᐧᔭᐠ ᐊᔨᓯᔨᓂᐤ ᐸᑫᐧᐱᑕᑦ ᐅᐢᑭ ᑭᑭᐢᑳᒋᑲᐣ ᑭᑕ ᐊᑯᐢᑕᐊᕽ ᑳᔮᓯ ᑭᑭᐢᑳᒋᑲᓂᕽ; ᑳᑲᔦ ᐃᐧᔭ ᑭᑕ ᔮᔨᑭᐱᑕᑦ ᑳ ᐅᐢᑳᔨᐊᐧᕽ, ᐁᑯᓯ ᒥᓇ ᐊᓂᒪ ᐅᐢᑳᔨᕽ ᑳ ᐅᐦᑌᓂᑳᑌᐠ ᓇᒪᐃᐧᔭ ᑭᑕ ᓇᐃᐢᑲᒧᒪᑲᐣ ᐊᓂᒪ ᑲᔮᓵᔨ.
[37] ᒥᓇ ᓇᒪᐃᐧᔭ ᐊᐃᐧᔭᐠ ᐊᔨᓯᔨᓂᐤ ᐊᐢᑖᐤ ᐅᐢᑭ ᓱᒥᓈᐳ ᑲᔮᓯ ᐸᑫᑭᓄᐃᐧ ᐊᓯᐊᐧᒋᑲᓂᕽ; ᐊᔨᐢ ᐅᐢᑭ ᓱᒥᓇᐳ ᑭᑕ ᐳᐢᑯᐢᑲᒧᒪᑲᐣ ᐸᑫᑭᓇᐧ, ᐁᑯᓯ ᑭᑕ ᓯᑭᐸᔨᐤ, ᒥᓇ ᐸᑫᑭᓇᐧ ᑭᑕ ᓂᓯᐊᐧᓈᑕᓇᐧ.
[38] ᒫᑲ ᐅᐢᑭ ᓱᒥᓈᐳ ᐱᑯ ᑭᑕ ᐊᐢᑖᕽ ᐅᐢᑭ ᓱᒥᓈᐳᐃᐧ ᐸᑫᑭᓇᕽ.
[39] ᒥᓇ ᓇᒪᐃᐧᔭ ᐊᐃᐧᔭᐠ ᐁ ᑭ ᒥᓂᑫᐧᐟ ᑳ ᑳᔮᓵᔨᐊᐧᕽ ᓱᒥᓈᐳ ᓇᑕᐁᐧᔨᑕᑦ ᑳ ᐅᐢᑳᔨᐊᐧᓂᔨᐠ, ᒋᑫᒪ ᐃᑌᐧᐤ ᑳ ᑲᔮᓵᔨᐊᐧᕽ ᓇᐊᐧᐨ ᒥᐋᐧᓯᐣ.