[1] O duguba min ye mɔgɔw faga ni a falen bɛ nkalon ni fariya kow la, ni a tɛ cɛli dabila, bɔnɛ bɛ o ye.
[2] Gwɛɲɛ gosili kɛ kan bɛ mɛn ani wotorow sen mankan ni sow panpan kan ani wotorow panpan kan.
[3] Sotigiw bɛ girin, npanw bɛ manamana, tamaw bɛ yeleku. Mɔgɔw joginnen ka ca, jamaba fagalen suw dama dɔnbali tonnen bɛ ɲɔgɔn kan. Mɔgɔ bɛ talon ka bi suw la.
[4] Jatɔmuso cɛɲi ka kakalaya kow sara filɛ o ye. A cɛ tun ka ɲi. A tun bɛ mɔgɔw lafili ni a ka nɔgɔlenya kow ye, a ka kuma nugulenw ye siyaw lafili.
[5] Kɛlɛbolow Matigi ko: «Tiɲɛ la, i laban waati sera sa. Ne na i ka taafɛ kɔrɔta ka biri i ɲɛda la, ka i farilankolon jira siyaw la, ka i maloya kow jira masayaw la.
[6] Ne na i ka nɔgɔlenya kow fili i kan, ka i kɛ ɲigin fɛn ani filɛli fɛn ye bɛe ɲɛ na.
[7] Mɔgɔ o mɔgɔ mana i ye, olu na boli ka mabɔ i la. U n'a fɔ ko: ‹Ninivɛ cira. Jɔn bɛ se ka hinɛ a la? Ne na dusu saalobaa sɔrɔ i ye min?›»
[8] No-Amɔn min sigilen tun bɛ bajiw cɛma, bajiw tun kɛra k'a lamini ka kɛ a ka kɛlɛ kunbɛn so ni a lamini kogo ye, e ka fisa o ye wa?
[9] Etiopi ni Misira jamanaw tun ye a barika dama dɔnbali ye. Putkaw ni Libikaw tun ye a dɛmɛbaaw ye.
[10] Nka a minɛna ka taa jɔnya la. A denw forokira dugu bɔlɔnw fan bɛe la. Kala dara a ka mɔgɔ tɔgɔbaw kan, jɔlɔkɔ donna a ka kuntigiw la.
[11] E fana na ɲɛnamini ka i dogo. I na i dogo i juguw ɲɛ.
[12] I ka kɛlɛ kunbɛn sow bɛ i ko toro sun min den mɔna ka ban. Ni a lamagara, a denw ka di min ye, u bɛ bi o da la.
[13] I ka kɛlɛkɛ cɛw bɛe bɛ i cɛma i ko musow. I ka dugu dondaw bɛ yɛlɛ u yɛrɛma i juguw ɲɛ. Tasuma mana bɛ i ka dugu kon balabalaw jeni.
[14] I ka i magoɲɛ ji mara, sabu i juguw na daga sigi i da la. I ka kɛlɛ kunbɛn sow barika bonya, i ka don bɔgɔ la k'a nɔoni ka biriki jeni yɔrɔ labɛn.
[15] Tasuma na i jeni yen, npan na i halaki ka i ban. Hali ni i kɔnɔ mɔgɔw ka ca i ko ntɔn kunani, hali ni u ka ca i ko ɲɔ dun ntɔn, npan na i dun i ko ntɔn.
[16] I kɔnɔ jagokɛlaw ka ca i ko sankolola dolow, nka u na pan ka taa i ko ntɔnw.
[17] Ɔwɔ, i ka kuntigiw bɛ i ko ntɔn kunani. U ka ca i ko ntɔnkuluba min bɛ sigi sinsan kɔnɔ fonɛnɛ tuma la. Ni tile bɔra, u bɛ pan ka taa. Mɔgɔ tɛ u taa yɔrɔ dɔn.
[18] Asiri masakɛ, i ka saga gɛnnaw bɛ sunɔgɔ. I ka kɛlɛkɛ cɛw dalen tɛ lamaga. I ka mɔgɔw jɛnsɛnna kuluw kan. Mɔgɔ si tɛ yen ka u lajɛ yɔrɔ kelen na.
[19] Fura si tɛ yen ka i jogindaw kɛnɛya. I jogindaw na i faga. Mɔgɔ minw bɛ i kibaru mɛn, olu bɛ u tɛgɛw ci ɲɔgɔn na i kosɔn, sabu mɔgɔ si tɛ yen ni i ka juguya ma se min ma.