[1] Ne ye mɔgɔ ye min ye tɔɔrɔ ko dɔn, Matigi diminnen ye ne gosi.
[2] Ala ye ne ɲɔni ka fili dibi la, k'a to ne ka taama o la, a ma ne bila kɛnɛ sira kan.
[3] Siga t'a la, a ye a bolo kɔrɔta ne kama, a bɛ ne gosi don o don.
[4] A ye ne farisogo ni ne wolo jeni, a ye ne kolow kari.
[5] A ye kogo jɔ ka ne lamini ka ko kunamaw ni dimin kobaw lase ne ma.
[6] A ye ne lasigi yɔrɔ dibimaw kɔnɔ, i ko mɔgɔ minw sara ka kɔrɔ.
[7] A ye kogo jɔ ka ne kooli ka ne fan bɛɛ da tugu, a ye ne sirinɛgɛjɔlɔkɔ giriya.
[8] Ne kasira ka dɛmɛbaa wele tuma min na, a banna ne ka delili ma.
[9] A ye ne ka siraw tigɛ ni kabakurun dɛsɛnenw ye. A ye ne ka sira misɛnw kɛ dulenw ye.
[10] A kɛra i ko ursi wara dogolen ne ɲɛ, ka kɛ i ko waraba min mɛɛrɛlen bɛ ne ɲɛ.
[11] A taara ni ne ye yɔrɔ jan ka mabɔ sira la ka ne farafara. A ye ne to ne kelenna yen.
[12] A y'a ka kala sama, a ye ne kelen suma ni a ka biɲɛkisɛw ye.
[13] A ye ne solo cɛ sɔgɔ ni a ka ton kɔnɔ biɲɛkisɛw ye.
[14] Ne kɛra yɛlɛbɔ fɛn ye ne ka mɔgɔw bɛɛ fɛ. U bɛ ne tɔgɔ don u ka dɔnkiliw la tuma bɛɛ.
[15] U ye ne fa ni fɛn kunamaw ye, a ye ne ɲɛnamini ni taleji ye.
[16] A ye ne ɲinw kari ni bɛlɛkisɛw ye, a ye ne don bugurijɛ la.
[17] I ye hɛrɛ mabɔ ne la, ne ɲinɛna lafiya kɔ.
[18] Ayiwa ne ko: «Jigi tɛ ne la tun, ne jigi min tun bɛ Matigi kan, o tiɲɛnna.»
[19] I hakili to ne ka tɔɔrɔ ko ni ne sɛgɛn koba la, taleji ko ni bagaji ko kɔni.
[20] Ne hakili bɛ jigin u la tuma bɛɛ, ne dusu barika banna.
[21] Ne hakili jiginna nin ko la, o na kɛ ne jigi ye.
[22] Matigi ka makariba kosɔn, an ma halaki ka ban, a ma a ka hinɛba mabɔ an na fewu.
[23] Olu bɛ kuraya sɔgɔma o sɔgɔma. A ka kantigiya tɛ ban abada.
[24] Ne dusukun ko: «Matigi ye ne ka nafoloba ye, ne na ne jigi da ale kan.»
[25] Mɔgɔ min jigi dalen bɛ Matigi kan, min b'a ɲini ni a dusukun bɛɛ ye, a ka ɲumaya ka bon olu ta fan fɛ.
[26] Ka Matigi ka kisili makɔnɔ ni sabali ye, o ka ɲi.
[27] Ni mɔgɔ denmisɛnma bɛ kow doni i ko zu, o ka ɲi a ma.
[28] Ɔwɔ, ni Ala bɛ o kow da mɔgɔ kun, mɔgɔ ka to a kelenna ka i makun.
[29] A ka a ɲɛda biri buguri la, a dɔrɔ jigi da yɔrɔ na sɔrɔ a fɛ.
[30] A ka a tama jɔ a gosibaa ye, o k'a mafiɲɛya fo ka wasa.
[31] O bɛɛ n'a ta Matigi tɛ mɔgɔ fililen to tuma bɛɛ.
[32] Nka a tɔɔrɔlen kɔ, Matigi b'a ka makari ni a ka ɲumaya jira a la,
[33] k'a masɔrɔ a man di a ye ka mɔgɔ tɔɔrɔ, ka Hadamadenw ɲɛnasisi.
[34] Ni u bɛ jamana kɔnɔ jɔnw cɔngɔ u sen kɔrɔ tuma min na,
[35] ni u bɛ mɔgɔ ka tiɲɛ yɛlɛma Kɔrɔtalenba ɲɛ kɔrɔ tuma min na,
[36] ni u bɛ mɔgɔ jalaki kiri la tuma min na, Matigi ɲɛ tɛ o la wa?
[37] Jɔn bɛ se k'a fɔ ko, fɛn dɔ ka kɛ ni Matigi ma o latigɛ?
[38] Hɛrɛ kuma ni tɔɔrɔ kuma fila bɛɛ tɛ bɔ Kɔrɔtalenba yɛrɛ da la wa?
[39] Mun kosɔn mɔgɔ b'a yɛrɛ makasi k'a ɲɛnama to? Mɔgɔ bɛɛ kelen-kelen ka a yɛrɛ makasi a ka jurumuw kosɔn.
[40] An ka an ka siraw filɛ ka miiri u la ka kɔsegin Matigi ma.
[41] An ka an dusukunw ni an bolow kɔrɔta sankolola Ala fan fɛ.
[42] An ye jurumu kɛ, an murutira. E kɔni, i ma sɔn ka yafali kɛ.
[43] I ye i ka dimiyaba dogo ka an nɔgɛn. I ye an faga, i ma sɔn ka hinɛ an na.
[44] I ye i yɛrɛ datugu ni sankaba ye, walisa an ka deliliw kana yɛlɛn ka se i ma.
[45] I ye an kɛ i ko nɔgɔ ni ɲaman siyaw cɛma.
[46] An juguw bɛɛ ye u da waa an kama.
[47] Siran kow ni hakili ɲaami kow sera an ma ani halakili ni tiɲɛnni.
[48] Ne ɲɛji bɛ woyo i ko kɔji, ne ka mɔgɔw halakili kosɔn.
[49] Ne ɲɛ bɛ ji jigin tuma bɛɛ dimin kosɔn,
[50] sani Matigi, k'a to sankolo la ka a ɲɛ majigin ka an filɛ.
[51] Ne ɲɛ bɛ ne dimin ne ka dugu denmusow bɔnɛ kosɔn.
[52] Minw ye ne koniya ni kun t'a la, olu ye ne gɛn i ko wɔlɔ.
[53] U tun b'a fɛ ka ne faga dingɛ kɔnɔ ni kabakurunw ye.
[54] Ji woyo ye ne tunun, ne y'a fɔ ko: «Ne halakira.»
[55] Matigi, ne ye i tɔgɔ wele, ka ne to dingɛ dunba ju la.
[56] Kabini ne ko, i kana i tulo tugu ne ka delili kan ni ne nwunankan na, i ye ne kan lamɛn.
[57] Ne ye i wele don min na, i gɛrɛla ne la, i y'a fɔ ne ye ko: «I kana siran.»
[58] Matigi, i ye ne lafasa, i kɛra ne ni kunmabɔbaa ye.
[59] Matigi, ko jugu min kɛra ne la, i ɲɛ bɛ o la. I ka ne ka kiri ko ɲɛnabɔ.
[60] Ne juguw ye ne koniyali min kɛ, ani u ye jɛ minw siri ne kama, i bɛ o bɛɛ dɔn.
[61] Matigi, i ye u ka mafiɲɛyali kumaw mɛn, ani u ye jɛ min siri ne kama ko u bɛ ne faga.
[62] Ne juguw ye ko minw fɔ, ani u tun bɛ dabali minw siri ne kama don o don, i bɛ o dɔn.
[63] I ka u ka ko latigɛlenw ni u ka kɛwalew jate, ne kɛra u ka yɛlɛbɔ fɛn ye u ka dɔnkiliw la.
[64] Matigi, i ka u sara ka kɛɲɛ ni u ka kɛwalew ye, ka u minɛ ka kɛɲɛ ni u jogo juguw ye.
[65] I ka u dusukun gɛlɛya ka u gosi ni i ka danga ye.
[66] Matigi, i diminnen ka u nɔgɛn ka u halaki ka bɔ sankolo jukɔrɔ.