[1] Dugu murutilen nɔgɔlen min bɛ mɔgɔw tɔorɔ, bɔnɛ bɛ o ye.
[2] Sabu a ma welekan si lamɛn. A ma sɔn ka lasɔmili kuma lamɛn. A ma sɔn k'a jigi da Matigi kan, a ma sɔn ka gɛrɛ a ka Ala la.
[3] O dugu kɔnɔ kuntigiw bɛ i ko warabaw konbotɔ. A kiritigɛlaw bɛ i ko suruku jeni minw tɛ sɔn ka fɛn bila u ɲɛ sɔgɔma da kama.
[4] A kiraw ye kuncɛbaw ni lafilibaaw de ye. A sarakalasebaaw bɛ yɔrɔ senumaw nɔgɔ ka sariya tiɲɛn.
[5] Matigi tilennen sigilen bɛ a kɔnɔ. Tilenbaliya si tɛ ale la. A bɛ a ka kɛwalew ni a ka tilennenya jira kɛnɛ kan sɔgɔma o sɔgɔma. A tɛ dɛsɛ o la. Nka halio, mɔgɔ tilenbali tɛ maloya dɔn.
[6] Matigi ko: «Ne ye siyaw halaki ka u ban ka u ka sankanso janw tiɲɛn. Ne ye u ka dugu bɔlɔnw lankolonya. Mɔgɔ si tɛ tɛmɛn u fɛ tun. U ka duguw cira ka kɛ tomon ye, fo mɔgɔ si tɛ sigi u kɔnɔ tun.
[7] Ne y'a fɔ ne yɛrɛ ye ko: ‹Ni Jerusalɛmkaw tun bɛ sɔn ka siran ne ɲɛ ka lasɔmili kuma lamɛn, u sigi yɔrɔ tun tɛna ci, ne tun ye kuma minw fɔ u kama, olu tun tɛna u sɔrɔ. Nka u bɛ tɛliya ka kɛwale juguw kɛ.›»
[8] O de kosɔn Matigi ko: «A' ye ne makɔnɔ. Aw k'a dɔn ko don bɛ na, ne na wuli ka kiri tigɛ. K'a masɔrɔ ne y'a latigɛ ko ne bɛ siyaw ni masayaw lajɛ yɔrɔ kelen na. Ne dusu bɔlenba na ne ka dimiya bi u kan. Ne ka dimiya tasuma na dugukolo bɛe jeni.
[9] «O tuma la ne na dawolo saniyalenw di siyaw ma walisa u bɛe ka Matigi tɔgɔ wele ka baara kɛ a ye ni dusu kelen ye.
[10] Ne batobaaw ni ne ka mɔgɔ minw jɛnsɛnnen bɛ Etiopi ba kɔ fɛ, olu bɛe na bonyali fɛnw di ne ma.
[11] O don na, Israɛl, i tɛna maloya ka i jalaki ne ta fan fɛ. Mɔgɔ minw bɛ ɲagali ni kuncɛbaya ye, ne na olu labɔ i cɛma. I tɛna to ka kuncɛbaya kɛ ne ka kulu senuma kan tun.
[12] Mɔgɔ majiginlen barikantan minw bɛ u jigi da Matigi kan, ne na olu to i cɛma.
[13] Israɛl bɔnsɔn tɔ tolenw tɛna tilenbaliya kɛ tun. U tɛna nkalon tigɛ, lafilili kuma si tɛna bɔ u da la. Nka u na dumuni kɛ ka u lafiya, mɔgɔ si tɛna u lasiran tun.»
[14] Sion dugu, i ka ɲagalikan bɔ. Israɛl, i ka nisɔndiyakan bɔ. Jerusalɛm, i ka ɲagali ka nisɔndiya ni i dusukun bɛe ye.
[15] Matigi tun ye kiri ko min fɔ i kama, a ye o dabila. A ye i juguw mabɔ i la. Israɛl, i ka Masakɛ, Matigi yɛrɛ bɛ i cɛma. I tɛna bɔnɛ si ye tun.
[16] O don na, a n'a fɔ Jerusalɛm ma ko: «Sion dugu, i kana siran, i bolow barika kana ban.
[17] Matigi, i ka Ala bɛ i cɛma, i Kisibaa barikama don. A nisɔndiyalen na sewa i kosɔn, a na a makun i kanuyaba kosɔn. A na ɲagali ka dɔnkili da i ko la.
[18] Mɔgɔ minw ɲɛnasisilen don, ni u ma se ka jama lajɛ senuma kɛ, ne na olu lajɛ yɔrɔ kelen na. U bɔra i la, mafiɲɛyali kolo tun ka girin u kan kosɛbɛ.
[19] O tuma la ne na aw tɔorɔbaw bɛe tɔorɔ. Ne na sen kelenw kɛnɛya. Mɔgɔ minw gɛnna, ne na olu lasegin. Ne ka mɔgɔw maloyara jamana minw bɛe la, ne n'a to u ka tanuli ni bonyali sɔrɔ olu la.
[20] O tuma la ne na aw lajɛ yɔrɔ kelen na, ka na ni aw ye aw ka so. Ni ne ye aw la mɔgɔ minɛlenw kɔsegin aw yɛrɛw ɲɛ na tuma min na, ne n'a to aw ka bonyaba ni tanuli sɔrɔ dugukolo kan siyaw bɛe cɛma.» Matigi ko ten.