[1] Kiraya kuma min jirala Habakuk la, o filɛ nin ye.
[2] Matigi, ne na to ka kasi i nɔ fɛ fo tuma jumɛn, k'a sɔrɔ i tɛ sɔn ka ne kan lamɛn? Ne kasira i nɔ fɛ fariya kow kosɔn nka i ma sɔn ka ne tila.
[3] Mun na i bɛ tilenbaliya jira ne la ka kɛ tilenbaliya seere ye? Tɔorɔ kow ni fariya kow dagalen bɛ ne da la. Kɛlɛ kow bɛ pɛrɛn, sɔsɔli bɛ wuli fan bɛe.
[4] Sariya fana tɛ jate, tilennenya kow tɛ kɛ, katuguni mɔgɔ jugu bɛ se sɔrɔ mɔgɔ tilennen kan, o de kosɔn kiri tilenbali bɛ tigɛ.
[5] Aw ka filɛli kɛ siyaw cɛma ka u lajɛ ka kabakoya ka aw kɔnɔna fili. K'a masɔrɔ ne na ko dɔ kɛ aw tile la, ni o lakalila aw ɲɛ na, aw tɛna da o la.
[6] Ɔwɔ, ne na Kaldeka mɔgɔ farin dɔw lawuli, minw tɛ sɛgɛn, olu na dugukolo fan bɛe boliboli ka sigi yɔrɔw minɛ minw tɛ u yɛrɛw ta ye.
[7] Siranfɛnba kabakomaw don. U ka kuncɛbaya kosɔn u yɛrɛw bɛ u yɛrɛw ka sariyaw dɔrɔn sigi.
[8] U ka sow sen ka di ka tɛmɛn waraninkalanw kan. U ka tɛli ni suruku jeniw ye. U ka sotigiw bɛ girin ni kuncɛbaya ye. U ka sotigiw bɛ na ka bɔ yɔrɔ jan na. U bɛ pan ka na i ko bɔn bɛ jigin a ka fɛn minɛlen kan cogo min na.
[9] O mɔgɔw bɛe bɛ na cɛli kama. U bɛ girin ka taa ɲɛ u ɲɛ kuntilenna fɛ. U bɛ mɔgɔ caman cɛ i ko kɔgɔji dala cɛncɛn.
[10] O mɔgɔw bɛ yɛlɛ bɔ masakɛ la ka kuntigiw mafiɲɛya. U bɛ yɛlɛ bɔ kɛlɛ kunbɛn sow bɛe la. U bɛ bɔgɔ mugu ton kɛlɛ kunbɛn sow ju la ka u minɛ.
[11] U bɛ tɛmɛn i ko fiɲɛba ka fariya kow kɛ, sabu u barika ye u ka bato fɛn ye.
[12] Matigi, ne ka Ala, ne ka Senuma, e tɛ yen kabini fɔlɔfɔlɔ wa? O de kosɔn an tɛ sa. Matigi, e de ye nin mɔgɔw sigi walisa i ka kiri tigɛ u kan. Ne ka Ala, ne ka farakurun, i ye u sigi kololi tɔorɔ kama.
[13] I ɲɛ ka senu nɔgɔlenya kow yeli ma. I tɛ se ka tilenbaliya kow filɛ. Ni mɔgɔ jugu bɛ mɔgɔ tilennen dumu, o min tilennen bɛ ka tɛmɛn a kan, mun kosɔn i bɛ o filɛ ka i makun?
[14] Mun y'a to i bɛ Hadamaden minɛ i ko kɔgɔji la jɛgɛw, i ko fɛn fofotaw, kuntigi tɛ minw na?
[15] Jugu bɛ u bɛe minɛ dolen na ka u minɛ a ka jɔ la ka u lajɛ ɲɔgɔn kan a ka jɔ kɔnɔ. A bɛ ɲagali kosɛbɛ a ka se sɔrɔli kosɔn.
[16] O de kosɔn a bɛ saraka bɔ a ka juru ye ka wusulan sarakaw bɔ a ka jɔ ye, sabu a bɛ mɔnni kɛ ka fɛn tulumaw minɛ olu barika la. A ka dumuni fɛn ka timin.
[17] A na to ka fɛnw minɛ ni a ka jɔ ye ka siyaw faga ni a tɛ hinɛ wa?