[1] ᐁᑲᐧ ᒫᑲ ᐊᓂᒪ ᐃᐧᐦᑯᐦᑐᐃᐧᐣ ᐁᑳ ᑳ ᐱᓭᐧᑲᓱᐟ ᐸᑫᐧᓯᑲᐣ ᑭᓯᐋᐧᐠ ᑭ ᐊᔮᐤ, ᐊᓂᒪ ᒪᔮᐢᑯᑖᑐᐃᐧᑯᑐᐃᐧᐣ ᑳ ᐃᓯᔨᐦᑳᑌᐠ.
[2] ᐁᑯᓯ ᑭᐦᒋ ᐊᔭᒥᐦᐁᐃᐧᔨᓂᐊᐧᐠ ᒥᓇ ᒪᓯᓇᐦᐃᑫᐃᐧᔨᓂᐊᐧᐠ ᑭ ᓇᓇᑐᓇᒪᐧᐠ ᑖᓂᓯ ᑫ ᐃᓯ ᓂᐸᐦᐋᒋᐠ; ᐃᐧᔭ ᐁ ᑭ ᑯᐢᑖᒋᐠ ᐊᔨᓯᔨᓂᐊᐧ.
[3] ᐁᑯᓯ ᓭᑕᐣ ᑭ ᐱᒋᔭᐁᐧᐢᑲᐁᐧᐤ ᒍᑕᓴ, ᐃᐢᑳᕒᐃᐊᐟ ᑳ ᑭ ᐃᓯ ᐊᐢᐱᔨᑳᓱᐟ, ᑳ ᐊᓯᑕᑭᒥᐦᐟ ᐊᓂᐦᐃ ᒥᑖᑕᐦᐟ ᓂᓱᓵᑊ.
[4] ᑭ ᓯᐯᐧᑌᐤ ᒫᑲ ᒥᓇ ᑭ ᐃᐧᒋ ᐃᓯᐦᒋᑫᒣᐤ ᑭᐦᒋ ᐊᔭᒥᐦᐁᐃᐧᔨᓂᐊᐧ ᐊᓯᒋ ᓯᒫᑲᓂᓯᐃᐧ ᑭᒫᐊᐧ, ᑖᓂᓯ ᑫ ᑭ ᐃᓯ ᐸᑭᑎᓇᒪᐋᐧᐟ.
[5] ᐁᑯᓯ ᑭ ᒥᐁᐧᔨᑕᒥᔨᐊᐧ, ᐁ ᑭ ᐊᓱᑕᒫᑯᐟ ᒫᑲ ᑭᑕ ᒥᔨᑯᐟ ᓱᓂᔮᐊᐧ.
[6] ᑭ ᓇᐢᑯᒧ ᒫᑲ, ᒥᓇ ᐁ ᑭ ᓇᑐᓇᕽ ᐃᑕ ᑭᑕ ᓇᐃᐸᔨᔨᐠ ᑭᑕ ᐸᑭᑎᓇᒪᐋᐧᐟ ᒣᑳᐧᐨ ᐃᑕ ᐁᑳ ᐁ ᐊᔮᔨᐟ ᐊᔨᓯᔨᓂᐊᐧ.
[7] ᐁᑯᓯ ᐊᓂᒪ ᑭᓯᑳᐤ ᐁᑳ ᑳ ᐱᓭᐧᑲᓱᐟ ᐸᑫᐧᓯᑲᐣ ᑳ ᐋᐸᒋᐦᐃᐦᐟ ᑭ ᐅᑎᐦᒋᐸᔨᐤ, ᐃᑕ ᒪᔭᐢᑯᑖᑐᐃᐧᑯᑐᐃᐧᐣ ᑳ ᐃᑕᐢᑌᐠ ᑭᑕ ᓂᐸᑖᕽ.
[8] ᑭ ᐃᓯᑌᓴᐁᐧᐤ ᒫᑲ ᐱᑕᕒ ᐊᓯᒋ ᒑᐣ, ᐁ ᐃᑌᐧᐟ, ᓇᑕᐃᐧ ᑲᐧᔮᒋᑖᐠ ᒪᔮᐢᑯᑕᑐᐃᐧᑯᑐᐃᐧᐣ, ᑭᑕ ᒥᒋᔭᕽ.
[9] ᑭ ᐃᑌᐊᐧᐠ ᒫᑲ, ᑖᓂᑌ ᐁᑌᔨᑕᒪᐣ ᑭᑕ ᑲᐧᔭᒋᑖᔮᕽ?
[10] ᐁᑯᓯ ᑭ ᐃᑌᐤ, ᒋᐢᐟ, ᐃᐢᐱ ᑭ ᐱᐦᑐᑫᔦᑯ ᐅᑌᓈᕽ, ᑭ ᑲ ᓇᑭᐢᑲᐋᐧᐋᐧᐤ ᓈᐯᐤ ᐁ ᐱᒥᐃᐧᑕᐟ ᓂᐱᐩ ᐊᓯᐊᐧᒋᑲᓂᕽ; ᐱᒥᑎᓴᐅᕽ, ᒥᓇ ᐱᐦᑐᑫᐃᐧᒉᐃᐧᕽ ᐋᐧᐢᑳᐦᐃᑲᓂᕽ ᐃᑕ ᐊᓂᒪ ᑫ ᐃᓯ ᐱᐦᑐᑫᐟ.
[11] ᑭ ᑲ ᐃᑖᐋᐧᐤ ᒫᑲ ᑳ ᑎᐯᔨᑕᕽ ᐋᐧᐢᑳᐦᐃᑲᐣ, ᐅᑭᐢᑭᓄᐦᐊᒫᑫᐤ ᑭᑎᐠ, ᑖᓂᑕ ᐁᔮᐠ, ᐅᑭᐅᑫᐃᐧᑲᒥᐠ, ᐃᑕ ᑫ ᐃᐧᒋ ᒥᒋᓱᒪᑭᐠ ᓂ ᑭᐢᑭᓄᐦᐊᒪᐋᐧᑲᓇᐠ ᒪᔮᐢᑯᑖᑐᐃᐧᑯᑐᐃᐧᐣ?
[12] ᑭ ᑲ ᐋᐧᐸᐦᑕᐦᐃᑯᐋᐧᐤ ᒫᑲ ᐁ ᐱᐢᑭᒋ ᑭᐸᐦᐃᑳᑌᔨᐠ ᐃᐢᐱᒥᕽ, ᐁ ᒪᐦᑭ ᑕᐋᐧᔨᐠ ᐁ ᑲᐧᔭᑕᓂᔨᐠ; ᐁᑯᑕ ᑲᐧᔭᒋᑖᐠ.
[13] ᑭ ᐃᑐᐦᑌᐊᐧᐠ ᒫᑲ, ᒥᓇ ᐁ ᑭ ᐃᓯ ᒥᐢᑲᐦᑭᐠ ᐊᓂᒪ ᑳ ᑭ ᐃᑎᑯᒋᐠ: ᐁᑯᑕ ᒫᑲ ᐁ ᑭ ᑲᐧᔮᒋᑖᒋᐠ ᒪᔮᐢᑯᑖᑐᐃᐧᑯᑐᐃᐧᐣ.
[14] ᐁᑯᓯ ᐃᐢᐱ ᑎᐸᐃᑲᐣ ᐁᐧᑎᒋᐸᔨᐠ, ᑭ ᓇᐦᐊᐱᐤ ᐊᓯᒋ ᐅ ᑭᐢᑭᓄᐦᐊᒪᐋᐧᑲᓇ.
[15] ᐁᑯᓯ ᑭ ᐃᑌᐤ, ᒧᐢᑕᐁᐧᔨᑕᒧᐃᐧᓂᕽ ᑭ ᑭ ᓄᐦᑌ ᐃᐧᒋ ᒥᒋᓱᒥᑎᓈᐋᐧᐤ ᐅᒪ ᒪᔮᐢᑯᑖᑐᐃᐧᑯᑐᐃᐧᐣ ᐁ ᒪᐧᔦ ᑲᑲᐧᑕᑭᑖᔮᐣ;
[16] ᒋᑫᒫ ᑭᐟ ᐃᑎᓈᐋᐧᐤ, ᓇᒪᐃᐧᔭ ᓂ ᑲ ᒥᒋᐣ, ᐹᑎᒪ ᑭ ᑎᐱᐸᔨᑭ ᐅᐟ ᐅᑌᓇᐃᐧᐃᐧᓂᕽ ᑭᓭᒪᓂᑐ.
[17] ᑭ ᐅᑎᓇᑦ ᒫᑲ ᒥᓂᑳᐧᑲᐣ, ᒥᓇ ᐁ ᑭ ᓇᓈᐢᑯᒧᐟ, ᑭ ᐃᑌᐧᐤ, ᐅᑎᓇᒧᐠ ᐅᒪ, ᒥᓇ ᒪᑎᓇᒫᑐᐠ;
[18] ᒋᑫᒪ ᑭᐟ ᐃᑎᓈᐋᐧᐤ, ᓇᒪᐃᐧᔭ ᓂ ᑲ ᒥᓂᑳᐧᐣ ᐊᓄᐦᐨ ᐅᐦᒋ ᐁ ᐁᓯ ᒥᓂᓯᐃᐧᐟ ᓱᒥᓇᑎᐠ, ᐹᑎᒪ ᐅᑎᐦᒋᐸᔨᑭ ᐅᑐᑌᓇᐃᐧᐃᐧᐣ ᑭᓭᒪᓂᑐ.
[19] ᐁᑯᓯ ᑭ ᐅᑎᓀᐤ ᐸᑫᐧᓯᑲᓇ, ᐃᐢᐱ ᒫᑲ ᑳ ᓇᓈᐢᑯᒧᐟ, ᑭ ᐸᑫᐧᓀᐤ, ᐁᑯᓯ ᐁ ᑭ ᒥᔮᐟ, ᐁ ᐃᑌᐧᐟ, ᐁᐊᐧᑯᒪ ᓂᔭᐤ ᑳ ᒣᑭᓇᓂᐊᐧᕽ ᑭᔭᐋᐧᐤ ᐅᐦᒋ: ᑐᑕᒧᐠ ᐅᒪ ᐁ ᑭᐢᑭᓯᑐᑕᐃᐧᔦᐠ.
[20] ᒥᓇ ᐁᑯᓯ ᒣᐧᐦᒋ ᒥᓂᑳᐧᑲᐣ, ᑳ ᑎᐱᐢᑭᓀᑫᐧᒋᐠ, ᐁ ᐃᑌᐧᐟ, ᐅᒪ ᒥᓂᑳᐧᑲᐣ ᐁᐊᐧᑯ ᐅᐢᑭ ᐃᓯᑕᐧᐃᐧᐣ ᓂ ᒥᑯᕽ, ᐊᓂᒪ ᑳ ᓯᑭᓂᑲᑌᐠ ᑭᔭᐋᐧᐤ ᐅᐦᒋ.
[21] ᒫᑲ ᒫᑎᑲ, ᐅᒋᐦᒋ ᐊᓇ ᑳ ᐊᐧᔦᓯᐸᑭᑎᓂᐟ ᐅᑕ ᑭᑭ ᐊᔮᔨᐤ ᒥᒋᓱᐃᐧᓈᑎᑯᕽ.
[22] ᑖᐯᐧ ᐊᓂ ᐃᔨᓂᐃᐧᑯᓯᓵᐣ ᐃᐢᐸᔨ ᒣᐧᐦᒋ ᐊᓂᒪ ᑳ ᑭ ᐃᑕᑭᒥᑯᐃᐧᓯᐟ: ᒫᑲ ᑲᑳᐧᑕᑭᓯᐤ ᐊᓇ ᐊᔨᓯᔨᓂᐤ ᑳ ᐊᐧᔦᓯᐸᑭᑎᓈᐟ!
[23] ᐁᑯᓯ ᑭ ᒪᒋ ᑲᑫᐧᒋᑐᐊᐧᐠ, ᑖᓈᓇ ᐃᐧᔭᐋᐧᐤ ᐅᐦᒋ ᐅᒪ ᑫ ᑐᑕᕽ.
[24] ᐁᑲᐧ ᒥᓇ ᑭ ᒫᒋ ᑲᑭᑭᑐᐊᐧᐠ, ᑖᓈᓇ ᐃᐧᔭᐋᐧᐤ ᐅᐦᒋ ᑫ ᒫᐊᐧᒋ ᑭᐢᑕᑭᒥᐦᐟ.
[25] ᐁᑯᓯ ᑭ ᐃᑌᐤ, ᐅ ᑭᐦᒋ ᐅᑭᒫᒥᐋᐧᐊᐧ ᒉᐣᑕᐃᓬᐊᐠ ᑎᐯᔨᒥᑲᐧᐠ; ᐁᑯᓯ ᐊᓂᐦᐃ ᑳ ᑎᐯᔨᒥᑯᒋᐠ ᐅᒥᔪᑐᑌᐢᑕᒪᑫᐊᐧᐠ ᐃᓯᔨᐦᑳᑖᐊᐧᐠ.
[26] ᒫᑲ ᑭᔭᐋᐧᐤ ᓇᒪᐃᐧᔭ ᐁᑯᓯ ᑭ ᑲ ᐃᓯ ᐊᔮᓈᐋᐧᐤ; ᒫᑲ ᐊᓇ ᓇᐊᐧᐨ ᐁ ᓂᑳᓀᔨᑖᑯᓯᐟ ᑭᔭᐋᐧᐤ, ᑭᔮᑦ ᑖᐱᐢᑯ ᐅᓯᒥᒫᐤ ᑭᑕ ᐃᑌᔨᑖᑯᓯᐤ; ᒥᓇ ᐊᓇ ᑳ ᓂᑳᓀᔨᑖᑯᓯᐟ ᑖᐱᐢᑯ ᐊᓇ ᑳ ᐸᒥᐢᑖᑫᐟ.
[27] ᒋᑫᒫ ᐊᐁᐧᓇ ᓇᐊᐧᐨ ᐊᐊᐧᓯᒣ ᐁᑌᔨᑖᑯᓯᐟ, ᑳ ᒥᒋᓱᐟ, ᐊᐁᐧᑳ ᐊᓇ ᑳ ᐸᒥᐢᑕᑫᐟ? ᓇᒪ ᒋ ᐊᓇ ᑳ ᐊᐱᐟ ᐁ ᒥᒋᓱᐟ? ᓂᔭ ᒫᑲ ᑭ ᐃᐧᒉᐃᐧᑎᓈᐋᐧᐤ ᑖᐱᐢᑯᐨ ᐊᓇ ᑳ ᐸᒥᐢᑖᑫᐧᐟ.
[28] ᑭᔭᐋᐧᐤ ᒫᑲ ᑳ ᑭ ᐯ ᐃᐧᒋ ᐊᔮᒥᔦᐠ ᓂ ᑯᑌᔨᒥᑯᐃᐧᓂᕽ;
[29] ᐁᑯᓯ ᒫᑲ ᑯᔭᑭᑕᒫᑎᓈᐋᐧᐤ ᐅᑌᓇᐃᐧᐃᐧᐣ. ᑖᐱᐢᑯᐨ ᓄᑖᐃᐧ ᑳ ᐃᓯ ᐅᔭᑭᑕᒪᐃᐧᐟ,
[30] ᑭᑕ ᒥᒋᓱᔦᐠ ᒥᓇ ᑭᑕ ᒥᓂᑫᐧᔦᐠ ᓂ ᒥᒋᓱᐃᐧᓈᑎᑯᕽ ᓂᐟ ᐅᑌᓇᐃᐧᐃᐧᓂᕽ; ᒥᓇ ᒫᑲ ᑭᑕ ᐊᐱᔦᐠ ᑭᐦᒋ ᐅᑭᒫᐊᐧᐱᐃᐧᓂᕽ ᐁ ᐅᔭᓱᐋᐧᑖᔦᑯᐠ ᒥᑖᑕᐟ ᓂᓱᓵᑊ ᑳ ᐃᑕᑐᑌᐃᐧᓯᐟ ᐃᐢᕒᐁᐃᓬ.
[31] ᓴᐃᒪᐣ, ᓴᐃᒪᐣ, ᒫᑎᑲ, ᓭᑕᐣ ᑭ ᓇᑕᐁᐧᔨᑕᑦ ᑭᑕ ᐊᔮᐃᐧᑯᔦᐠ, ᑖᐱᐢᑯᐨ ᐸᑫᐧᓯᑲᓂᑲᐣ ᑭᑕ ᐃᓯ ᐸᐊᐧᐢᑎᒥᑯᔦᐠ:
[32] ᒫᑲ ᑭ ᑭ ᐊᔭᒥᐦᐁᐢᑕᒫᑎᐣ, ᑭ ᑖᐯᐧᔦᔨᑕᒧᐃᐧᐣ ᐁᑳ ᑭᑕ ᓄᑌᐸᔨᐠ: ᐃᐢᐱ ᒫᑲ ᑫᐧᐢᑭᓂᑯᐃᐧᓯᔭᓂ, ᒪᐢᑲᐃᐧᓯᐦᐃᐠ ᑭᒋᐋᐧᒪᐠ.
[33] ᑭ ᐃᑎᐠ ᒫᑲ, ᑳ ᑎᐯᔨᐦᒋᑫᔭᐣ, ᓂ ᑌᐯᔨᒧᐣ ᑭᑕ ᐃᐧᒉᐃᐧᑖᐣ ᑭᐸᐦᐅᑐᐃᐧᓂᕽ ᐃᓯ ᒥᓇ ᓂᐳᐃᐧᓂᕽ.
[34] ᐁᑯᓯ ᑭ ᐃᑌᐧᐤ, ᑭ ᐃᐧᐦᑕᒫᑎᐣ ᐱᑕᕒ, ᐸᑲᐋᑳᐧᐣ ᐊᓄᐦᐨ ᑫ ᑭᓯᑳᐠ ᓇᒪᐃᐧᔭ ᑭᑕ ᐯᐦᑖᑯᓯᐤ, ᐹᑐᐢ ᐃᔨᑯᕽ ᓂᐢᑖᐧᐤ ᑭ ᐋᓀᐧᑕᒪᓂ ᐁ ᑭᐢᑫᔨᒥᔭᐣ.
[35] ᒥᓇ ᒫᑲ ᑭ ᐃᑌᐤ, ᐃᐢᐱ ᑳ ᓯᐯᐧᑎᓴᐦᐅᑕᑯᐠ ᐁᑳ ᐁ ᐊᔮᔦᐠ ᓱᓂᔮᐃᐧᐊᐧᑎᐢ ᐊᐦᐳ ᒪᐢᑭᒧᐟ, ᐊᐦᐳ ᒪᐢᑭᓯᓇ, ᑫᑲᐧᐩ ᒋ ᑭ ᑭ ᑭᐧᑕᒫᓈᐋᐧᐤ? ᐁᑯᓯ ᑭ ᐃᑌᐧᐊᐧᐠ, ᓇᒪ ᑫᑲᐧᐩ.
[36] ᐁᑯᓯ ᑭ ᐃᑌᐤ, ᒫᑲ ᐁᑲᐧ ᐊᓇ ᑳ ᐊᔮᐟ ᓱᓂᔮᐃᐧᐊᐧᑎᐢ, ᑭᔮᑦ ᑭᑕ ᐅᑎᓇᑦ, ᐁᑯᓯ ᒥᓇ ᒪᐢᑭᒧᐟ; ᐊᓇ ᒫᑲ ᐁᑳ ᑳ ᐊᔮᐟ ᐃᓴᐁᐧᐢᐠ, ᑭᔮᑦ ᑭᑕ ᐊᑕᐊᐧᑫᐤ ᐅᐢᑯᑕᑲᐩ, ᐁᑯᓯ ᑭᑕ ᐊᑖᐁᐧᐤ.
[37] ᒋᑫᒫ ᑭᐟ ᐃᑎᓈᐋᐧᐤ, ᐅᒪ ᑳ ᒪᓯᓇᐃᑳᑌᐠ ᐱᑯ ᑭᑕ ᑎᐱᐸᔨᑕᒫᑲᐃᐧᔮᐣ, ᑭ ᐊᓯᑕᑭᒫᐤ ᐅ ᒪᒋᐃᑎᐢᑲ: ᒋᑫᒫ ᐊᓂᐦᐃ ᓂᔭ ᑳ ᑕᓯᒥᑯᔮᐣ ᑭᑕ ᑎᐱᐸᔨᐊᐧ.
[38] ᐁᑯᓯ ᑭ ᐃᑌᐧᐊᐧᐠ, ᑳ ᑎᐯᔨᐦᒋᑫᔭᐣ, ᒋᐢᐟ, ᐅᐦᐃ, ᓂᓱ ᐃᓴᐁᐧᐢᑲ. ᑭ ᐃᑌᐤ ᒫᑲ, ᐁᑯᔨᑯᕽ.
[39] ᑭ ᐯ ᐊᐧᔭᐃᐧᐤ ᒫᑲ, ᒥᓇ ᑭ ᐃᑐᐦᑌᐤ, ᑳ ᓀᑳᒥ ᐃᑐᑕᕽ, ᐋᓬᐃᑊᐢ ᐊᐧᒋᕽ; ᐁᑯᓯ ᐅ ᑭᐢᑭᓄᐦᐊᒪᐋᐧᑲᓇ ᒥᓇ ᑭ ᐱᒥᑎᓴᐦᐅᐠ.
[40] ᐃᐢᐱ ᒫᑲ ᑌᑯᓯᕽ ᐁᑯᑕ, ᑭ ᐃᑌᐤ, ᐊᔭᒥᐊᐠ ᐁᑳ ᑭᑕ ᐃᑐᑌᔦᐠ ᑯᑌᔨᒥᑯᐃᐧᓂᕽ.
[41] ᑭ ᓇᑲᑌᐤ ᒫᑲ, ᓈᓂᑐᐤ ᐃᔨᑯᕽ ᑭᑕ ᑭ ᐱᒧᓯᓀᕽ; ᐁᑯᓯ ᑭ ᐅᒋᒋᑲᐧᓇᐱᐤ ᐁ ᐊᔭᒥᐊᐟ,
[42] ᐁ ᐃᑌᐧᐟ, ᓄᑕ, ᑭᐢᐱᐣ ᐁᑌᔨᑕᒧᐊᐧᓀ, ᐃᑲᑌᓇᒪᐃᐧᐣ ᐅᒪ ᒥᓂᑳᐧᒋᑲᐣ: ᒫᑲ ᓇᒪᐃᐧᔭ ᓂᔭ ᐁ ᐃᑌᔨᑕᒫᐣ, ᒫᑲ ᑭᔭ, ᑭᑕ ᐃᐧ ᑐᒋᑳᑌᐤ.
[43] ᑭ ᓄᑯᐅᑐᑖᐠ ᒫᑲ ᐅᑭᓯᑯᐊᐧ ᑭᐦᒋ ᑭᓯᑯᕽ ᐅᐦᒋ, ᐁ ᓯᑐᐢᑳᑯᐟ.
[44] ᐁᑯᓯ ᓇᐢᐱᐨ ᐁ ᑲᑲᐧᑕᑫᔨᒧᐟ, ᐊᐊᐧᓯᒣ ᑭ ᐋᑲᒣᔨᒧ ᐁ ᐊᔭᒥᐦᐋᐟ: ᐱᔨᐢ ᐅᐟ ᐊᐯᐧᓯᐃᐧᐣ ᑭ ᐃᓯ ᐊᔭᔨᐤ ᑖᐱᐢᑯᐨ ᐁ ᒪᑭ ᐸᐸᑭᑲᐊᐧᓇᔨᐠ ᒥᐦᑯ ᐊᐢᑭᕽ.
[45] ᐃᐢᐱ ᒫᑲ ᑳ ᐸᓯᑯᐟ ᐅ ᒪᐃᐧᒧᐢᒋᑫᐃᐧᓂᕽ ᐅᐦᒋ, ᑭ ᐯ ᓇᑌᐤ ᐅ ᑭᐢᑭᓄᐦᐊᒪᐋᐧᑲᓇ, ᑭ ᒥᐢᑲᐁᐧᐤ ᒫᑲ ᐁ ᓂᐹᔨᐟ ᑭᓯᓇᑌᔨᑕᒧᐃᐧᐣ ᐅᐦᒋ,
[46] ᐁᑯᓯ ᑭ ᐃᑌᐤ, ᑖᓀᑭ ᑳ ᓂᐹᔦᐠ? ᐊᐧᓂᐢᑳᐠ ᒥᓇ ᐊᔭᒥᐦᐋᐠ, ᐁᑳ ᑭᑕ ᐊᔮᔦᐠ ᑯᑌᔨᒥᑯᐃᐧᓂᕽ.
[47] ᒣᑳᐧᐨ ᒫᑲ ᐁ ᐱᑭᐢᑫᐧᐟ, ᒋᐢᐟ, ᒥᐦᒉᐟ ᐊᔨᓯᔨᓂᐊᐧ, ᐊᓯᒋ ᐊᓇ ᒍᑕᐢ ᑳ ᐃᓯᔨᐦᑳᑎᐟ, ᐁᐊᐧᑯ ᐯᔭᐠ ᐊᓂᑭ ᒥᑖᑕᐟ ᓂᓱᓵᑊ, ᐁ ᓂᑲᓄᑕᐋᐧᐟ; ᐁᑯᓯ ᑭᓯᐊᐧᐠ ᐁ ᑭ ᐊᑎ ᓇᑕᐟ ᒋᓴᓴ ᐁ ᐃᐧ ᐅᒉᒫᐟ.
[48] ᒫᑲ ᒋᓴᐢ ᑭ ᐃᑌᐤ, ᒍᑕᐢ, ᑭ ᐊᐧᔦᓯᐸᑭᑎᓈᐤ ᒋ ᐃᔨᓂᐃᐧᑯᓯᓵᐣ ᐁ ᐅᒉᒪᐟ?
[49] ᐃᐢᐱ ᒫᑲ ᐊᓂᐦᐃ ᑳ ᐃᐧᒉᑯᐟ, ᐃᐧᔮᐸᐦᑕᒥᔨᐟ ᑖᓂᓯ ᐁ ᐃᐧ ᐃᐢᐸᔨᔨᐠ, ᑭ ᐃᑌᐧᐊᐧᐠ, ᑳ ᑎᐯᔨᐦᒋᑫᔭᐣ, ᓂ ᑲ ᐸᑲᒪᐃᑳᓈᐣ ᒋ ᐁᑲᐧ ᐃᓴᐁᐧᐢᐠ ᐅᐦᒋ?
[50] ᐁᑯᓯ ᐯᔭᐠ ᐃᐧᔭᐋᐧᐤ ᐅᐦᒋ ᑭ ᐸᑲᒪᐁᐧᐤ ᐅᐟ ᐊᑐᐢᑫᔮᑲᓂᔨᐊᐧ ᑭᐦᒋ ᐊᔭᒥᐦᐁᐃᐧᔨᓂᐊᐧ, ᒥᓇ ᐁ ᑭ ᑭᐢᑭᐁᐧᐸᐊᒫᐧᐟ ᐅᑕᐊᐧᑳᔨᐤ ᑭᐦᒋ ᓂᐢᑭᕽ ᐃᑌᑫ.
[51] ᒫᑲ ᒋᓴᐢ ᐁ ᓇᐢᑫᐧᐊᐧᓯᑖᐧᐠ ᑭ ᐃᑌᐧᐤ, ᐁᑯᔨᑯᕽ ᑭᔮᑦ, ᐁᑯᓯ ᑭ ᑖᑭᓇᒣᐧᐤ ᐅᑕᐊᐧᑲᔨᐤ, ᐁᑯᓯ ᐁ ᑭ ᐃᔨᓂᑲᐋᐧᐟ.
[52] ᒋᓴᐢ ᒫᑲ ᑭ ᐃᑌᐤ ᑭᐦᒋ ᐊᔭᒥᐦᐁᐃᐧᔨᓂᐊᐧ, ᒥᓇ ᓯᒫᑲᓂᓯᐃᐧᑭᒫᐊᐧ ᑭᐦᒋ ᐊᔭᒥᐦᐁᐃᐧᑲᒥᑯᕽ ᐅᐦᒋ ᐊᓯᒋ ᑳ ᓂᑳᓀᔨᑖᑯᓯᔨᐟ ᑳ ᐯ ᓈᑎᑯᐟ, ᑭ ᐯ ᐃᑐᐦᑖᓈᐋᐧᐣ, ᒋ, ᑖᐱᐢᑯᐨ ᐅᑭᒧᑎᐢᐠ ᐁ ᒪᐃᐧᓀᐢᑲᐋᐧᔦᐠ, ᐃᓴᐁᐧᐢᑲ ᒥᓇ ᒥᐢᑎᑯ ᐸᑲᒫᑲᓇ ᐁ ᐯ ᑕᑯᓇᒣᐠ?
[53] ᒣᑳᐧᐨ ᑕᐦᑐ ᑭᓯᑳᐤ ᐁ ᐃᐧᒉᐃᐧᑕᑯᐠ ᑭᐦᒋ ᐊᔭᒥᐦᐁᐃᐧᑲᒥᑯᕽ, ᓇᒪᐃᐧᔭ ᑭ ᑭ ᓱᐃᐧᓂᐢᑫᐢᑕᐃᐧᓈᐋᐧᐤ: ᒫᑲ ᐁᐊᐧᑯᒪ ᑭᔭᐋᐧᐤ ᑭ ᑎᐸᐃᑲᓂᐋᐧᐤ, ᒥᓇ ᐁ ᐃᓯ ᒪᐢᑲᐃᐧᓯᒪᑲᕽ ᐊᐧᓂᑎᐱᐢᑳᐤ.
[54] ᐁᑲᐧ ᒫᑲ ᑭ ᐅᑎᑎᓂᐠ, ᐁ ᑭ ᐃᑐᑕᐦᐃᑯᐟ ᒫᐊᐧᒋ ᑭᐦᒋ ᐊᔭᒥᐦᐁᐃᐧᔨᓂᐊᐧ ᐃᐧᑭᔨᕽ. ᐱᑕᕒ ᒫᑲ ᐋᐧᔭᐤ ᑭ ᐅᐦᒋ ᐱᒥᑎᓴᐃᑫᐤ.
[55] ᐃᐢᐱ ᒫᑲ ᑳ ᑯᑕᐁᐧᒋᐠ ᑖᐊᐧᔨᕽ ᐋᐧᐢᑳᐦᐃᑲᓂᕽ, ᒥᓇ ᑳ ᒫᒪᐃᐧ ᓇᐦᐊᐱᒋᐠ, ᐱᑕᕒ ᒣᑳᐧ ᐊᔨᕽ ᐃᐧᐢᑕ ᑭ ᓇᐦᐊᐱᐤ.
[56] ᐯᔭᐠ ᒫᑲ ᐅᐢᑭᓂᑭᐢᑫᐧᐊᐧ ᑭ ᐋᐧᐸᒥᐠ, ᒣᑳᐧ ᒋᑭ ᐃᐢᑯᑌᕽ ᐁ ᐊᐱᐟ, ᓱᑭ ᒫᑲ ᐁ ᑲᓇᐊᐧᐸᒥᑯᐟ, ᑭ ᐃᑌᐧᔨᐊᐧ, ᐊᐊᐧ ᓈᐯᐤ ᐃᐧᐢᑕ ᑭ ᐃᐧᒉᐁᐧᐤ.
[57] ᑭ ᐋᓀᐧᑕᑦ ᒫᑲ, ᐁ ᐃᑌᐧᐟ, ᐃᐢᑫᐧᐤ, ᓇᒪᐃᐧᔭ ᓂ ᑭᐢᑫᔨᒫᐤ.
[58] ᐁᑯᓯ ᓈᑫᐢ ᒥᓇ ᑯᑕᑲ ᑭ ᐊᐧᐸᒥᐠ, ᐁ ᑭ ᐃᑌᐧᔨᐟ, ᑭᐢᑕ ᐯᔭᐠ ᐅ ᐃᐧᒉᐋᐧᑲᓂᐋᐧᐊᐧ. ᒫᑲ ᐱᑕᕒ ᑭ ᐃᑌᐧᐤ, ᓈᐯᐤ, ᓇᒪᔦᐤ ᓂᔭ ᐯᔭᐠ.
[59] ᐁᑯᓯ ᓇᐣᑕᐤ ᐯᔭᐠ ᑎᐸᐃᑲᐣ ᑳ ᐃᐢᐸᔨᐠ, ᑯᑕᑲ ᑭ ᐃᑌᐧᔨᐊᐧ, ᐁ ᑫᒋᓇᐅᔨᐟ, ᑖᐯᐧ ᐊᐊᐧ ᓈᐯᐤ ᐃᐧᐢᑕ ᑭ ᐃᐧᒉᐁᐧᐤ; ᒋᑫᒪ ᑳᓬᐃᓬᐃᐃᐧᔨᓂᐃᐧᐤ.
[60] ᒫᑲ ᐱᑕᕒ ᑭ ᐃᑌᐧᐤ, ᓈᐯᐤ, ᓇᒪᐃᐧᔭ ᓂ ᑭᐢᑫᔨᑌᐣ ᐊᓂᒪ ᑳ ᐃᑌᐧᔭᐣ. ᓭᒫᐠ ᒫᑲ, ᒣᑳᐧᐨ ᐁ ᐱᑭᐢᑫᐧᐟ, ᐹᑲᐋᑳᐧᐣ ᑭ ᐯᐦᑖᑯᓯᐤ.
[61] ᐁᑯᓯ ᑳ ᑎᐯᔨᐦᒋᑫᐟ ᑭ ᑫᐧᐢᑭᐤ, ᐁ ᑭ ᑲᓇᐋᐧᐸᒫᐟ ᐱᑕᕒᐊ, ᐱᑕᕒ ᒫᑲ ᑭ ᑭᐢᑭᓱᐸᔨᐤ ᐅᐟ ᐃᑌᐧᐃᐧᓂᔨᐤ ᑳ ᑎᐯᔨᐦᒋᑫᔨᐟ, ᑳ ᑭ ᐃᑎᑯᐟ, ᒪᐧᔦᐢ ᐯᐦᑖᑯᓯᐟ ᐹᑲᐋᑳᐧᐣ ᐊᓄᐦᐨ ᑫ ᑭᓯᑳᐠ ᓂᐢᑖᐧᐤ ᑭ ᑲ ᐋᓀᐧᑌᐣ ᐁ ᑭᐢᑫᔨᒥᔭᐣ.
[62] ᐁᑯᓯ ᒫᑲ ᑭ ᐊᐧᔭᐃᐧᐤ, ᒥᐢᑕᐦᐃ ᐁ ᑭ ᐊᐧᐄᐧᓴᑲᑌᐧᒧᐟ.
[63] ᐊᓂᑭ ᓈᐯᐊᐧᐠ ᒫᑲ ᑳ ᒥᒋᒥᓈᒋᐠ ᒋᓴᓴ, ᑭ ᒣᑕᐋᐧᑲᑌᐊᐧᐠ ᒥᓇ ᑭ ᐸᐸᑲᒪᐁᐧᐊᐧᐠ.
[64] ᐃᐢᐱ ᒫᑲ ᑳ ᐊᑯᔮᐸᐱᑖᒋᐠ, ᑭ ᐸᓯᑫᐧᐁᐧᐊᐧᐠ ᐁ ᑭ ᑲᑫᐧᒋᒫᒋᐠ ᒫᑲ, ᐁ ᐃᑌᐧᒋᐠ, ᑭᐢᑭᐁᐧᐦᐃᑫ: ᐊᐁᐧᓇ ᑳ ᐸᑲᒪᐦᐅᐢᐠ:
[65] ᒥᓇ ᒥᐦᒉᐟ ᑯᑕᑲ ᑫᑲᐧᔭ ᑭ ᐊᔨᑌᐊᐧᐠ, ᐁ ᐸᐱᐃᐧᒫᒋᐠ.
[66] ᒪᔭᐤ ᒫᑲ ᐁ ᑭᓯᑳᔨᐠ, ᑳ ᓂᑳᓀᔨᑖᑯᓯᒋᐠ ᐊᔨᓯᔨᓂᐊᐧᐠ ᒫᒪᐃᐧ ᐊᓯᒋ ᑭᐦᒋ ᐊᔭᒥᐦᐁᐃᐧᔨᓂᐊᐧᐠ ᒥᓇ ᒪᓯᓇᐦᐃᑫᐃᐧᔨᓂᐊᐧᐠ ᑭ ᒫᐊᐧᒋᐃᑐᐊᐧᐠ; ᐁ ᑭ ᐃᑐᐦᑕᐋᒋᐠ ᒫᑲ ᐃᑕ ᐁ ᐃᓯ ᒪᒪᐊᐧᐱᒋᐠ ᐁ ᐃᑌᐧᒋᐠ,
[67] ᑭᐢᐱᐣ ᑭᔭ ᙭, ᐃᐧᐦᑕᒪᐃᐧᓈᐣ, ᒫᑲ ᑭ ᐃᑌᐤ, ᑭᐢᐱᐣ ᐋᑕ ᐃᐧᐦᑕᒪᑕᑯᐠ, ᓇᒪᐃᐧᔭ ᑭ ᑲ ᑖᐯᐧᑌᓈᐋᐧᐤ.
[68] ᐁᑯᓯ ᑭᐢᐱᐣ ᓂᐢᑕ ᑲᑫᐧᒋᒥᑕᑳᐧᐃᐧ, ᓇᒪᐃᐧᔭ ᑭ ᑲ ᓇᐢᑫᐧᐊᐧᓯᒥᓈᐋᐧ.
[69] ᒫᑲ ᐹᑎᒪ ᐃᔨᓂᐃᐧᑯᓯᓵᐣ ᑭᑕ ᐊᐱᐤ ᐃᑕ ᐁ ᐃᓯ ᐅᑭᒋᓂᐢᑭᐊᐧᕽ ᐅ ᒪᐢᑲᐃᐧᓯᐃᐧᐣ ᑭᓭᒪᓂᑐ.
[70] ᐁᑯᓯ ᑲᐦᑭᔭᐤ ᑭ ᐃᑌᐧᐊᐧᐠ, ᑭᔮ ᒋ ᒫᑲ ᑭᓭᒪᓂᑐ ᐅᑯᓯᓴ? ᑭ ᐃᑌᐤ ᒫᑲ, ᑭᐟ ᐃᑖᐧᓈᐋᐧᐤ ᓂᔭ ᐁᐊᐧᑯ.
[71] ᐁᑲᐧ ᑭ ᐃᑌᐧᐊᐧᐠ, ᑫᑲᐧᐩ ᐊᐊᐧᓯᒣ ᓀᑕᐁᐧᔨᑕᒪᕽ ᐋᒋᒧᐃᐧᐣ? ᒋᑫᒪ ᑭᔮᓇᐤ ᑫᐦᒋᐋᐧᐠ ᑭ ᑭ ᐯᑕᐋᐧᓇᐤ ᑎᐱᔭᐤ ᐅᑐᓂᕽ ᐅᐦᒋ.