[1] سولیمانین نغمه‌لرئنئن نغمه‌سی.
[2] قوی منی آغزینین اؤپوشلری ائله اؤپسون! چونکی سنئن محبّتئن شرابدان یاخشی‌دیر.
[3] عطئرلرئنئن نه گؤزل ائیسی وار! آدین تؤکولموش عطئردئر، بوندان اؤتری ده قیزلار سنی سِوئرلر.
[4] منی اؤزونه چک، قوی تَلَسَک. پادشاه منی اؤز حئجله‌لرئنه گتئرئب. سنده سِوئنئب شاد اولاجاغیق، شرابدان چوخ سنئن محبّتئنی خاطیرلایاجاغیق. سنی سِومَکده اونلارین حاقّی وار.
[5] ای اورشلئم قیزلاری، من قاراشینام؛ قِدار چادیرلاری کئمی، سولیمانین پرده‌لری کئمی. لاکئن گؤزَلَم.
[6] باخمایین کی، قارالمیشام، گون منی یاندیریب. آنامین اوغوللاری منه حئرصلَندئلر؛ منی اوزوم باغلارینا قوروجو قویدولار، آمّا من اؤز اوزوم باغیمی قورومامیشام.
[7] ای جانیمین سِودئیی، منه دِه، سورونو هارادا اوتاریرسان؟ گون اورتا واختی اونلاری هارادا یاتیردیرسان؟ سنئن دوستلارینین سورولری یانیندا، نه اوچون اوزونو اؤرتَن بئر آرواد کئمی اولوم؟
[8] اگر سنه بَلّی دیئل، ای قیزلارین لاپ گؤزَلی، سورونون ائزلرئنی توت، چَپئشلرئنی چوبانلارین چادیرلاری یانیندا اوتار.
[9] سن فئرعون عارابالارینی چَکَن گؤزل مادیانا بنزه‌یئرسن، ای سِوگئلئم.
[10] یاناقلارین او زنجئرلرله، بویونون او قیزیل بویونباغلارلا نه گؤزلدئر!
[11] سنه گوموش دویمه‌لی قیزیل زنجئرلر قاییراجاغیق.
[12] پادشاه سوفره‌سئنده اوتوراندا، سونبول عطئرئم ائیسئنی وردی.
[13] سِوگئلئم منه دؤشلرئم آراسیندا مور تورباسیدیر.
[14] سِوگئلئم منه عِین جِدی باغلاریندا بئر سالخیم حَنا گولودور.
[15] گؤر، سن نه گؤزَلسن، سِوگئلئم، گؤر، سن نه گؤزَلسن! سنئن گؤیرچئن گؤزلرئن واردیر!
[16] گؤر، سن نه یاراشیقلیسان، سِوگئلئم، نه شئرئنسن! یاشیللیقدیر یاتاغیمیز.
[17] اِولرئمئزئن دئرَکلری سئدر آغاجی‌دیر، تاوانیمیزین اویمالاری شام آغاجی!