[1] Juda bɔnsɔn ka masakɛ Josiasi, Amos denkɛ tilew la, Matigi ka kuma sera Kusi denkɛ Sofoni ma. Kusi fa tun ye Gedaliya ye, Gedaliya fa tun ye Amariya ye, Amariya fa tun ye Ezekiasi ye.
[2] Matigi ko: «Ne na dugukolo kan fɛnw bɛe halaki ka bɔ dugukolo kan.
[3] Ne na Hadamadenw ni baganw ni sanfɛ kɔnɔw ani kɔgɔji la jɛgɛw bɛe halaki ka u ban. Ne na tilenbaliw ni u ka boliw bɛe halaki u ka fililiw kosɔn. Ne na Hadamadenw bɛe halaki ka bɔ dugukolo kan.» Matigi ko ten.
[4] «Ne na ne bolo mɔonɔbɔ Juda bɔnsɔn ni Jerusalɛmkaw bɛe kama. Minw bɛ Baal bato nin dugu kɔnɔ ani a ka baarakɛlaw ani minw bɛ sarakaw lase, ne na olu bɛe halaki ka bɔ nin dugu kɔnɔ.
[5] Mɔgɔ minw bɛ u biri sankolola kɛnɛbɔlanw kɔrɔ ka olu bato sow san fɛ, ne na olu halaki. Minw bɛ u biri o fɛnw kɔrɔ ka u kali Matigi tɔgɔ la ka u kali u yɛrɛw ka bato fɛnw fana la,
[6] ani minw ye u kɔ sin Matigi ma ani minw tɛ Matigi ɲini, ni u tɛ u hakili to a la, ne na olu bɛe halaki ka u ban.
[7] «A' ye aw makun Matigi Ala ɲɛ kɔrɔ, sabu Matigi ka don surunyara. Matigi ye saraka labɛn, a ye a ka mɔgɔ welelenw ɲɛnatɔmɔ.»
[8] Matigi ko: «Kuntigiw ni masakɛ denkɛw ani minw bɛ jamana wɛrɛ finiw don, ne na olu bɛe gosi Matigi ka saraka bɔ don na.
[9] O don na, mɔgɔ minw bɛ bato fɛnw dakun sago walisa ka u ka bato fɛnw ka sow fa ni nanbara nafolow ni fariya nafolow ye, ne na olu bɛe gosi.»
[10] Matigi ko: «O don na kulokanba na mɛn Jɛgɛw donda la. Nwunankanba na mɛn dugu kindaw la. Halakilikanba na mɛn tintinw san fɛ.
[11] Dugu cɛmancɛ la kinda, aw ka kasikanba bɔ k'a masɔrɔ jagokɛlaw bɛe halakira. Mɔgɔ minw tun bɛ warijɛ doni, olu bɛe halakira.
[12] «O tuma la, mɔgɔ minw lafiyalen don i ko dɔlɔ ɲɛmajɔlen, ni u b'a fɔ u yɛrɛw kɔnɔ ko Matigi tɛna ko ɲuman wala ko jugu kɛ, ne na Jerusalɛm dugu yɔrɔw bɛe yaala ni kala mɔɲɔ manalenw ye ka olu bɛe sara.
[13] Cɛlikɛlaw na u ka nafolo mara yɔrɔw nafolo cɛ. U ka sow na kɛ tomon ye. U na sow jɔ, nka u tɛna sigi olu kɔnɔ. U na rezɛn nakɔw sɛnɛ, nka u tɛna o rezɛn ji min.»
[14] Matigi ka dimiya donba surunyara. A surunyara, a bɛ tɛliya ka na. A nali kosɔn jigi tigɛ kasikanba na bɔ, hali mɔgɔ barikamaw na kasikanba bɔ ka dɛmɛni ɲini.
[15] O don na kɛ dimiya don ye, a na kɛ tɔorɔba don ni degun don ye. A na kɛ halakili ni tiɲɛnni don ye. A na kɛ dibiba ni dibifin don ye, ani sankaba fin ni bugunba don.
[16] O don na, mɔgɔ na kɛlɛkɛ cɛ buru fyɛkan mɛn, ani kɛlɛ kulokan. O na kɛ dugu barikamaw ni lamini kogo janw kama.
[17] Matigi ko: «Ne na mɔgɔw jigi tigɛ, u na taama i ko fiyentɔw, sabu u ye Matigi hakɛ ta. U joli na bɔn fan bɛe i ko buguri, u farisogow na kɛ sununkun ye.»
[18] U ka warijɛw ni u ka sanuw tɛna se ka u tila Matigi ka dimiya don na. Jamana bɛe na jeni a ka dimiya tasuma fɛ k'a masɔrɔ a na jamana kɔnɔ mɔgɔw bɛe halaki yɔrɔ nin kelen.