[1] ای قیزلارین لاپ گؤزَلی، سِوگئلئن هارایا گدئب؟ سِوگئلئن هارایا دؤنوب کی، بئز ده اونو سنئنله بئرلئکده آختاراق؟
[2] سِوگئلئم باغینا گدئب، عطئر گولوستانینا گدئب، گدئب کی، باغیندا سوروسونو اوتارسین و زانباق دَرسئن.
[3] سِوگئلئم منئمدئر، من ده سِوگئلئمئن. سوروسونو زانباقلار آراسیندا اوتاریر.
[4] سِوگئلئم، سن تئرصا کئمی گؤزَلسن، اورشلئم کئمی سِوئلمه‌لی‌سن، بایراقلی قوشون کئمی هیبتلی‌سن.
[5] گؤزلرئنی مندن گؤتور، چونکی منی پرئشان ادئر، ساچین گئلعاددان اِنَن کِچئلر سوروسونه بنزه‌یئر.
[6] دئشلرئن قویون سوروسو کئمی‌دئر کی، یویونماقدان چیخیر. هامیسینین اِکئزی وار، آرالاریندا بالاسیزی یوخدور.
[7] یاناقلارین یاشماق آرخاسیندا نار پارچاسی کئمی‌دئر.
[8] ملکه‌لر آلتمیش، جارئیه‌لر هشتاددیر، کنئزلر ده سایسیز.
[9] آمّا تایسیزدیر منئم گؤیرچئنئم، منئم تک کامئلئم؛ آناسینین بئری بئردانه قیزی‌دیر، اونو دوغان آروادین گؤز‌بَبه‌یی. کنئزلر اونو گؤروب بختور چاغیردیلار، ملکه‌لر و جارئیه‌لر ده بِله. اونلار دا اونو تعرئفله‌دئلر.
[10] کئمدئر بو کی، سحر کئمی آچیلیر، آی کئمی گؤزَلدئر، گون کئمی تمئزدئر، بایراقلی قوشون کئمی هیبتلی‌دئر؟
[11] جَوئز باغینا اِندئم کی، دره‌نئن یاشیل زوغلارینی گؤروم. گؤروم کی، آیا اوزوم آغاجی چئچکله‌نئب، نارلار چئچک آچیب؟
[12] جانیم، من بئلمه‌دن، منی شَرَفلی خالقیمین عارابالاری اوستونه قویدو.
[13] قاییت، قاییت، ای شولامّئت قیز قاییت، قاییت کی، سنه باخاق. نه اوچون مَخه‌نایئم اویونونا باخار کئمی، ائسته‌یئرسئنئز کی، شولامّئت قیزا باخاسینیز؟