[1] Kira Habakuk ye delili min kɛ, o maɲumatɔkan filɛ nin ye.
[2] Matigi, ne ye i ka kuma fɔlen mɛn, o ye ne ja tigɛ kosɛbɛ. Matigi, i ka i ka kɛwalew dafa san o san, i ka u jira an tilew la. Hali ni i diminna, i ka i hakili to i ka makari la.
[3] Ala bɛ na ka bɔ Teman. O Senuma bɛ na ka bɔ Paran kulu kan. Sela. A nɔorɔ bɛ sankolow datugu, dugukolo fara a nɔorɔ la.
[4] O yeelen ka bon i ko kɛnɛyeelen. Yeelen bɛ seri ka bɔ a tɛgɛ kɔnɔ, a ka sebaaya dogolen bɛ yen.
[5] Saya bɛ taama a ɲɛ fɛ, fiɲɛbana bɛ tugu a kɔ.
[6] A bɛ i jɔ, dugukolo bɛ yɛrɛyɛrɛ. A bɛ filɛli kɛ, siyaw bɛe bɛ yɛrɛyɛrɛ. Kulu banbaliw bɛ ci, tintin kɔrɔlenw bɛ tunun. A ka siraw ye sira banbali ye.
[7] Ne bɛ Etiopikaw ka finisow ye tɔorɔ la. Madiankaw ka finisow bɛ yɛrɛyɛrɛ siran kosɔn.
[8] Matigi diminna bajiw kɔrɔ wa? I dusu bɔra bajiw kɔrɔ wa? I diminna kɔgɔji kɔrɔ fo i yɛlɛnna i ka sow kan ka don i ka se sɔrɔli wotoro kɔnɔ wa?
[9] I ka bɔnnikɛkala bɛ bɔ kɛnɛma, i ka biɲɛkisɛw ye i ka kalilikan dafa. Sela. I bɛ dugukolo cɛ ci, ka kɛ baji tɛmɛn siraw ye.
[10] Kuluw bɛ i ye ka yɛrɛyɛrɛ, kɔjiw bɛ woyo. Ji dunbaw kan bɛ mɛn, u ji kuruw bɛ yɛlɛn fo san fɛ.
[11] Tile ni kalo bɛ jɔ u taama siraw kan, i ka biɲɛkisɛ pantɔ yelekutɔ ni i ka tamakisɛ pantɔ manamanatɔ ɲɛ.
[12] I dusu bɔlenba bɛ dugukolo fan bɛe yaala, i diminnen bɛ siyaw cɔngɔ i sen kɔrɔ.
[13] I bɛ bɔ i ka mɔgɔw kisili kama, i ka munlen kisili kama. I bɛ mɔgɔ jugu ka so kunnala ci, ka a yɔrɔ bɛe tiɲɛn fo ka se duguma. Sela.
[14] I bɛ mɔgɔ juguw ka kɛlɛdenw kuntigi sɔgɔ ni i yɛrɛ ka biɲɛw ye, olu minw bɛ na ka an jɛnsɛn i ko fiɲɛba, ani minw bɛ ɲagalikan bɔ i ko u bɛ taa ɲɛnibaatɔw bolo ban u yɛrɛw ka so kɔnɔ cogo min na.
[15] I bɛ kɔgɔji kuruw foroki i sen kɔrɔ ni i ka yɛlɛnkan sow ntɔrɔnw ye, o ji kurubaw kɔni.
[16] Ne y'a kan mɛn, ne kɔnɔ nugu lamagara ne kɔnɔ. Ne dawolo tun bɛ yɛrɛyɛrɛ o kan kosɔn, ne kolow tolila, ne kunberew bɛ yɛrɛyɛrɛ, sabu ne ka kan ka ne makun ka makɔnɔli kɛ tɔorɔ don na, juguw bɛ wuli ne ka mɔgɔw kama don min na ka u minɛ kɔni.
[17] O tuma la toro sun tɛna feere bɔ, mɔ tɛna sɔrɔ rezɛn sun na tun. Olive sun denw na dɛsɛ, dumuni tɛna sɔrɔ forow la. Sagaw na ban sagabon kɔnɔ, misiw na ban misi wɛrɛ la.
[18] Halio, ne bɛ ɲagali Matigi la, ka nisɔndiya ne Kisibaa Ala la.
[19] Matigi Ala ye ne barika ye. A bɛ ne senw diya i ko minan sen ka di cogo min na, k'a to ne ka taama san fɛ yɔrɔ kɔrɔtalenw kan. Dɔnkili dalaw kuntigi ka dɔnkili min dara ni nkɔni juruw ye.