[1] ēkwa ēkota ohci Jesus kī‑sipwēhtēw ē‑ati-itohtēt Judea askīhk, ēkwa ē‑ati-āsowahahk Jordan sīpiy. mihcēt ayisiyiniwa kīhtwām kī‑pē-wāsakāmēskākow ēkwa kī‑kiskinohamawēw kā‑tōtahk māna.
[2] ātiht Phariseewa kī‑pē-kakwē-kocihik mahti tānisi kita-itwēt, ē‑itikot, “mahti wīhtamawinān: itastēw cī nāpēw kita-kī-wēpināt owīkimākana?”
[3] Jesus ōmisi itēw, “tānisi kā‑kī-itikoyēk Moses owiyasiwēwinihk?”
[4] ōmisi itik ēsa, “Moses kī‑itasowēw nāpēw ē‑wī-wēpināt owīkimākana piko nīkān kita-masinahahk wēpinito-masinahikan.”
[5] “Moses kī‑masinaham ōma osām ē‑āyimisiyēk ohci ēkāya ē‑wī-nisitohtamēk.
[6] nistam ohci ē‑osīhcikātēk ōma askiy, ‘kisē-manitow kī‑osīhēw nāpēwa mīna iskwēwa,’
[7] ‘ēwako ohci nāpēw kita-nakatēw ohtāwiya mīna okāwiya ēkwa kita-wīcēwāt owīkimākana,
[8] ēkosi tāpiskōc pēyak ayisiyiniw kita-isi-wīcēhtowak,’ namōya ē‑nīsicik, māka ē‑pēyakocik.
[9] ēkosi namōya awiyak kita-kī-paskēnēw anihi kisē-manitow kā‑kī-wīcēhtahāt.”
[10] ēkwa ispīhk ē‑pīhtikwēcik wāskāhikanihk, okiskinohamawākana kakwēcimik ōma kā‑itwēt ohci.
[11] ēkwa itēw ēsa, “awiyak ē‑wēpināt owīkimākana ēkwa kotaka iskwēwa ē‑kihci-wīkimāt māyi-tōtawēw owīkimākana.
[12] ēkwa kīspin ana iskwēw wēpinēw onāpēma ēkwa kotaka nāpēwa kihci-wīkimēw, māyi-tōtawēw onāpēma.”
[13] ēkwa ēsa ayisiyiniwak pēsiwēwak awāsisa kita-sawēyimāt Jesus; ēkwa ōki kiskinohamawākanak ēsa kitahamawēwak.
[14] māka Jesus ē‑wāpamāt ōma ē‑tōtamiyit okiskinohamawākana, kī‑kisiwāhik ēkwa itēw ēsa, “ēkāya kitahamāhkok awāsisak, nika-pē-nātikwak, ayisk otipēyihcikēwinihk kisē-manitow ayāwak ayisiyiniwak tāpiskōc awāsisak ē‑itātisicik.
[15] kikēhcināmitināwāw, awiyak ēkāya ē‑pakitinisot otipēyihcikēwiniyihk kisē-manitowa tāpiskōc awāsis namōya ēkota kita-pīhtikwēw.”
[16] ēkwa ēsa ākwaskitinēw awāsisa ēkwa sawēyimēw ē‑sāmināt oscikwānisiyihk.
[17] mēkwāc ē‑ati-sipwēhtēt Jesus, pēyak nāpēw takopahtāw, ē‑ocihcihkwanapīstākot ēkwa ōmisi itik, “okiskinohamākēw kā‑miyohtwāyan, tānisi ka‑kī-tōtamān kita-pimātisiyān kākikē?”
[18] “tānēhki kā‑isiyan ‘kā‑miyohtwāyan’?” itēw Jesus. “pēyakow piko ē‑miyohtwāt, ēwako kisē-manitow.
[19] kikiskēyihtēn wiyasiwēwina: ēkāya nipahtākē, ēkāya nōcihkamākē, ēkāya kimotamaw awiyak. ēkāya kiyāskīwācim awiyak. ēkāya kakayēyisi. kistēyimik kohtāwiy mīna kikāwiy.”
[20] ēkwa ōmisi itik, “okiskinohamākēw, kahkiyaw ōhi ē‑kī-pē-pimitisahamān aspin ohci ē‑oskāyiwiyān.”
[21] ēkwa Jesus kitāpamēw ōhi ē‑sākihāt, ēkwa itēw, “pēyak piko kīkway kita-kī-tōtaman. nitawi-atāwākē kahkiyaw kīkway kā‑ayāyan, ēkwa ana sōniyāw miyik okitimākisiwak. ēkosi kika-wēyōtisin kihci-kīsikohk, ēkwa pē‑pimitisahon.”
[22] ana nāpēw ōma ē‑pēhtawāt ē‑itwēyit, mitoni ē‑pōmēt, ati-sipwēhtēw ē‑mihtātahk, ayisk mitoni ē‑wēyōtisit ēsa.
[23] Jesus nanātawāpiw ēkwa okiskinohamawākana itēw, “tāpwē āyiman aniki kā‑wēyōtisicik kita-pīhtikwēcik kisē-manitow otipēyihcikēwinihk!”
[24] ēkwa okiskinohamawākana ēsa māmaskātamwak ōma kā‑itwēt. māka Jesus ōmisi itēw, “awāsisitik! mitoni āyiman kita-pīhtikwēhk otipēyihcikēwinihk kisē-manitow!
[25] nawac wēhcasiniyiw piskwākanēwatim kita-sāposkahk ita kā‑tāpisahikātēk sāponikan, ispīhci owēyōtisiw kita-pīhtikwēt otipēyihcikēwinihk kisē-manitow.”
[26] mitoni ēsa māmaskācihtawēwak ōki ē‑itwēcik, “awīna māka ka‑kī-pimācihiht?”
[27] Jesus ē‑kitāpamāt itēw, “namōya ayisiyiniw kita-kī-pimācihisow; kisē-manitow kaskihtāw kita-tōtahk, ayisk kaskihtāw kahkiyaw kīkway.”
[28] Peter ē‑naskwēwasimāt, “cēskwa, kahkiyaw kīkway ōma ē‑nakatamāhk kita-pimitisahotāhk,” itēw.
[29] “kikēhcināmitināwāw, awiyak ē‑nakatahk wīkihk, ahpō wīcisāna ahpō okāwiya ahpō ohtāwiya ahpō otawāsimisa ahpō okistikēw-askiya niya ohci ēkwa asici miywācimowin ohci,
[30] kita-miyāw ōta askīhk mitātahtomitanaw tahtwāw ayiwāk anima kā‑nakatahk ohci, ēkwa mīna āhci piko kita-kitimahiht. ēkwa ōtē nīkān kākikē-pimātisiwin kita-miyāw.
[31] māka mihcēt kā‑nīkānakisocik mēkwāc, iskwēyānihk kita-akisowak, ēkwa aniki iskwēyānihk kā‑itakisocik kita-nīkānakisowak.”
[32] ēkwa ē‑ati-pimohtēhocik Jerusalemihk isi, Jesus kī‑nīkānohtēw; ēkwa ēsa kiskinohamawākanak koskwēyimēwak ēkwa mīna aniki kā‑pimitisahikēcik sēkisiwak. ēkwa pitamā ohpimē ē‑itohtahāt kīhtwām nīsosāp okiskinohamawākana kī‑wīhtamawēw tānisi ē‑wī-ispayihikot.
[33] ē‑itāt ēsa, “ē‑wī-itohtēyahk ōma Jerusalemihk, itē aniki kihci-ayamihēwiyiniwak ēkwa aniki kā‑kiskinohamākēcik wiyasiwēwin kā‑wī-āsōwi-miyihcik ayisiyinīwikosisāna; kita-wiyasiwātikot kita-nipahiht, ēkwa kita-āsōnamawācik pītosiyiniwa.
[34] ēkwa kita-pīwēyimēwak mīna kita-sihkwātēwak ēkwa kita-pasastēhwēwak, ēkwa kita-nipahēwak, māka nisto kīsikāw kī‑ispayiki kita-āpisisin.”
[35] ēkwa James mīna John, okosisa Zebedee, kī‑kakwēcimēwak Jesusa ē‑itwēcik, “okiskinohamākēw, kipakosēyimitinān pēyak kīkway kita-tōtamawiyāhk.”
[36] “kīkwāy māka?” itēw Jesus.
[37] ōmisi itēwak, “ispīhk kihci-okimāwiyani kikistēyi-tipēyihcikēwinihk, kipakosēyimitinān kita-pakitinamawiyāhk kita-apiyāhk cīki kitokimāwi-apiwinihk, pēyak kikihciniskihk ēkwa kotak kinamahtinihk.”
[38] “namōya kikiskēyihtēnāwāw kīkwāy kā‑natotamawiyēk. kika-kī-kaskihtānāwāw cī kita-minihkwēyēk niminihkwākanihk ohci kakwātakihtāwinihk ta‑minihkwēyān? kika-kaskihtānāwāw cī kita-kī-sīkahāhtākawiyēk kā‑wī-isi-sīkahāhtākawiyān?” itēw ēsa Jesus.
[39] “nika-kaskihtānān,” itik. Jesus ōmisi itēw ēsa, “tāpwē kika-minihkwānāwāw anima kā‑wī-minihkwēyān, ēkwa kika-sīkahāhtākawināwāw anima kā‑wī-isi-sīkahāhtākawiyān,
[40] māka namōya niya nitipēyihtēn kita-nawasōnak awiyak kita-apit nikihciniskihk ahpō ninamahtinihk. ōhi apiwina kita-miyāwak aniki kā‑kwayācihtamākocik kisē-manitowa,” itēw Jesus.
[41] ispīhk māka ē‑pēhtahkik ōma ōki mitātaht kiskinohamawākanak, mitoni ēsa kisiwāhikwak Jamesa mīna Johna.
[42] ēkwa Jesus natomēw kahkiyaw ōmisi ē‑itāt, “hāw, kikiskēyihtēnāwāw pītosiyinīnāhk aniki kā‑nīkānēyihtākosicik tōtawēwak ē‑itēyihtahkik otiyinīmiwāwa, ēkwa aniki kihci-onīkānīwak kahkiyaw awiya tipēyimēwak.
[43] māka kiyawāw namōya ēkosi kita-kī-ispayiw; awiyak ē‑nōhtē-nīkānakisot, ēwako ana ē‑atoskākoyēk.
[44] ēkwa awiyak ē‑nōhtē-okimāwit, ēwako ana ē‑māwaci-atoskēyākaniwit kahkiyaw awiya ohci.
[45] ahpō piko ayisiyinīwikosisān namōya ōta ohci-pē-itohtēw kita-pamihiht, māka kita-pamihtāsot; ēkwa kita-mēkit opimātisiwin kita-ohci-tipahikēstamawāt mihcēt ayisiyiniwa.”
[46] Jericho ōtēnaw kī‑takohtēwak ēsa, ēkwa ē‑wī-ati-sipwēhtēcik ēkota ohci Jesus asici okiskinohamawākana ēkwa mihcēt ayisiyiniwa, pēyak nāpēw ēkāya ē‑wāpit sisonē mēskanāhk kī‑apiw ē‑pakosihtāt. Bartimaeus itāw ēsa, Timaeus okosisa.
[47] ē‑pēhtahk ēkota ē‑pimohtēyit Jesusa Nazarethihk kā‑ohcīt, kī‑māci-tēpwātēw ē‑itwēt, “Jesus, okosisa David, kitimākinawin!”
[48] mihcēt ayisiyiniwa kisīkitotik ē‑itikot kita-pōnwēwitahk. māka āhci piko ayiwāk tēpwātēw ē‑itwēt, “okosisa David, kitimākinawin!”
[49] ē‑nakīt Jesus itwēw, “natomihk!” ēkosi tēpwātēwak ēsa anihi ēkāya kā‑wāpiyit nāpēwa. “miywēyihta, pasikō, kinatomik ana,” itēwak ēsa.
[50] ēkwa ē‑kētasākēpitisot kī‑pasikōpahtāw ē‑nātāt Jesusa.
[51] ōmisi itēw Jesus, “kīkwāy ē‑nitawēyihtaman kita-tōtamātān?” ana ēkāya kā‑wāpit itēw, “okiskinohamākēw, mahti nika-wāpin.”
[52] ēkwa Jesus itēw ēsa, “niyā, ati-sipwēhtē, kitāpwēwakēyihtamowin kimiywāyāhikon.” ēkwa sēmāk ēsa wāpiw, ēkwa ati-pimitisahwēw Jesusa.