[1] تارینین ائراده‌‌سی ائله مسئح عئسانین حوارئسی پولوس و تئموتاعوس قارداشدان، تارینین قورئنتده اولان کئلئساسی ائله بوتون اَخایئه‌ده اولان موقدّسلرئن هامیسینا:
[2] آتامیز تاریدان و رب عئسا مسئحدن سئزه فیض و باریش اولسون.
[3] موتبارک اولسون تاری و ربّئمئز عئسا مسئحئن آتاسی کی، مرحمتلرئن آتاسی و بوتون تسلّی‌لرئن تاریسی‌دیر.
[4] او کی، بئزه بوتون موصئبتلرئمئزده تسلّی ورئر کی، بئز ده هر جور موصئبت آلتیندا اولانلارا، تارینین بئزه وردئیی تسلّی ائله تسلّی وره بئلک.
[5] چونکی نجه مسئحئن عذابلاری بئر چوخ اؤلچوده بئزئمدئر، اِله‌جه ده مسئحئن واسئطه‌‌سی‌ائله تسلّئمئز بئر چوخ اؤلچوده‌دئر.
[6] اگر بئز موصئبت آلتینداییق، بو سئزئن تسلّی و نئجاتینیز اوچوندور. و یا اگر تسلّی تاپیریق، سئزئن تسلّئنئز اوچوندور کی، اله بئزئم همن چکدئیئمئز عذابلارین صبر‌‌له دؤزمه‌یئنده تأثئرلی اولور.
[7] و سئزئن باره‌ده اولان اومئدئمئز ثابئتدئر، چونکی بئلئرئک کی، بئزئم عذابلاریمیزدا شرئک اولدوغونوز کئمی، بئزئم تسلّئمئزده ده شرئک اولاجاقسینیز.
[8] چونکی ای قارداشلار، ائسته‌مئرئک کی، آسئیا ایالتئنده باشیمیزا گلن موصئبتدن بئخبر اولاسینیز؛ نجه حدّئمئزدن آرتیق و طاقتئمئزدن چوخ آغیر یوکلَندئک، اله کی، حیاتدان بله اومئد کَسدئک.
[9] ائچئمئزده اؤلوم حؤکمونو حئسّ اِتدئک، لاکئن بو اونون اوچون اولدو کی، اؤزوموزه یوخ، اؤلولری دئرئلدن تارییا توکّول ادک.
[10] او کی، بئزی بله بؤیوک اؤلومدن قورتاردی و قورتارار و اونا اومئد باغلامیشیق کی، بئزی گئنه ده قورتاراجاقدیر.
[11] سئز ده دوعالارینیزلا بئزه کؤمک ادئرسئنئز کی، بئر چوخلارینین دوعاسی سایه‌سئنده بئزه عطا اولونان لوطفدن اؤتری بئر چوخ کئمسه بئزئم اوچون تارییا شوکور اتسئن.
[12] چونکی فخرئمئزئن سببی، یعنی وئجدانیمیزین شهادتی بودور کی، بئز بو دونیادا خوصوصَن ده سئزئن حاقّینیزدا جئسمانی حئکمتله یوخ، تارینین فیضئنده، موقدّسلئک و تارییا مقبول اولان صمئمئیّتله رفتار اتدئک.
[13] چونکی اوخودوغونوز و آنلادیغینیزدان باشقا سئزه هچ بئر شی یازمیریق و اومئد ادئرم کی، آخیرا کئمی آنلایاجاقسینیز؛
[14] نجه کی، بئزی قئسمن ده اولسا، آنلادینیز کی، ربّئمئز عئسانین گونونده بئز سئزئن فخرئنئزئک، سئز ده بئزئم فخرئمئزسئنئز.
[15] بو یقئنلئکله اوّل سئزئن یانینیزا گلمه‌یه قصد اتدئم کی، سئز بئر برکته، ائکی دفه نایئل اولاسینیز.
[16] و سئزدن کچئب مقدونئیّه‌یه گدئم و مقدونئیّه‌دن گئنه سئزئن یانینیزا گلئم و سئزئن کؤمه‌یئنئز‌له یهودئیه اوچون یولا دوشوم.
[17] بو نئیّتده اولماقلا مگر من یونگول رفتار اتدئم؟! و یا منئم هدفئم جئسمانی بئر هدفدئر کی، منده اوّل «بلی، بلی» آمّا سونراسی «یوخ، یوخ» اولسون؟!
[18] لاکئن تاری اَمئندئر کی، بئزئم سؤزوموز سئزه هم «بلی»، هم «یوخ» دیئل.
[19] اونا گؤره کی، سئزئن آرانیزدا بئزئم، یعنی منئم، سئلوانوسون، و تئموتاعوسون وعظ اتدئیی تارینین اوغلو عئسا مسئح، هم «بلی» هم «یوخ» دیئلدی، آمّا اوندا «بلی» دئر.
[20] چونکی تارینین وعده‌لری نه قدر چوخ دا اولسا، مسئحده «بلی» دئر؛ اونا گؤره ده مسئحئن وسئله‌سی‌ائله بئز ده «آمئن» دئیه‌بئله‌رئک کی، بئزئم واسئطه‌مئز‌له تاری جلال تاپسین.
[21] تاری‌دیر کی، بئزی سئزئنله برابر مسئحده ثابئت دوردورور و مسح ادئر
[22] و بئزی مؤهورله‌یئب و موقدّس روحون بِیئنی اوره‌یئمئزه قویوب.
[23] تارینی جانیما شاهئد توتورام کی، سئزه رحم اتدئیئم اوچون ائندئیه کئمی قورئنته گلمه‌مئشم.
[24] بو او دمک دیئل کی، گویا بئز سئزئن ائمانینیز اوستونده حاکئمئک. یوخ! بئز سئزئن شادلیغینیز اوچون سئزئنله چالیشیریق. چونکی ائمانینیزدا ثابئت دورورسونوز.