[1] Matigi diminnen ye Sion datugu ni sankaba ye. A ye Israɛl nɔɔrɔ fili duguma ka bɔ san fɛ. Dugu min kɛra a senda yɔrɔ ye, a ma miiri o la a ka dimiya don na.
[2] Matigi ye Yakuba sigi yɔrɔw bɛɛ halaki, a ma sɔn ka hinɛ a la. A diminnen ye Juda ka duguw barikamaw ci, ka u yɛrɛkɛ duguma. A ye masaya ni a ka faamaw nɔɔrɔ tiɲɛn.
[3] A dusu bɔlenba ye Israɛl bɔnsɔn fanga bɛɛ karikari. A ye a kininbolo ka dɛmɛni mabɔ an na juguw ɲɛ na. A ye tasumaba tugu Yakuba la, o bɛ jenili kɛ fan bɛɛ la.
[4] Jugu bɛ a ka bonnikɛ kala sama cogo min na, a y'a ka kala sama ten. Jugu bɛ a bolo mɔɔnɔbɔ ka fagali kɛ cogo min na, a y'a bolo mɔɔnɔbɔ ten. Minw ko tun ka di an ye, a ye olu bɛɛ faga. A ye a ka dimiya bi Sion denmuso ka finiso kan i ko tasuma.
[5] Matigi ye Israɛl bɔnsɔn halaki i ko a jugu. A ye a ka masaya sow ci ka a ka kɛlɛ kunbɛn sow tiɲɛn. A ye Juda bɔnsɔn ɲɛnasisi kow ni a ka tɔɔrɔ kow caya.
[6] A ye a yɛrɛ sigi yɔrɔ tiɲɛn i ko mɔgɔ bɛ rezɛn nakɔ tiɲɛn cogo min na. Matigi y'a ka yɔrɔ senuma tiɲɛn. Matigi y'a to mɔgɔw ka ɲinɛ san yɛlɛma seli ni lafiɲɛ donw kɔ Sion dugu kɔnɔ. A diminnen dusu bɔlen ye masakɛ ni sarakalasebaa bila.
[7] Matigi banna a ka saraka bɔlan na, a ɲiginna a ka yɔrɔ senuma la. A ye Sion masaya so kogow don a juguw bolo, olu ye mankanba bɔ Matigi batosoba kɔnɔ i ko seli don.
[8] Matigi y'a latigɛ ka Sion dugu kogow tiɲɛn. A ye sumanikɛ jurukisɛ sama, a ma tiɲɛnni dabila sani a k'a ci ka ban. A ye lamini kogow ni a kan sow bila su kasi la, u ɲɛnasisilen bɛ ɲɔgɔn fɛ.
[9] Sion dugu donda la konw donna dugu rɔ, Matigi ye u kon balabalaw kari. A ka masakɛ ni a ka faamaw jɛnsɛnna siyaw cɛma, sariya tɛ yen tun. A ka kiraw fana tɛ Matigi ka fɛn jiralen ye tun.
[10] Sion dugu kɔnɔ cɛkɔrɔbaw ye u sigi duguma, hali u tɛ se ka kuma. U ye buguri kɛ u kun na ka cafu fini don u la. Jerusalɛm npogotigiw ye u kun biri duguma.
[11] Ne ɲɛw lafinna kasi fɛ, ne ni tɔɔrɔlen bɛ kosɛbɛ. Ne dusu kasilen bɛ ne ka mɔgɔw ka bɔnɛ kosɔn, k'a masɔrɔ denmisɛnw ni sinminnaw kirinna ka bi dugu bɔlɔnw na.
[12] U b'a fɔ u baw ye ko: «Dumuni ni diwɛn bɛ sɔrɔ min?» U bɛ bi dugu bɔlɔnw na i ko mɔgɔ joginnen. U bɛ sa ka u to u ba sin na.
[13] Jerusalɛm, ne na mun fɔ i ye sa? I ka kɔɲɛ bɔlen tɛ foyi fɛ. Sion, ne bɛ se ka i ni mun kɛɲɛ walisa ka i dusu saalo? I ka tɔɔrɔ kow ka bon i ko kɔgɔji. Jɔn dun bɛ se ka i kɛnɛya?
[14] I ka kiraw tɛ fɛn jira i la fɛn fufafu ni nkalon kɔ. U ma i ka jurumuw jira i la walisa ka i kisi jɔnya ma. U ma fɛn wɛrɛ fɔ i ye ni nkalon kumaw ni lafili kumaw tɛ.
[15] Sirafɛ tɛmɛnbaaw bɛɛ bɛ i ye ka tɛgɛrɛ fɔ i la. U bɛ dala file fyɛ ka u kun firifiri Jerusalɛm yeli kosɔn. U ko: «Nin duguba min cɛ tun ka ɲi ka tɛmɛn dugukolo kan duguw bɛɛ kan, o kɛra tan cogo di?»
[16] I juguw bɛɛ bɛ u da waa i kama, ka dala file fyɛ ka u ɲinw ɲimi. U ko: «An ye o dugu ci. An tun bɛ don min makɔnɔ, o selen filɛ. A sera, an y'a ye.»
[17] Matigi ye ko min latigɛ, a ye o kɛ. A ye kuma min fɔ ka kɔrɔ, a ye o dafa. A ye u bɛɛ halaki, a ma sɔn ka hinɛ i la. A y'a to i juguw ka ɲagali i kosɔn, a ye i juguw barika bonya.
[18] Jerusalɛm, i kɔnɔ mɔgɔw ka nwunan ka kasi Matigi nɔ fɛ. I ka ɲɛji woyo su fara tile kan i ko baji. I kana i lafiya hali dɔɔnin, i ɲɛji kana bɔli dabila.
[19] I ka wuli ka i kan bɔ su fɛ kɔlɔsilikɛlaw ɲɔgɔn kɔ falen tuma la. I ka i kɔnɔna kow fɔ Matigi ye k'a foori, i n'a fɔ ji bɛ bɔn cogo min na. I bolow kɔrɔta a nɔ fɛ i ka denmisɛnw ni kosɔn, u bɛ kirin kɔngɔ bolo dugu bɔlɔnw kunbɛn yɔrɔw bɛɛ la.
[20] Matigi, i ka filɛli kɛ kosɛbɛ, yala i ye siya wɛrɛ tɔɔrɔ nin cogo la wa? Musow ka u yɛrɛ wolodenw dun wa, u ye den minw tɛtɛ? Sarakalasesbaaw ni kiraw ka faga Matigi ka yɔrɔ senuma kɔnɔ wa?
[21] Kamalenw ni cɛkɔrɔbaw bilen bɛ duguma dugu bɔlɔnw na. Ne denmusow ni ne ka kamalenw fagara npan fɛ. I ye u kan tigɛ i ka dimiya don na. I ye u faga, i ma hinɛ u la.
[22] I ye siran kobaw wele ka bɔ fan bɛɛ la ka ne lamini i ko mɔgɔw bɛ ɲɔgɔn lajɛ seli don na cogo min na. Mɔgɔ si tɛ se ka tila, mɔgɔ si ɲɛnama tɛ to, Matigi ka dimiya don na. Ne tun ye denmisɛn minw tɛtɛ ka u lamɔ, ne juguw ye olu bɛɛ faga.