[1] Siya malobaliw, aw ka aw lajɛ yɔrɔ kelen na ka aw yɛrɛw sɛgɛsɛgɛ,
[2] sani ko fɔlen ka dafa, sani o don ka tɛmɛn joona i ko nwɛɲɛ, sani Matigi ka dimiyaba ka bi aw kan, sani Matigi ka dimiya don ka na cun aw kan.
[3] Aw dugukolo kan mɔgɔ sabalilenw, aw minw bɛ Matigi ka sariya sira taama, a' ye Matigi ɲini. Aw ka tilennenya ni yɛrɛ majigileɲa ɲini, a dɔrɔ aw na dogo yɔrɔ sɔrɔ Matigi ka dimiya don na.
[4] Gaza na kɛ tomon ye. Askalɔn na kɛ yɔrɔ jalen jintan ye. Asdɔdkaw na gɛn tile gwan fɛ, Ekirɔn dili na sama ka bɔ yen.
[5] Mɔgɔ minw sigilen bɛ kɔgɔji da la ani Keretikaw, bɔnɛ bɛ olu ye. Matigi ye kuma min fɔ Filisitikaw ka jamana Kanan kama, o filɛ nin ye ko: «Ne na i halaki, mɔgɔ si tɛna sɔrɔ i kɔnɔ tun.
[6] Kɔgɔji dala jamanaw na kɛ bagan gɛn yɔrɔw ni saga gɛnnaw sigi yɔrɔw ni sagaw da yɔrɔw ye.
[7] O kɔgɔji dala jamanaw na kɛ Juda bɔnsɔn la mɔgɔ tɔ tolenw ta ye. Olu na u ka sagaw gɛn yen. U na taa da Askalɔn sow kɔnɔ su fɛ k'a masɔrɔ Matigi, u ka Ala na a janto u la ka hinɛ u la ka u labɔ jɔnya la.
[8] «Ne ye Moab bɔnsɔn ka nenili kumaw ani Amɔn bɔnsɔn ka dɔgɔyali kumaw mɛn. U ye ne ka mɔgɔw neni ka wuli ka u dancɛw yɛlɛma.»
[9] O de kosɔn Kɛlɛbolow Matigi, Israɛl ka Ala ko: «Ne ɲɛnama tɔgɔ kosɔn, Moab na kɛ i ko Sodɔmɛ dugu. Amɔn bɔnsɔn na kɛ i ko Gomɔrɛ dugu. Nwɔni na falen u ka yɔrɔw bɛe la.» Kɔgɔ na o dugukolo yɔrɔw bɛe datugu badaa. Ne ka mɔgɔ minw ɲɛnama tora, olu na cɔngɔ u sen kɔrɔ. Ne ka siya tɔ tolen na u sɔrɔ ciyɛn ye.
[10] O na kɛ u ka kuncɛbaya sara ye, sabu u ye Kɛlɛbolow Matigi ka mɔgɔw neni ka u yɛrɛw bonya.
[11] Matigi na kɛ siranfɛnba ye u kama k'a masɔrɔ a na dugukolo kan bato fɛnw bɛe tiɲɛn ka u ban. O tuma la, mɔgɔw bɛe kelen-kelen na a bato ka u to u yɛrɛ ka jamana la, hali siya minw sigilen bɛ kɔgɔji gunw kan yɔrɔ jan.
[12] Aw Etiopikaw, aw fana na faga ni ne ka npan ye.
[13] O kɔ, Matigi na a bolo mɔonɔbɔ saheli yanfan kama ka Asirikaw halaki. A na Ninivɛ dugu kɛ yɔrɔ jalan jintan ye k'a kɛ i ko kungokolon lankolon.
[14] Bagankulu na taa da a cɛmancɛ la. Dantan fɛn sifa bɛe na basigi yen, hali jumɛ ni juguni na kɛ u ka samasen kunna birilanw kɔrɔ. Kɔnɔw na kasi u ka finɛtiriw la. So dakunw na tiɲɛn, sedere jiriw na sama ka bɔ sow la.
[15] Ayiwa dugu kuncɛba min sigilen tun bɛ hɛrɛ la ni a kɔnɔ mɔgɔw tun bɛ miiri ko u lakanalen don, ko u bɔɲɔgɔn si tɛ, a filɛ, o tiɲɛnna ka halaki. A kɛra kungo waraw dogo yɔrɔ ye. Mɔgɔ o mɔgɔ bɛ tɛmɛn a kɛrɛ fɛ, olu bɛe bɛ dala file fyɛ a la ka u bolo biri u da la ka kabakoya.