[1] فخر اتمک فایدالی اولماسا دا، لازیمدیر؛ لاکئن من ائندی ربدن گلن رؤیالار و وحی‌لردن دانیشاجاغام.
[2] مسئحه عایید اولان بئر آدامی تانی‌ییرام کی، اون دؤرد ائل بوندان قاباق-بئلمئرم بدنده یا دا بدندن خارئج، تاری بئلئر-اوچونجو گؤیه آپاریلدی.
[3] و بئلئرم کی، نجه بو آدام-بئلمئرم بدنده یا دا بدندن خارئج، تاری بئلئر -
[4] جنّته آپاریلدی و دمه‌ملی سؤزلر اشئتدی کی، اونلاردان دانیشماق ائنسانا قدغن‌دئر.
[5] بله بئر آدامین حاقّیندا فخر اده بئلرم؛ لاکئن اؤزوم حاقّیندا ضعئفلئکلرئمدن باشقا هچ بئر شیه فخر اده بئلمه‌رم.
[6] اگر من فخر اتمک ائسته‌سم ده، عاغیلسیز اولمارام؛ چونکی حقئقتی دمئش اولارام. آمّا احتئیاط ادئرم کی، مبادا کئمسه منئم باره‌مده، منده گؤردویوندن و مندن اشئتدئکلرئندن آرتیق دوشونسون.
[7] جئسمئمه ده بئر تئکان سانجیلیب کی، وحی‌لرئن چوخ بؤیوک اولماسیندان کئبئرلَنمه‌یئم؛ شیطان مله‌یی کی، منه عذاب ورئب، قویماسین کی، من اؤزومو بؤیوکلندئرئم.
[8] بو باره‌ده اوچ دفه ربّه یالواردیم کی، اونو مندن گؤتورسون.
[9] و رب منه ددی: «منئم فیضئم سنه بسدئر، چونکی منئم قودرتئم ضعئفلئکده کامئل‌لَشئر.» بونا گؤره، داها چوخ اؤز ضعئفلئکلرئمده فخر اده‌جه‌یم کی، مسئحئن قودرتی منده ساکئن اولسون.
[10] بو سببدن ده مسئحئن خاطئری اوچون ضعئفلئکلره، تحقئرلره، احتئیاجلارا، عذابلارا و چتئنلئکلره راضی‌یام. چونکی ضعئف اولدوغوم زامان، قووّتلی‌یَم.
[11] من عاغیلسیز اولموشام: سئز منی بونا مجبور اتدئنئز. اصلئنده سئز گرک منی تعرئفله‌یئردئنئز، چونکی بؤیوک ساییلان حوارئلردن هچ بئر شیده اسکئک دیئلدئم، حتّا اگر هچ ساییلسام دا.
[12] دوغرو بئر حوارئنئن علامتلری سئزئن آرانیزدا بوتون صبرله، علامتلر، عجایئبلر و مؤجوزه‌لر واسئطه‌سی‌ائله ظاهئر اولدو.
[13] من اؤزومو سئزه بئر یوک اتمه‌دئم. بوندان باشقا مگر سئزئنله اله بئر رفتار اولدو کی، گویا او بئری کئلئسالاردان آشاغیسینیز؟ بو سهوئم اوچون منی باغیشلایین!
[14] ائندی بو اوچونجو دفه‌دئر کی، سئزئن یانینیزا گلمه‌یه حاضیرام و سئزه یوک اولمایاجاغام. چونکی سئزئن مالینیزی یوخ، اؤزونوزو آختاریرام. چونکی اوشاقلار والئدینلر اوچون یوخ، والئدینلر اوشاقلار اوچون مال-مولک ییغمالی‌دیرلار.
[15] چوخ دا شادلیقلا سئزئن جانینیز اوچون خرجله‌یئب، خرج اولوناجاغام. اگر من سئزی چوخ سوئرم، گرک سئزئن طرفئنئزدن آز سوئلئم؟!
[16] قوی بله اولسون، اؤزومو سئزه یوک اتمه‌دئم. کلکباز اولدوغوم بئر آدام اوچون سئزی حئیله ائله اَله گتئرمئشم!
[17] مگر سئزئن یانینیزا گؤندَ‌ردئیئملرئن واسئطه‌سی‌ائله سئزدن اؤز منفعتئم اوچون بئر ائستئفاده اتدئم؟
[18] تئطوسا یالواردیم، اونونلا بئر قارداش دا گؤندَ‌ردئم. مگر تئطوس اؤز منفعتی اوچون سئزدن هچ بئر ائستئفاده اتدی؟! مگر بئز همن روحدا، همن قدملرده رفتار اتمه‌دئک؟!
[19] بوتون بو زامان، آیا بونو دوشونورموشسونوز کی، بئز سئزئن قاباغینیزدا اؤزوموزدن دئفاع ادئرئک؟ بئز تارینین گؤزو قاباغیندا مسئحه عایید اولان آداملار کئمی دانیشیریق. و بوتون بونلار، ای سوگئلئلر، سئزی بئنا اتمک اوچوندور.
[20] چونکی قورخورام کی، یانینیزا گلدئیئم واخت، سئزی ائسته‌دئیئم کئمی تاپماییم، سئز ده منی ائسته‌دئیئنئز کئمی تاپمایاسینیز. مبادا کی، آرانیزدا داعوالار، پاخیلّیق، حئدّت، چکئشمه، ائفتئرالار، قیبت، کئبئر و فئتنه‌لر تاپیم.
[21] قورخورام کی، گلدئیئم واخت، تاریم منی سئزئن قاباغینیزدا اوتاندیرسین و او آداملار اوچون یاس توتوم کی، کچمئشده گوناها باتیب و اتدئکلری ناپاکلیق، زئنا و شهوتدن تؤوبه اتمه‌یئبلر.