[1] Ne jɔlen tun bɛ ne ka kɔlɔsili kɛ yɔrɔ la kɛlɛ kunbɛn so san fɛ. Ne ye ne tulo majɔ k'a filɛ ni Ala na min fɔ ne ye ani ne ka kan ka min fara ne ka delili kan, ka o dɔn.
[2] Matigi ye ne jaabi ko: «I ye o kiraya yeli fɛn min ye, i ka o sɛbɛn ka o ɲɛgɛn walahaw kan walisa a ka se ka kalan ko ɲuman.
[3] Sabu o kow ka kan ka dafa waati latigɛlen na. O waati tɛna tɛmɛn, a tɛna a ɲɛnafilɛbaaw lafili. Ni o kɛ waati tɛmɛnna i ɲɛ na, i ka makɔnɔli kɛ ni dannaya ye k'a masɔrɔ a na kɛ, siga t'a la.
[4] Mɔgɔ dusukun kuncɛba na jɛngɛ ka bɔ sira tilennen kan, nka mɔgɔ tilennen na ɲɛnamaya a ka dannaya barika la.»
[5] Tiɲɛ la, diwɛn bɛ mɔgɔ kuncɛba lafili, a tɛ lafiya si sɔrɔ. A ni tɛ wasa, a bɛ i ko lahara. A tɛ wasa, a bɛ i ko saya. A bɛ siyaw bɛe lajɛ a kɔrɔ ka mɔgɔw bɛe fara a yɛrɛ kan.
[6] O de kosɔn u bɛe na ntalen da a ko la ka a mafiɲɛya ka a lagosi. U n'a fɔ ko: «Mɔgɔ min bɛ mɔgɔw bolo fɛnw nanbara, ka a yɛrɛ fɛntigiya ni tɔnɔmada fɛnw ye, bɔnɛ bɛ o tigi ye. O na to ka kɛ fo tuma jumɛn?»
[7] Mɔgɔw minw ka juru bɛ i la, olu tɛna wuli i kama joona wa? I tɔorɔbaaw tɛna lakunun wa? I na kɛ u ka jɔn ye.
[8] K'a masɔrɔ i ye siya caman bolo fɛnw cɛ, o de kosɔn siya tɔ tolenw bɛ na i fana bolo fɛnw cɛ, sabu i ye mɔgɔw joli bɔn, i ye ɲiginna gɛlɛya kow kɛ jamana ni dugu ni a kɔnɔ mɔgɔw bɛe la.
[9] Mɔgɔ min ye tɔnɔ sɔrɔ nanbara la ka a ka so fɛntigiya ka a ɲaa da san fɛ walisa a kana tɔorɔ, bɔnɛ bɛ o tigi ye.
[10] I ye mɔgɔ caman minw faga, olu kɛra i yɛrɛ ka so maloya ko ye ka i jalaki.
[11] K'a masɔrɔ dugu lamini kogo kabakurunw yɛrɛ bɛ pɛrɛn i kama, so bili jiriw bɛ u jaabi.
[12] Mɔgɔ min sigilen bɛ mɔgɔ faga dugu kɔnɔ ka dugu sigi ni tilenbaliya ye, bɔnɛ bɛ o tigi ye.
[13] Ɔwɔ, ni Kɛlɛbolow Matigi y'a latigɛ, mɔgɔw na baara kɛ tasuma ye, siyaw na u yɛrɛw sɛgɛn fuu.
[14] K'a masɔrɔ dugukolo na fa Matigi dɔnniya ni a nɔorɔ la don dɔ la, i ko kɔgɔji dunba falen bɛ ji la cogo min na.
[15] E min bɛ dɔlɔ di i mɔgɔɲɔgɔn ma a k'a min, bɔnɛ bɛ i ye. E min bɛ i ka foroko kɔnɔ fɛn farinma di i mɔgɔɲɔgɔn ma fo k'a ɲɛnamini, walisa i ka a farilankolon filɛ, bɔnɛ bɛ i ye.
[16] I na fa mafiɲɛyali la nɔorɔ nɔ na. I ka i min ka i ɲɛnamini ka i maloya yɔrɔ jira kɛnɛkan. Matigi ka jifilen bɛ a kininbolo la, o na munumunu fo ka se i ma. Maloya na i ka bonya nɔgɔ.
[17] K'a masɔrɔ i ye tiɲɛnni min kɛ Liban na, o juru na sara i la. Waraw ka fagali na i lasiran, sabu i ye mɔgɔw faga ka ɲiginnagɛlɛya kow kɛ jamana ni dugu ni a kɔnɔ mɔgɔw bɛe la.
[18] I bɛ se ka dɛmɛni jumɛn sɔrɔ ka bɔ ja dɛsɛlen ni nɛgɛ yeelelen boliw fɛ, olu minw bɛ mɔgɔ kalan nkalonw na? Mɔgɔ min ye o bato fɛn kumabaliw dila, o bɛ se ka a jigi da olu kan cogo di?
[19] Mɔgɔ min b'a fɔ jiri dɛsɛlen ye ko, a ka kunun, k'a fɔ kabakurun dɛsɛlen ye ko, a ka wuli, bɔnɛ bɛ o tigi ye. Boli bɛ se ka mɔgɔ kalan cogo di? A filɛ, a yɔrɔw bɛe datugura ni sanu ni warijɛ ye, a tɛ se ka ninakili.
[20] Nka Matigi bɛ a batosoba senuma kɔnɔ, dugukolo kan fɛn bɛe ka u makun ale ɲɛ kɔrɔ.