[1] Бир кунь аммонлы Нахаш кельди ве Явеш-Гилад шеэрини алкъагъа сарды. Явешнинъ эписи сакинлери Нахашкъа: – Бизнен бирлеш, биз санъа хызмет этермиз, – дедилер.
[2] Аммонлы Нахаш исе: – Мен сизлернен бирлеширим, лякин меним бир шартым бар: бутюн Исраильни масхара этмек ичюн, эр биринъизнинъ онъ козюни чыкъарып алырым, – деди.
[3] Явеш акъсакъаллары: – Бизге еди кунь бер, бутюн Исраильге эльчи ёллайджакъмыз. Эгер кимсе келип, бизни къуртармаса, биз санъа теслим олурмыз, – дедилер.
[4] Эльчилер Шаул яшагъан Гивагъа келип, халкъкъа эр шейни айтып бердилер. Бутюн халкъ яйгъара котерип агълады.
[5] Шаул туварларыны айдап, тарладан кельди ве: – Халкъкъа не олды? Не ичюн агълай? – деп сорады. Онъа Явеш халкъынынъ сёзлерини айтып бердилер.
[6] Бу сёзлерни эшиткенде, Шаулгъа Алланынъ Руху энди, ве о, пек ачувланды.
[7] Эки туварны алып парчалады ве бутюн Исраиль сынъырларына эльчилерни ёллап, Шаул ве Смаилнен берабер кетмегенлернинъ туварларынен тыпкъы бойле оладжагъыны беян этти. РАББИ халкъны къоркъунен сарды, ве олар эписи бирлешип чыкътылар.
[8] Шаул Безекте Исраиль огъулларынынъ 300,000 ве Ехуда акъайларынынъ 30,000 кишисини топлады.
[9] Кельген эльчилерге: – Явеш-гиладлыларгъа бойле айтынъыз: «Ярын кунеш къыздыргъанда, биз сизни къуртараджакъмыз», – деди. Эльчилер къайтып, Явеш халкъына буны айткъан сонъ, олар пек къувандылар.
[10] Явеш халкъы Нахашкъа: – Ярын сизге теслим оладжакъмыз, бизнен не истесенъиз, оны япынъыз, – дедилер.
[11] Эртеси куню Шаул халкъны учь болюкке больди, олар кунь догъмаздан эвель ордунынъ ичине сокъулдылар ве аммонлыларны кунеш къыздыргъандже ольдюрдилер. Сагъ къалгъанлар даркъатылды, олар тек бирер-бирер къалды.
[12] Бундан сонъ халкъ Смаилге: – «Шаулмы бизге падишалыкъ япаджакъ?» – дегенлер къайда? Оларны бизге беринъиз, ольдюрейик, – деди.
[13] Лякин Шаул: – Бугунь кимсени ольдюрмеге олмаз, чюнки бугунь РАББИ Исраильни къуртарды, – деди.
[14] Смаил халкъкъа: – Гилгалгъа кетейик ве падишалыкъны янъыдан къурайыкъ, – деди.
[15] Халкъ Гилгалгъа кетип, Шаулны РАББИнинъ огюнде Гилгалда падиша яптылар ве анда РАББИге аманлыкъ къурбанларыны чалдылар. Шаул ве бутюн Исраиль анда пек шенъленди.