[1] Matigi ka kuma min sera Petuɛl denkɛ Joɛl ma, o filɛ nin ye.
[2] Cɛkɔrɔbaw, aw ka nin lamɛn. Jamana kɔnɔ mɔgɔw bɛɛ, a' ye aw tulo majɔ. Yala nin bɔɲɔgɔnko kɛra aw tilew la wala aw bɛnbaw tilew la wa?
[3] Aw ka o lakali aw denw ye, aw denw ka o lakali u denw ye, olu denw ka o lakali bɔnsɔn nataw ye.
[4] Sɛne fɛn min tora ntumunin kɔ, ntɔnden ye o dumu. Min tora ntɔnden kɔ, ntɔn kunani ye o dumu. A tɔ min tora ntɔn kunani kɔ, ntɔn bilen ye o dumu.
[5] Dɔlɔtɔw, a' ye kunun ka kasi. Aw diwɛn minnaw bɛɛ ka kasi diwɛn dɛsɛli kosɔn aw la.
[6] K'a masɔrɔ siya barikama dama dɔnbali ye ne ka jamana tiɲɛn. U yɛlɛ ɲinw bɛ i ko waraba yɛlɛ ɲinw. U ntaga ɲinw bɛ i ko waraba ntaga ɲinw.
[7] U ye ne ka rezɛn foro tiɲɛn ka ne ka toro sunw karikari. U ye olu bolow fara wɔrɔn ka u fili, u bolow jɛyara.
[8] Aw ka kasi i ko npogotigi bɛ cafu fini don ka a maminɛ cɛ su kasi cogo min na.
[9] Nili fɛnw ni saraka bɔntaw banna Matigi ka so kɔnɔ. Sarakalasebaa minw bɛ Matigi ka baara la, olu bɛ kasi.
[10] Kungo kɔnɔ fɛnw bɛɛ tiɲɛnna, dugukolo ɲɛnasisilen don k'a masɔrɔ alikama tiɲɛnna, diwɛn kɛnɛ jara, tulu dɛsɛra.
[11] Sɛnɛkɛlaw, aw ka maloya, rezɛn nakɔtigiw, aw ka kasi alikama ni orje kosɔn, sabu foro la sumanw bɛɛ tiɲɛnna.
[12] Rezɛn sun jara, toro sun fɔsɔnfɔsɔnna, gerenati sun ni ntamaro sun ni pɔmu sun ani kungo kɔnɔ jirisunw bɛɛ jara. Hɛrɛ si tɛ Hadamadenw cɛma tun.
[13] Sarakalasebaaw, aw ka cafu fini don aw kan na ka kasi. Aw minw bɛ baara kɛ Matigi ka saraka bɔlan na, aw ka kasi. Ne ka Ala ka so kɔnɔ baarakɛlaw, aw ka na ni cafu fini ye aw kan na ka kasi yen, k'a masɔrɔ nili fɛnw ni saraka bɔntaw dɛsɛra aw ka Ala ka so kɔnɔ.
[14] Aw ka sun don ka welewele da ka jamalajɛ senuma kɛ. Aw ka cɛkɔrɔbaw ni jamana kɔnɔ mɔgɔw bɛɛ lajɛ Matigi, aw ka Ala ka so kɔnɔ, ka kasi Matigi nɔ fɛ.
[15] E, bɔnɛ don bɛ na, a surunyara, Matigi ka don kɔni, a bɛ na i ko Sebaayabɛɛtigi ka halakili.
[16] Dumuni ma ban ka bɔ an ɲɛ kɔrɔ wa? ɲagalikan ni nisɔndiyakan ma ban ka bɔ an ka Ala ka so kɔnɔ wa?
[17] Danni si tolila dugukolo la, jiginɛw kɔnɔ sumanw banna. Suman lasagon yɔrɔw tiɲɛnna sabu sumankisɛ banna.
[18] Bagankulu bɛ nwunan, misikulu ja tigɛra, sabu dumuni kɛ yɔrɔ tɛ u fɛ. Sagakulu fana bɛ tɔorɔ.
[19] Matigi, ne bɛ kasi i nɔ fɛ, sabu tasuma ye bagan gɛn yɔrɔw bɛɛ jeni kungo kɔnɔ. Tasuma mana ye kungo kɔnɔ jiriw fana jeni.
[20] Hali kungo waraw yɛrɛ bɛ nwunan i nɔ fɛ, sabu kɔjiw jara. Tasuma ye kungo bin nugu yɔrɔw bɛɛ jeni.