[1] namōya kinwēs ē‑ispayik āsay mīna ayisiyiniwak kī‑pē-mihcētiwak. ē‑nōhtēpayicik mīciwin, Jesus kī‑tēpwātēw okiskinohamawākana, ē‑itāt,
[2] “hāw, nikitimākinawāwak ōki ayisiyiniwak, nisto kīsikāw ēkwa ē‑wīcēwicik, ēkwa namōya kīkway ayāwak kita-mīcicik.
[3] kīspin kīwētisahwakwāwi ēkāya asamakwāwi, kita-nōhtēsinwak, ayisk ātiht wāhyaw ohtohtēwak.”
[4] okiskinohamawākana itwēyiwa, “pakwacāyihk ōma kā‑ayāyahk; tānitē ka‑kī-ohci-kāhcitināyahk pahkwēsikan kita-asamāyāhkok ōki ayisiyiniwak?”
[5] “tānitahto pahkwēsikanak ē‑ayāwāyēkok?” Jesus itēw. “tēpakohp,” itik.
[6] ē‑sīhkimāt ayisiyiniwa kita-apiyit mostāhcahk, kī‑otinēw anihi pahkwēsikana ēkwa ē‑kī-nanāskomot, kī‑pahkwēnēw ēkwa kī‑miyēw okiskinohamawākana kita-mātinamawāyit ayisiyiniwa. ēkosi tāpwē tōtamiyiwa.
[7] ātiht kinosēsisa mīna kī‑ayāwēwak. ēwakoni ohci kī‑nanāskomow ēkwa kī‑miyēw okiskinohamawākana kita-mēkiyit.
[8] kahkiyaw kī‑tēpiskōyowak ēsa. ēkwa iskwascikana kī‑māwasakonamwak ōki kiskinohamawākanak, tēpakohp wīhkopīwata iyikohk kī‑sākaskinahtāwak.
[9] nānitaw nēwāw kihci-mitātahtomitanaw (4000) kī‑ihtasiwak ayisiyiniwak. ēkwa Jesus kī‑kīwētisahwēw ayisiyiniwa.
[10] ēkwa sēmāk kī‑ati-pōsiwak ōsihk Jesus ēkwa okiskinohamawākana, ēkwa isicimēwak ēsa Dalmanutha askīhk.
[11] Phariseewa ēsa pē‑nātik Jesus ēkwa ē‑māyēyimikot. ē‑kakwē-kocihikot, ē‑itikot, “mahti mamāhtāwi-kīkway tōta kita-wāpahtihiyāhk kisē-manitow ē‑kī-pē-isitisahosk.”
[12] māka Jesus ē‑mahkatātahk ōmisi itēw, “tānēhki anohc ayisiyiniwak kā‑natonahkik mamāhtāwisiwin? kikēhcināmitināwāw, namwāc ōki anohc ayisiyiniwak kita-wāpahtihikowisiwak mamāhtāwisiwin.”
[13] ēkwa ati-nakatēw, ē‑ati-pōsit ōsihk, kī‑āsowahamwak.
[14] kiskinohamawākanak ēsa kā‑wanikiskisicik kita-nīmācik pahkwēsikana; māka pēyak ēsa kī‑ayāwēwak ōsihk.
[15] “aswēyihtamok” itēw Jesus, “ōki Phariseewak otōhpihcikaniwāw ēkwa mīna Herod otōhpihcikan.”
[16] kī‑āyimōtamātowak ēkosi ē‑itwēcik, “ōmisi ē‑itwēt osām namōya pahkwēsikan kitayāwānaw.”
[17] ēkwa Jesus ē‑mōyēyihtahk ē‑itwēyit itēw, “tānēhki kā‑itwēyēk ēkāya pahkwēsikan ē‑ayāwāyēk? ēkāya cī cēskwa ē‑nisitohtamēk? ēkāya cī ē‑nōhtē-tāpwēwakēyihtamēk? kisasīpihtēnāwāw.
[18] ē‑oskīsikoyēk, namwāc cī kiwāpahtēnāwāw? ēkwa ē‑ohtawakāyēk, namwāc cī kipēhtēnāwāw? kiwanikiskisināwāw cī?
[19] ispīhk kā‑pahkwēnamawakik niyānan pahkwēsikana, niyānanwāw kihci-mitātahtomitanaw (5000) ayisiyiniwak, tānitahto wīhkopīwata kā‑sākaskinahtāyēk iskwascikana?” “nīsosāp,” itēwak ēsa.
[20] “ēkwa tēpakohp pahkwēsikanak kā‑pahkwēnamawakik nēwāw kihci-mitātahtomitanaw (4000) ayisiyiniwak, tānitahto wīhkopīwata kā‑sākaskinahtāyēk kā‑ayiwākipayicik?” “tēpakohp,” itwēyiwa ēsa.
[21] ēkwa itēw, “kēyāpic cī namōya ē‑nisitohtamēk?”
[22] ēkwa kī‑takohtēwak Bethsaida ōcēnāsihk, ēkotē ē‑takosihkik ātiht ayisiyiniwa pēsiwēyiwa nāpēwa ēkāya ē‑wāpiyit, ē‑pakosēyimācik Jesusa kita-sāmināyit.
[23] ēkwa Jesus ē‑sakiniskēnāt ohpimē kī‑itohtahēw ōcēnāsihk ohci. ēkwa ē‑kī-sinikonamwāt oskīsikoyiwa osihkowin ohci ēkwa ē‑miciminamwāt oskīsikoyihk, itēw, “kiwāpahtēn cī kīkway?”
[24] ēkwa ana nāpēw ē‑ohpiskwēyit, ē‑nanātawāpit itwēw, “niwāpamāwak ayisiyiniwak, māka tāpiskōc mistikwak ē‑papāmohtēcik.”
[25] āsay mīna kīhtwām sāminamwēw oskīsikoyiwa anihi nāpēwa. ana nāpēw kwayask kī‑kakwē-wāpiw, kwayask ēkwa nahāpiw.
[26] Jesus ēkwa kīwētisahwēw, ē‑kitahamawāt ōmisi itēw, “ēkāya itohtē ōcēnāsihk.”
[27] ēkwa Jesus asici okiskinohamawākana kī‑itohtēwak ōtēnawa kā‑ayāki cīki Caesarea Philippi kihci-ōtēnāhk. ē‑mēkwā-pimohtēhocik kakwēcimēw okiskinohamawākana, “awīniwa ōma niya ē‑itwēcik ayisiyiniwak māna kā‑ācimicik?”
[28] ēkosi wīhtamawēwak, “kiya John osīkahāhtākēw, itwēwak ātiht; ēkwa ātiht, Elijah; kotakak itwēwak nikotwāw pēyak okiskiwēhikēwak,” itik ēsa.
[29] ēkwa ōmisi itēw, “kiyawāw māka, tānisi ē‑itwēyēk?” Peter itēw, “kiya ōma kisē-manitow onawasōnākana.”
[30] ēkwa ēsa kā‑kitahamawāt ēkāya awiya kita-wīhtamawāyit.
[31] ēkosi ēkwa Jesus kī‑kiskinohamawēw okiskinohamawākana ē‑itāt, “ayisiyinīwikosisān mistahi kika-kakwātakihtāw ēkwa kisēyiniwak kā‑nīkānīcik ka‑ātawēyimēwak, mīna kihci-ayamihēwiyiniwak, mīna kā‑kiskinohamākēcik wiyasiwēwin. kita-nipahāw, māka nisto kīsikāw kī‑ispayiki kita-āpisisin.”
[32] kwayask nisitohtamōhēw ēsa. ēkosi Peter ohpimē itohtahēw ē‑māci-kisīkitotāt.
[33] māka Jesus ē‑kwēskikāpawit kitāpamēw okiskinohamawākana, kīkāmēw Petera, “awas, Satan! namōya omāmitonēyihcikan kisē-manitow kā‑pimitisahaman, māka ayisiyiniwak kā‑isi-māmitonēyihtahkik ēwako kipimitisahēn.”
[34] ēkwa Jesus tēpwātēw ayisiyiniwa mīna okiskinohamawākana ē‑wīhtamawāt, “hāw, kīspin awiyak ninōhtē-wīcēk, piko kita-pakitinahk ē‑isi-nitawēyihtahk kīkway ēkwa ē‑isi-akāwātahk kīkway, ēkwa kita-nayahtahk opimitāskwahikan ēkwa kita-pimitisahot.
[35] awiyak ē‑nōhtē-pimācihtāt opimātisiwin kita-wanihtāw; māka awiyak ē‑wanihtāt opimātisiwin niya ohci mīna nimiywācimowin ohci kita-ayāw tāpwē pimātisiwin.
[36] tānisi ē‑itāpacihikot ayisiyiniw kahkiyaw kīkway kita-kaskihtamāsot ēkwa kita-wanihtāt opimātisiwin?
[37] namōya nānitaw kāwi kita-kī-isi-kaskihtamāsow opimātisiwin.
[38] kīspin awiyak ninēpēwihāw, ēkwa mīna nikiskinohamākēwin ohci, mēkwāc ōta askīhk kā‑macātisihk ēkwa namōya awiyak kā‑manitowātisit, ēkosi ayisiyinīwikosisān kika-nēpēwihikow anihi ispī pē‑takohtēci ohtāwiya okistēyihtākosiwiniyihk, asici kā‑kihcihtwāwisiyit okīsikowa.”