[1] Masakɛ Darius ka masaya san filanan kalo wɔorɔnan tile fɔlɔ don, Matigi kumana kira Agize da la k'a lase Juda jamana kuntigi Zorobabɛl ma, o ye Sealtiɛl denkɛ ye, ani sarakalasebaa Josue ma, o ye Jozadak denkɛ ye.
[2] Kɛlɛbolow Matigi ko: «Nin mɔgɔw b'a fɔ ko Matigi batosoba jɔ tuma ma se fɔlɔ.»
[3] O de kosɔn Matigi kumana a ka baaraden kira Agize da la ko:
[4] «Aw ɲɛ na, a bɛnnen bɛ aw ka sigi aw yɛrɛw ka sow bililen kɔnɔ k'a sɔrɔ Matigi batosoba bilen don wa?»
[5] Ayiwa Kɛlɛbolow Matigi ko: «Aw ye sira min minɛ, aw ka miiri o la kosɛbɛ.
[6] Aw ye danni si caman dan, aw ma suman bɛrɛ sɔrɔ. Aw bɛ dumuni kɛ, nka o tɛ aw fa. Aw bɛ minni kɛ, nka o tɛ aw ka minnɔgɔ ban. Fini bɛ aw kan na, nka o tɛ aw ka nɛnɛ ban. Aw la mɔgɔ min bɛ baara kɛ ka wari sɔrɔ, o tigi bɛ o wari bila bɔrɛ sɔgɔlen kɔnɔ.»
[7] Kɛlɛbolow Matigi ko: «Aw ye sira min minɛ, aw ka miiri o la kosɛbɛ.
[8] Aw ka yɛlɛn kulu kan ka na ni jiriw ye ka batoli so jɔ. O na diya ne ye, ne na bonya sɔrɔ.» Matigi ko ten.
[9] «Aw jigi tun bɛ suman caman sɔrɔli kan, nka aw ma suman bɛrɛ sɔrɔ. Aw tun b'a fɛ ka aw ka suman ladon so kɔnɔ tuma min na, ne y'a bɛe fyɛ ni ne dafiɲɛ ye. O kɛra mun kosɔn? K'a masɔrɔ ne batosoba tiɲɛnnen don, k'a sɔrɔ aw bɛe kelen-kelen bɛ tɛliya ka aw yɛrɛw ka sow jɔ.
[10] O de kosɔn sankolo min bɛ aw kun na, o ma sɔn ka ngomiji si di. Dugukolo ma sɔn ka sɛnɛ fɛnw di aw ma fana.
[11] Ne ye ja lase forow ni kuluw ni alikama ni rezɛn ni tulu bɔ yɔrɔ ni dugukolo kan nafa sɔrɔ fɛnw ani Hadamadenw ani baganw ani aw bolo baara nɔw bɛe ma.»
[12] O tuma la Sealtiɛl denkɛ Zorobabɛl ani Jozadak denkɛ sarakalasebaaw kuntigi Josue ani mɔgɔ tɔw bɛe ye u tulo majɔ Matigi u ka Ala kan na, o min tun fɔra kira Agize ye, Matigi u ka Ala fɛ ka lase u ma. Mɔgɔ bɛe siranna Matigi ɲɛ.
[13] Agize cira Matigi fɛ ka kuma o mɔgɔw fɛ ka kɛɲɛ ni Matigi ka ci dilen ye a ma, ko, Matigi ko: «Ne bɛ aw fɛ.»
[14] O kɔ, Matigi ye Juda jamana kuntigi Zorobabɛl ani sarakalasebaaw kuntigi Josue ani mɔgɔ tɔw bɛe jija. U bɛe nana ka Kɛlɛbolow Matigi, u ka Alabatosoba baara daminɛ.
[15] O kɛra masakɛ Darius ka masaya san filanan kalo wɔorɔnan tile mugan ni naaninan don.