[1] Aw ka buru fyɛ Sion kɔnɔ ka a kan bɔ ne ka kulu senuma kan. Jamana kɔnɔ mɔgɔw bɛɛ bɛ yɛrɛyɛrɛ, k'a masɔrɔ Matigi ka don bɛ na, a surunyara.
[2] A na kɛ dibi ni dibifin don ye, sankabafin ni bugun don don, a bɛ na i ko dugujɛ bɛ se kuluw kan cogo min na. Kɛlɛbolo barikama dama dɔnbali bɛ na, a ɲɔgɔn ma kɛ fɔlɔ, a ɲɔgɔn tɛna kɛ san nataw la tun.
[3] Tasuma bɛ fɛn bɛɛ jeni u ɲɛ fɛ, tasuma mana jenilikɛla bɛ u kɔ. Sani u ka se yen, jamana tun kɛra i ko Edɛn nakɔ. U tɛmɛnnen kɔ, jamana bɛ kɛ kungokolon jalan ye, fɛn si tɛ to u kɔ.
[4] Ni i ye u ye, u bɔlen bɛ sow fɛ, u bɛ boli i ko sotigiw.
[5] U mankan bɛ i ko wotorow mankan ka u to kuluw san fɛ. U mankan bɛ i ko bin jenitɔ mankan, u kɛra i ko kɛlɛbolo barikama labɛnnen kɛlɛ kama.
[6] Siyaw bɛ yɛrɛyɛrɛ u ɲɛ kɔrɔ, mɔgɔw bɛɛ ɲɛdaw cogo bɛ yɛlɛma.
[7] U bɛ girin i ko cɛ farinw. U bɛ yɛlɛn lamini kogow kan i ko kɛlɛdenw. U bɛɛ kelen-kelen bɛ taa u kuntilenna fɛ, u si tɛ bɔ u taa siraw kan.
[8] U tɛ se ɲɔgɔn ma, u bɛɛ kelen-kelen bɛ taa u ka siraw fɛ. I bɛ girin ka kɛlɛkɛ minanw cɛ tigɛ ka tɛmɛn.
[9] U bɛ jɛnsɛn dugu kɔnɔ, ka yaala a lamini kogo kan. U bɛ yɛlɛn ka don sow kɔnɔ, ka don finɛtiriw fɛ i n'a fɔ sonyalikɛlaw.
[10] Dugukolo bɛ yɛrɛyɛrɛ u ɲɛ, sankolo bɛ lamaga. Tile ni kalo bɛ dibi, dolow tɛna yeelen bɔ.
[11] Matigi bɛ a kan bɔ a ka kɛlɛbolo ɲɛ fɛ, sabu a ka kɛlɛ daga ka bon kosɛbɛ. Min bɛ a ka kuma fɔlen kɛ, o ye barikama ye. Matigi ka don ka bon, siranba don don. Jɔn dun bɛ se a kɔrɔ?
[12] Matigi y'a fɔ ko kura ko: «A' ye kɔsegin ne ma ni aw dusukun bɛɛ ye, ka sun don ka kasi ka ɲɛnasisi.
[13] Aw ka aw dusukun farafara, aw kana aw ka finiw farafara.» Aw ka kɔsegin Matigi, aw ka Ala ma, sabu a ka makari ka bon, a bɛ hinɛ. A tɛ dimin joona, a ka ɲumaya ka bon, a bɛ hinɛ mɔgɔ tɔorɔlenw na.
[14] Jɔn b'a dɔn ni Matigi tɛna segin kɔ k'a ka dimiya dabila ka dubaw kɛ ka sɛnɛ fɛnw caya, walisa aw ka nili fɛnw ni saraka bɔntaw di Matigi, aw ka Ala ma?
[15] Aw ka buru fyɛ Sion kɔnɔ, ka sundon ko welewele da ka jamalajɛ senuma kɛ.
[16] Aw ka mɔgɔw lajɛ ka jama saniya. Aw ka cɛkɔrɔbaw lajɛ yen, ka denmisɛnw ni sinminnaw fara u kan. Kɔɲɔcɛ ka bɔ kɔɲɔ so kɔnɔ, kɔɲɔmuso ka bɔ a ka kɔɲɔ bon kɔnɔ.
[17] Sarakalasebaa minw bɛ baara kɛ Matigi ye, olu ka kasi dondaba ni saraka bɔlan cɛ, k'a fɔ ko: «Matigi, i ka hinɛ i ka mɔgɔw la, i kana i ka ciyɛn fili ka u tɔorɔ, siyaw kana u mafiɲɛya.» Mun kosɔn a bɛ fɔ siyaw cɛma ko: «U ka Ala bɛ min?»
[18] Matigi ka jamana keleya b'a la, a ka mɔgɔw hinɛ donna a la.
[19] Matigi ye jaabili kɛ k'a fɔ a ka mɔgɔw ye ko: «Ne na suman ni diwɛn kura ani tulu ci aw ma ka aw wasa. Ne tɛna aw kɛ mafiɲɛyali fɛn ye siyaw cɛma tun.
[20] Aw jugu minw nana ka bɔ saheli yanfan fɛ, ne na olu mabɔ aw la, ka u ɲɔni ka taa yɔrɔ lankolon jalan na. U ɲɛ fɛ taw na bi kɔrɔn fɛ kɔgɔji la, u kɔ fɛ taw na bi tilebi yanfan fɛ kɔgɔji la. U kasa na bɔ, u toli kasa na bɔ, sabu u ye u yɛrɛw bonya u ka ko kɛlenw kosɔn aw la.
[21] «Jamana, i kana siran fewu, i ka ɲagalikan bɔ ka nisɔndiya, sabu Matigi ye kobaw kɛ.
[22] Kungo waraw, aw kana siran, sabu aw ka dumuni kɛ yɔrɔw na nugu, jiriw na den kɛ, toro sun ni rezɛn sun na den caman kɛ.
[23] «Sion kɔnɔ mɔgɔw, aw fana ka sewakan ni nisɔndiyakan bɔ Matigi, aw ka Ala ye. K'a masɔrɔ a bɛ sanji kun fɔlɔ di aw ma a waati la. Sanji kun fɔlɔ ni a laban na caya aw ye i ko fɔlɔ cogo.
[24] Sumankisɛ na gendekɛnɛw fa, dagaw na fa diwɛn kɛnɛw ni tuluw la fo k'a bɔn.
[25] Ne ye ne ka kɛlɛboloba, ntɔnden ni ntɔn kunani ni ntɔn bilen ani ntumunin minw ci aw ma, olu ye aw ka suman minw tiɲɛn, ne na olu ɲɔgɔn segin aw ma.
[26] Aw na dumuni kɛ fo ka aw fa, ka Matigi, aw ka Ala tanu, a ka ko ɲuman kɛlenw kosɔn aw ye. Ne ka mɔgɔw tɛna maloya tun.
[27] Aw n'a dɔn ko ne bɛ Israɛl bɔnsɔn cɛma, ko ne ye Matigi, aw ka Ala ye, ko Ala wɛrɛ si tɛ ne kɔ. Ne ka mɔgɔw tɛna maloya tun.
[28] «O kow tɛmɛnnen kɔ, ne na ne Ni jigin Hadamadenw bɛɛ kan. Aw denkɛw ni aw denmusow na kiraya kɛ. Aw ka cɛkɔrɔbaw na sugow kɛ, aw ka kamalenw na yeli fɛnw ye.
[29] O donw na ne na ne Ni jigin hali jɔnkɛw ni jɔnmusow kan.
[30] «Ne na taamashyɛnw jira sankolo la ani dugukolo kan ni joli ni tasuma ani sisi samasenw ye.
[31] Tile na dibi, kalo na kɛ i ko joli sani Matigi ka donba juguma ka se.
[32] Ni mɔgɔ o mɔgɔ ye Matigi tɔgɔ wele o tuma la, o na kisi. Sabu kisili na kɛ Sion kulu kan ani Jerusalɛm dugu kɔnɔ i ko Matigi y'a fɔ cogo min na, ko: ‹Matigi ka ɲɛnatɔmɔlenw ɲɛnama na to.›»