[1] مگر اؤزوموزو گئنه تعرئف اتمه‌یه باشلاییریق؟ و یا بعضئلر کئمی سئزدن یا دا سئزه تؤوصئیه نامه‌لره احتئیاجیمیز وار؟
[2] بئزئم نامه‌مئز سئز اؤزونوزسونوز کی، اورَکلرئمئزده یازیلیب و بوتون ائنسانلار طرفئندن تانینیب و اوخونوب.
[3] سئز گؤرسدئرسئنئز کی، بئزئم خئدمتئمئزئن سایه‌سئنده مسئحئن مکتوبوسونوز؛ مورکّبله یازیلمیش یوخ، یاشایان تارینین روحو ائله، داش لؤوحه‌لری اوستونده یازیلمیش یوخ، ائنسان اوره‌یئنئن لؤوحه‌لری اوستونده.
[4] و مسئحئن واسئطه‌سی‌ائله بئزئم تارییا بله بئر اعتئمادیمیز وار.
[5] اونا گؤره یوخ کی، گویا بئزده اله بئر قابئلئیّت وار کی، بئزدن بئر شی عمله گلسئن. یوخ، بئزئم قابئلئیّتئمئز تاریداندیر کی،
[6] بئزی تزه عهدئن قابئلئیّتلی خئدمتچئسی اتدی؛ حرفئن یوخ، موقدّس روحون. چونکی حرف اؤلدورور، آمّا روح یاشادیر.
[7] لاکئن اگر اؤلوم گتئرن خئدمت، یعنی حرفلری داش لؤوحه‌لرده حکّ اولونموش، او قدر شؤوکتله گلدی، اله کی، موسانین اوزونده‌کی احتئشام فانی اولان حالدا، ائسرایئل اوغوللاری اونون اوزونه باخا بئلمئردئلر،
[8] بس نجه روحون خئدمتی اوندان داها چوخ شؤوکتلی اولمایاجاق؟!
[9] چونکی اگر محکومئیّت گتئرن خئدمتئن شؤوکتی وار، صالحلئک گتئرن خئدمتئن داها چوخ شؤوکتی اولاجاق.
[10] اونا گؤره کی، شؤوکتلی اولان شی، بو خوصوصدا، شؤوکتده اونو اؤتن شیئن قاباغیندا شؤوکتی اولماز.
[11] چونکی اگر فانی اولان، شؤوکتله‌دئر، نه‌قدر چوخ باقی اولان شؤوکتده اولاجاق.
[12] بونا گؤره بله بئر اومئدئمئز وار ائکن، بؤیوک جسارتله دانیشیریق.
[13] بئز موسا کئمی دیئلئک؛ او، اوزونه اؤرتوک چکدی کی، ائسرایئل اوغوللاری کچئب-گدن شؤوکتئن آخیرینی گؤرمه‌سئنلر.
[14] لاکئن اونلارین ذهئنلری کور اولوب، چونکی بو گونه کئمی قدئم عهد اوخوناندا همن اؤرتوک گؤتورولمه‌مئش قالیر. چونکی بو اؤرتوک مسئحده گؤتورولور.
[15] حتّا بو گونه کئمی بله، موسانین یازیلاری اوخونان زامان، اونلارین اورَکلری اوستونه بئر اؤرتوک چکئلئر.
[16] آمّا نه زامان کی، بئری ربّه دؤنور، بو اؤرتوک آرادان قالدیریلیر.
[17] رب موقدّس روحدور؛ ربّئن روحو هارادا اولسا، آزادلیق دا اورادادیر.
[18] آمّا بئز هامیمیز، آچیق اوز‌له ربّئن شؤوکتئنه آینا ائمئش کئمی باخیریق و شؤوکتدن شؤوکته کچئب، اِله او صورته ده تبدئل اولونوروق. بو دا ربدندئر کی، موقدّس روحدور.