[1] Jesusasti Olivos sat qulluruw sarxarakïna.
[2] Qhipür willjtasti, Jesusax Tatitun utaparuw kutt'anïna. Jaqinakax juparuw jak'achasipxäna, Jesusasti qunt'asisin yatichañ qalltäna.
[3] Ukhamäkipansti kamachi yatichirinakampi, fariseonakampix mä warmiruw wachuq jucha luraskir katjasin irpanipxäna. Uka warmirusti jupanak taypiruw sayt'ayapxäna,
[4] Ukatsti Jesusarux sapxänwa: —Yatichiri, aka warmirux wachuq jucha lurkir katjapxta.
[5] Kamachinxa, Moisesax ukham warminakarux qalampi k'upjas jiwayañ yatichapxitu. ¿Jumax kamstasa? —sasa.
[6] Jupanakax Jesusar yant'añatakiw ukham jiskt'apxäna, ukat jupar juchañchañataki. Jesusasti uraqir alt'asaw luk'anampi qillqañ qalltäna.
[7] Jesusarux jiskt'asipkakïnwa, ukat saythapisin jupanakar säna: —Jumanakat kawkïritix jan juchanïki ukay aka warmirux qalampi jaqt'añ qalltpan —sasa.
[8] Ukatsti wasitat alt'asin uraqir qillqaskakïnwa.
[9] Jesusan ukham satap ist'asinsti, maynit maynit sarxapxäna, chuyman jaqinakat qalltasina. Taqin sarxipansti, Jesusax sapakiw uka warmimpi qhiparxäna,
[10] ukatsti Jesusax saythapisin uka warmir jiskt'äna: —Warmi, ¿kawkinkapxaraki? ¿Janit khitis juchañchktamsti? —sasa.
[11] Warmisti sarakïnwa: —Tatay, janiw khitisa —sasa. Jesusasti juparux sarakïnwa: —Nayas janirakiw juchañchksmati; jichhax sarxam, jan juk'amp juch lurkxamti —sasa.
[12] Jesusax wasitampiw jaqinakar parläna: —Nayätwa akapach qhanaxa; khititix nayar arkitani ukax jakañ qhananïniwa, janirakiw mayampis ch'amakan sarnaqkxaniti —sasa.
[13] Fariseonakasti juparux sapxarakïnwa: —Juma pachpatak parlasktaxa, uka arsutamax janiw askïkiti —sasa.
[14] Jesusasti jupanakarux sarakïnwa: —Naya pachpatsay parlaskä, arsutaxax chiqawa. Nayax yatistwa kawkit jutataxsa, kawkir sarataxsa; ukampis jumanakax janiw yatipktati kawkit jutataxsa, kawkir sarataxsa.
[15] Jumanakax jaqin amuyuparjamakiw juchañchapxtaxa. Nayasti janiw khitirus juchañchkti;
[16] nayatix juchañchiristxa, uka juchañchäwix chiqapawa, nayax janiw sapak juchañchkti, jan ukasti, nayar khithankitu uka Awkiw nayamp chik juchañchi.
[17] Jumanakan kamachinakaman akham qillqatawa: “Pani irkatiritix mayak arsupxchi ukax chiqawa”.
[18] Ukhamasti, nayax, naya pachpat arsusta, khithankitu uka Awkisti nayat arsuraki —sasa.
[19] Ukatsti jiskt'apxarakïnwa: —¿Kawkinkarak awkimasti? —sasa. Jesusasti jupanakarux sarakïnwa: —Jumanakax janiw nayar uñt'apkistati, janirakiw Awkixarus uñt'apktati. Nayarutix uñt'apxitasmaxa, Awkixarux uñt'apxarakismawa —sasa.
[20] Jesusax aka arunak Tatitun utapan yatichaskasaw arsüna, luqta uchañäki ukawjana. Ukampis janiw khitis jupar katuntkänti, pachapan janïr purinitap layku.
[21] Jesusax wasitampiw jupanakar säna: —Nayax sarxäwa, jumanakasti thaqhapxitätawa, ukampis jumanakax juchanakaman jiwarapxäta. Kawkirutix nayax sarkä ukarux jumanakax janiw jutapkasmati —sasa.
[22] Judionakasti sapxarakïnwa: —¿Jiwayaspachäniti ukatti sispacha: “Kawkirutix sarkä ukarux jumanakax janiw jutapkasmati” sasasti?
[23] Jesusax jupanakarux sarakïnwa: —Jumanakax akapachankirïpxtawa, nayasti alaxpachankirïtwa, jumanakax aka uraqinkirïpxtawa, nayasti janiw aka uraqinkirïkti.
[24] Ukatpï sapxsmaxa: “Juchanakaman jiwarapxäta” sasaxa; jumanakatix jan iyawsapkitäta nayax khitïktix ukxa, juchanakaman jiwarapxäta —sasa.
[25] Ukat juparux jiskt'apxäna: —¿Khitirakït jumasti? —sasa. Jesusasti jupanakarux sarakïnwa: —Janiw kunat parlañaxas jumanakamp utjkiti.
[26] Ukampis jumanakan jan wali luratanakamat sañaxaw utjaskitu; khititix khithankitu ukax chiq arsu, nayasti kuntix jupat ist'kta ukarak akapachar sista.
[27] Ukampis jupanakax janiw Awkit parlatap amuyapkänti.
[28] Ukat Jesusax jupanakar säna: —Kunapachatix jumanakax Jaqin Yuqapar cruzar ch'akkatapkäta ukkhaw khitïktix nayax uk yatipxäta, jan kunsa nayan munañaxat lurataxa; kuntix Awkix yatichkitu uk arsutaxsa yatipxarakïta.
[29] Khititix nayar khithankitu ukax nayampïskiwa; Awkixax janiw sapak jaytkituti, kunatix jupar kusisiyki ukpin nayax lurta.
[30] Jesusan uka arunak arsutapatsti, waljaniw jupar iyawsapxäna.
[31] Jupar iyawsapkatayna uka judionakarux Jesusax sänwa: —Jumanakatix nayan yatichäwinakaxar jaysapxäta ukaxa, nayan chiqpach yatiqirinakaxaruw tukupxäta;
[32] chiqa kankañ uñt'apxäta, ukatsti uka chiqa kankañaw qhispiyapxätam.
[33] Jupanakasti Jesusarux sapxarakïnwa: —Nanakax Abrahaman wawanakapäpxtwa, janipuniw khitin luqtiriparus tukupkti. ¿Kunatarak sapxistasti: “Qhispiyatäxapxätawa” sasasti?
[34] Jesusasti jupanakarux sänwa: —Qhanak sapxsma, jucha luririnakax juchan uywatapawa.
[35] Mä uywatax janiw wiñayatak utankirinakamp qhiparkiti, ukampis mä wawax utanpun qhipari.
[36] Ukhamasti, Yuqatix qhispiyasiñ churapxstamxa, chiqpachansa qhispitaw sarnaqasxapxäta.
[37] Nayax yattwa jumanakan Abrahaman wawanakapäpxatama, ukampis arunakaxar jan katuqapxatam laykuw jiwayañ munapxista.
[38] Kuntix Awkixax uñacht'aykitu uk nayax yatiyta; jumanakasti kuntix Awkit ist'apkta uk lurapxarakim.
[39] Jupanakasti Jesusarux sapxarakïnwa: —Nanakan awkixax Abrahamawa —sasa. Jesusasti jupanakarux sänwa: —Jumanakatix chiqpachan Abrahaman wawanakapäpxasmaxa, kuntix jupax lurkän uk lurapxasma.
[40] Ukampis jichhax, kuntix Diosax nayar yatichkitu uk jumanakarux yatiyapxsma, jumanakasti uk sataxatak jiwayañ munapxista. ¡Abrahamasti janiw kunapachas ukham lurirïkänti!
[41] Jumanakax awkiman luräwinakap lurapxtaxa —sasa. Jupanakasti sapxarakïnwa: —Nanakax janiw q'axat wawanakäpkti; mä sapa awkinikïpxtwa, ukasti Diosawa —sasa.
[42] Jesusasti jupanakarux sänwa: —Chiqpachan Diosatix awkimäspa ukaxa, jumanakax munapxitasmawa, nayax Diosat jutta ukat akankarakta. Janiw nayax munañaxat jutkti, jan ukasti Diosaw nayarux khithanitu.
[43] Jumanakax janiw arsutanakax amuyt'añ munapktati, nayan arsutaxar jan ist'añ munapxatam layku.
[44] Jumanakan awkimax supayawa, jumanakax jupankapxtawa, ukat kuntix supayax munki uk lurapxaraktaxa. Supayax qalltatpach jaqi jiwayiriwa. Janiw jupax kunapachas chiq arskiti, jupan k'arïtap layku. Kunapachatix k'arinak arski ukkhax jupa pachpat parlaski; k'arïtap layku, k'arin awkipätap laykuraki.
[45] Ukampis nayax kunatix chiqäki uk arsta, jumanakasti janiw iyawsapkistati.
[46] ¿Jumanakat khitirak juchax irkatitaspasti? Arsutaxatix chiqächisti, ¿kunatarak jan iyawsapxistasti?
[47] Khititix Diosankirïki ukax, Diosan arunakap ist'i; ukampis jumanakax janiw Diosankirïpktati, ukatpï Diosan arup jan ist'añ munapktatixa —sasa.
[48] Judionakat yaqhipanakax juparuw sapxäna: —Chiqak sasipksma, jumax Samariankir jaqïtawa, ñanqha ajayun jaqirakïtawa —sasa.
[49] Jesusasti jupanakarux sarakïnwa: —Janiw nayax ñanqha ajayun mantatäkti. Jan ukasti, lurataxampix Awkixaruw jach'achaskta; ukampis jumanakax jisk'achapxistawa.
[50] Janiw nayax jach'achatäñ thaqkti; jan ukasti, Diosaw nayan jach'achatäñax thaqhi, juparakiw chiqapar uñji.
[51] Qhanak sapxsma, khititix nayan arsutaxar jayskani ukax wiñayatakiw Diosamp jakani —sasa.
[52] Judionakasti juparux sapxarakïnwa: —Jichhakuchapï ñanqha ajayunïtam yatxapxtxa. Abrahamasa, taqi profetanakas jiwarxapxiwa, jumasti saraktawa: “Khititix nayan arsutaxar jaysani ukasti, wiñayatakiw Diosampi jakani” sasa.
[53] ¿Jumasti Abraham awkisat juk'ampïtati? Jupax jiwxiwa, profetanakas jiwxarakiwa. ¿Jumasti, khitïtamarak amuyastasti? —sasa.
[54] Jesusasti jupanakarux sarakïnwa: —Naya pachpatix jach'añchasiristxa, jach'ar tukutaxax inamayäspawa. Ukampis nayarux Awkixaw jach'añchaskitu, jumanakasti juparux “Diosaxaw” sapxtawa.
[55] Ukampis jumanakax janiw uñt'apktati, nayasti juparux uñt'twa; nayatix: “Janiw jupar uñt'kti” siristxa, jumanakjam k'ari jaqïristwa. Chiqpachansa nayax jupar uñt'twa, kuntix jupax siski uk lurarakta.
[56] Jumanakan Abraham awkimasti, nayan akapachar jutañax uru uñjañat kusisïnwa, uka uru uñjasasti, wal kusisirakïna —sasa.
[57] Judionakasti Jesusarux sapxarakïnwa: —Janïraw phisqa tunka maranïktasa, “Abrahamarux uñjtwa” saraktawa —sasa.
[58] Jesusasti jupanakarux sarakïnwa: —Qhanak sapxsma, Abrahamax janïr yurkän uka nayratpach nayax utjta —sasa.
[59] Uk ist'asinsti, Jesusarux qalamp k'upjas jiwayañ munapxäna; ukampis Jesusax jaqinak taypiruw imantasïna, ukat Tatitun utapat mistuwayxäna.