[1] رب منه بونو گؤرستدی: ربّئن مَله‌یئنئن قاباغیندا باش کاهئن یوشَع دورموشدو. شیطان دا اونون ساغیندا دورموشدو کی، اونا ائتّئهام وورسون.
[2] رب شیطانا ددی: «رب سنه آجیقلانسین، ای شیطان! اورشلئمی سِچَن رب، سنه آجیقلانسین. مگر بو آدام اوددان چیخاریلمیش، یاریسی یانمیش اودون تئکه‌سئنه بَنزه‌مئر؟»
[3] یوشَع اَینئنه چوخ چئرکلی پالتار گِیئنئب مَله‌یئن قاباغیندا دایانمیشدی.
[4] بو مَلَک قاباغیندا دورانلارا ددی: «اونون اَینئندن چئرکلی پالتاری چیخاردین.» سونرا یوشَعه ددی: «باخ، گوناهینی سنئن اوستوندن گؤتوردوم، ائندی سنه بایرام پالتاری گِیئندئره‌جیم.»
[5] او واخت من ددئم: «قوی باشینا دا تمئز عمّامه قویسونلار.» باشینا تمئز عمّامه قویوب اونا پالتار گِیئندئردئلر. ربّئن مَله‌یی ده یانیندا دورموشدو.
[6] سونرا ربّئن مَله‌یی یوشَعه شهادت ورئب ددی:
[7] «قوشونلار ربّی بله دیئر: ”اگر یوللاریملا گده‌سن، وردئیئم امرئمی ساخلایاسان، اِوئمه سن باشچیلیق اده‌جکسن، صحنلرئمی سن قورویاجاقسان. بورادا دورانلارین آراسیندا ائچه‌ری کچمک حاقّینی سنه ورئرم.“
[8] ای باش کاهئن یوشَع، سن و سنئن قاباغیندا اوتوران یولداشلارین، قولاق آسین! چونکی اونلار گله‌جک حادئثه‌لرئن علامتئدئر. من ”شاخه“ آدلی قولومو گتئره‌جیم.
[9] یوشَعئن قاباغینا قویدوغوم داشا باخین! او تَک داشین یدّی گؤزو وار. اونون اوستونه بئر یازی اویوب یازاجاغام.» قوشونلار ربّی بویورور، «بئر گون ائچئنده بو اؤلکه‌نئن گوناهینی اورتادان گؤتوره‌جیم.
[10] او گون هر بئرئنئز قونشوسونو اؤز تَنه‌یی آلتینا، انجئر آغاجی آلتینا دعوت اده‌جک.» قوشونلار ربّی بویورور.