[1] Учюнджи кунюне Давут ве адамлары Цикълагъгъа кеттилер. Амалеклилер исе Негевни ве Цикълагъны дарма-дагъын эткен эдилер. Цикълагъгъа уджюм этип, оны атешнен якъкъан эдилер,
[2] апайларны ве эписи шеэрдекилерни – кучюги олсун, буюги олсун – эсир эткен, ич бир адамны ольдюрмеген, лякин оларны къувалап, озь ёлуна кеткен эдилер.
[3] Давут адамларынен берабер шеэрге кельдилер. Бакъса, не корьсюнлер? Шеэр якъылгъан, апайлары, огъуллары ве къызлары эсирге тюшкен эдилер.
[4] Давут ве адамлары яйгъара котерип, агълап башладылар, кучю къалмагъандже агъладылар.
[5] Давутнынъ эки апайы да: йизреэлли Ахиноам ве Навалнынъ сабыкъ къадыны къармелли Авигаил эсирге тюшкен эдилер.
[6] Давут буюк бир хавф алтына тюшти, чюнки халкъ оны ташларнен ольдюреджек олды. Эр бир киши огъуллары ве къызлары ичюн джандан къасеветленди.
[7] Давут РАББИден, Алласындан кучь алып, Ахимелех огълу Авиатаргъа: – Манъа эфодны кетир, – деди. Авиатар эфодны Давуткъа кетирди.
[8] Давут, РАББИге мураджаат этип: – Бу айдутлар сюрюси пешинден къувалайыммы? Оларны къувып етеримми? – деп сорады. РАББИ онъа: – Къувала. Мытлакъа оларгъа етип олурсынъ ве эписини къуртарырсынъ, – деди.
[9] Давут ве 600 адамы кетип, Бесор дересине кельдилер. Адамларнынъ бир къысмы анда токътады,
[10] Давут ве 400 адамы исе къуваламагъа девам эттилер. Къалгъан 200 адам къалды. Олар ойле болдургъан эдилер ки, атта Бесор дересини кечмеге аллары къалмагъан эди.
[11] Бир мысырлыны тарлада тутып, Давутнынъ огюне кетирдилер, онъа отьмек ве сув бердилер, ве о, ашады.
[12] Даа онъа басылгъан инджир парчасыны ве эки багъ къуругъан юзюм бердилер, ве о, ашап такъатланды. О, учь кунь ве учь гедже ашамагъан-ичмеген экен.
[13] Давут ондан: – Сенинъ саибинъ ким? Къайдансынъ? – деп сорады. О: – Мен – мысырлы яшым, бир амалеклининъ къулу олам. Учь куньден берли хаста олгъаным ичюн, саибим мени ташлап кетти.
[14] Биз керетлилернинъ Негевини, Ехуда топрагъыны ве Къалевнинъ Негевини дарма-дагъын эттик. Цикълагъны исе якътыкъ, – деди.
[15] Давут ондан: – Сен мени шу айдутлар сюрюсине алып барарсынъмы? – деп сорады. О исе: – Алланынъ Адынен мени ольдюрмейджегинъе ве эфендимнинъ къолуна теслим этмейджегинъе ант эт. Сонъ сени шу айдутлар сюрюсине алып барарым, – деди.
[16] Мысырлы Давутны алып баргъан сонъ, иште, амалеклилер бутюн улькеге даркъалып, Фелестин ве Ехуда ерлеринде чокъ мульк тутып алгъанларына къуванып ашай-иче ве байрам эте эдилер.
[17] Давут оларны акъшам устюнден башлап экинджи кунюнинъ акъшамынадже урды, девелерге отурып къачкъан 400 йигиттен гъайры, кимсе къуртарылып оламады.
[18] Амалеклилернинъ бутюн тутып алгъан шейини кери тартып алды, эки апайыны да къуртарды.
[19] Оларнынъ не буюк шейинден, не уфакъ шейинден бириси, не огъуллары, не къызлары ёкъ олмады, амалеклилер тутып алгъан бутюн шейлерден бириси ёкъ олмады, – Давут эр шейни къайтарды.
[20] Давут даа амалеклилернинъ эписи туварларыны ве къой-эчкилерини алды. Оларны озьлерининъ сюрюлери алдында айдап, адамлары: – Бу Давутнынъ енъиш пайы, – дедилер.
[21] Болдурып, Давутнынъ пешинден барып оламагъан ве Бесор дереси янында къалдырылгъан 200 адамларынынъ янына кельгенде, олар онынъ ве адамларынынъ къаршысына чыкътылар. Давут оларгъа якъынлашып, оларнен селямлашты.
[22] Сонъ Давутнен кеткен бир къач яман ве бир шейге ярамайджакъ адамлар: – Олар бизнен берабер кетмегенлери ичюн, айды, оларгъа авдан бир шей бермейик, тек озьлерининъ къадын ве балаларыны алсынлар да кетсинлер, – дедилер.
[23] Лякин Давут: – Агъаларым, РАББИ бизге берген шейлерге бойле япманъыз. О, бизни къорчалады ве бизге уджюм эткен айдутлар сюрюсини къолумызгъа теслим этти.
[24] Бу иште сизнен ким разы оладжакъ? Дженкке кеткенлернинъ пайы не къадар олса, арабаларда къалгъанларнынъ пайы да шу къадар олмакъ керек. Эпинъизге пайлаштырмакъ керек, – деди.
[25] Шу вакъыттан сонъ, ойле де олып къалды. Шу чыкъарылгъан къарар шимдиге къадар Исраильде къанун олып къалды.
[26] Давут Цикълагъгъа кельди ве онынъ достлары олгъан Ехуда акъсакъалларына мулькнинъ бир къысмыны йиберип: – Мына сизге РАББИнинъ душманларындан тартып алынгъан мульктен бахшыш, – деди.
[27] Давут бахшышларны Бет-Эльде, Рамот-Негевде, Яттирде,
[28] Ароэрде, Сифмотта, Эштемоада,
[29] Ракъалда, ерахмеэллилернинъ ве кенлилернинъ шеэрлеринде,
[30] Хормада, Бор-Ашанда, Атакъта,
[31] Хевронда ве Давут ве адамлары юрген бутюн ерлерде олгъан акъсакъалларгъа ёллады.