[1] Uka qhipatsti, judionakax mä kusisiñ uru uruyapxäna, Jesusasti Jerusalenaruw kutt'äna.
[2] Jerusalén markana, “Ovej uyu punku” sat jak'an mä uma püñaw utji phisqa jach'a punkuni, ukasti hebreo arunxa Betzatá satawa.
[3] Uka chiqansti walja usutanakaw utjäna: juykhunaka, kayu usutanaka, suchunaka; jupanakasti uman unxtañap suyasipkäna.
[4] Tatitun angelapaw sapa kuti uka chiqar saraqanirïna, ukat uma unxtayirïna; khititix um unxtipan nayraqat mantirïkän ukakiw usupat waliptirïna.
[5] Uka usutanak taypin mä chachaw utjäna; jupax kimsa tunka kimsaqallqun mara usurnukstatänwa.
[6] Jesusasti uka jaqir uraqin jaqusiskir uñjasina, jaya maranak usurnukstatätap amuyasinxa, juparuw jiskt'äna: —¿K'umaraptañ muntati? —sasa.
[7] Usutasti sänwa: —Tatay, janiw khiti yanapt'iris utjkituti uma unxtkipan mantañaxataki. Sapa kuti mantañ munkta ukkhax, yaqhakiw nayraqat mantawayxi —sasa.
[8] Jesusasti sänwa: —Sartasim, ikiñam apthapisim, ukat sarnaqam —sasa.
[9] Ukspachaw uka jaqix k'umaraptäna, ikiñap apthapisxasinsti, sarnaqañ qalltäna. Ukürusti sábado urünwa,
[10] judionakasti k'umaraptir jaqirux sapxänwa: —Jichhürux sábado uruwa; janiw ikiñam apañamax wakiskiti —sasa.
[11] Uka jaqisti jupanakarux sänwa: —K'umaraptaykitu ukax situwa: “Ikiñam apthapisxam ukat sarnaqam” sasa.
[12] Jupanakasti jiskt'apxänwa: —¿Khitis sistam: ‘Ikiñam apthapisxam ukat sarnaqam’ sasasti? —sasa.
[13] Uka jaqisti janiw yatkänti khitin jupar k'umarachatapsa, Jesusax ukawjankir walja jaqi taypiruw chhaqtawayxatayna.
[14] Uka qhipatsti Jesusax uka jaqirux Tatitun utapan jikxatäna, ukat juparux sarakïna: —Jichhax k'umaräxtawa, jan wasitat juch lurkxamti, jan ukasti, juk'amp jan waliruw purisma —sasa.
[15] K'umaraptat jaqisti sarawayxänwa, ukatsti judionakaruw Jesusan jupar k'umaraptayatapat yatiyäna.
[16] Ukat judionakax Jesusar arknaqapxäna, sábado urun ukham luratap layku.
[17] Ukampis Jesusax jupanakar sänwa: —Awkixax jichhakamaw irnaqaski, nayasti ukat irnaqarakta —sasa.
[18] Ukham arsutapat judionakax jiwayañpun munapxäna, janiw sábado uru p'akintatapatakti, jan ukasti, “Diosax Awkixawa” sas arsutapampix, Diosäkaspa ukham tukutap amuyapxäna.
[19] Jesusasti jupanakarux sänwa: “Qhanak sapxsma, Diosan Yuqapax janiw kunsa jupa pachpat lurkaspati, jan ukasti, kuntix Awkix lurki ukarak luri.
[20] Awkix Yuqaruw munasi, jupax kunanaktix lurki uk uñacht'ayi; ukampis juk'ampi jach'a luräwinak uñacht'ayani, jumanakasti ukanak uñjasax muspharapxätawa.
[21] Kunjämtix Awkix jiwatanakar jakañ churas jaktaykixa, ukhamarakiw Yuqapax khitinakarutix munki ukanakarux jakañ churaraki.
[22] Awkix janiw khitirus juchañchkiti, jan ukasti Yuqaparuw juchañchañ ch'am churi,
[23] kamisatix Awkir jach'añchapki, ukhamarak Yuqar taqpachan jach'añchañapataki. Yuqar jan jach'añchirix, janiw khithanki uka Awkir jach'añchkiti.
[24] “Qhanak sapxsma, khititix nayan arsutaxar ist'ki, khithankitu ukarus iyawskaraki ukax, wiñay jakañaniwa; janiw juchañchatäkaniti, jan ukasti jiwañat jakañaruw sarakipxi.
[25] Qhanak sapxsma, pachax puriniwa, jiwatanakax jichhpachaw Diosan Yuqapan arup ist'apxani; ist'irinakasti, jakapxaniwa.
[26] Kunjämatix Awkix jupa pachpa jakañanixa, uka pachparakiw Yuqaparux pachpa jakañanïñap churi,
[27] ukatsti taripañapatak munañap churaraki, Jaqin Yuqapätap layku.
[28] Ukampis jan ukat muspharapxamti, pachax purininiwa, ukapachaw taqi jiwatanakax jupan arup ist'apxani,
[29] jupanakasti amay imäwit mistunipxani. Aski luririnakax wiñay jakañatakiw jaktapxani, ñanqha luririnakasti juchañchatäñatakiw jaktapxani.
[30] “Janiw nayax munañaxat kuns lurkiristti. Nayax Awkixan arsutaparjamaw taripta, taripäwixasti chiqawa, janiw nayax munañaxarjam lurañ munkti, jan ukasti khithankitu uka Awkixan munañap lurta.
[31] Nayatix naya pachpat arsusiristxa, arsusitaxax janiw chiqapäkaspati.
[32] Ukampis nayat arsurix yaqhaw utji, nayax yattwa kuntix siski ukan chiqätapa.
[33] Jumanakax Bautisir Juanar jiskt'iriw khithapxtaxa, jupasti chiqap arsüna.
[34] Ukampis nayax janiw khiti jaqin nayat arsuñapsa munkti. Jumanakan qhispiyasiñamatakiw uk arsta.
[35] Bautisir Juanan yatichäwipax mä qhanjamaw qhanäna, jumanakasti uka qhanapan mä juk'a pachakiw kusisiñ munapxäyätaxa.
[36] Ukampis Juanat sipan yaqhaw nayat arsurix utji. Kuntix nayax lurkta ukaxa, Awkix lurañaxatak katuykitu ukawa; ukasti Awkin nayar chiqpach khithanitap yatiyi.
[37] Nayar khithanir Awkisti, nayat qhanañchi, janiw jumanakax kunapachas arup ist'apktati, janirakiw ajanupsa uñkatapktati,
[38] janiw arunakap katxäsipktati, Awkin khithanitapar jan iyawsapxatam layku.
[39] Jumanakax taqi amuyumpiw Qillqatanak ullarapxtaxa, uka Qillqatanakan wiñay jakañ jikxatañ amuyasina; ukampisa, Qillqatanakax nayxat parlaskchi ukasa,
[40] jumanakax jakañanïñatakix janiw nayan ukar jutañ munapktati.
[41] “Janiw nayax jaqinakan jach'añchäwinakap munkti.
[42] Ukhamarus nayax jumanakar uñt'apxsmawa, Diosar jan munatanakamsa yatiraktwa.
[43] Nayax Awkixan khithanitaw jutta, jumanakasti janiw katuqapkistati; ukampis maynitix jupa pachpat jutaspa ukarux katuqapxasmawa.
[44] ¿Kamisarak jumanakasti maynit maynikam jach'añchasiñ katuqirïkasina, mä sapa Diosat jutir jach'añchäwi jan thaqhapktasti?
[45] Jan amuyapxamti; nayas Awkixan nayraqatapan juchañchapkirisma ukhama; khititix juchañchapktam ukax pachpa Moisesawa, jumanakax juparuw alkatasipxtaxa.
[46] Jumanakatix Moisesan arsutapar iyawsapxasma ukax, nayarux iyawsapxarakitasmawa, Moisesan nayat qillqatap layku.
[47] Ukampis janitix Moisesan qillqatapar iyawsapksta ukaxa, ¿kamisarak nayan arunakaxar iyawsapxasmasti?” sasa.