[1] “Akanaksti jumanakarux jan mayjt'asipxañamatakiw sapxsma.
[2] Jumanakarux sinagoganakat jaqunukupxätam, yaqhipanakarusti jiwayapxätamwa; uka luratapampix Diosarus luqtapkaspa ukham amuyapxani.
[3] Awkirus, nayarus jan uñt'apxatap laykuw taqi ukanak lurapxani.
[4] Aksti sapxsmawa, kunapachatix uka urux purinkani ukkhax, kuntix sapksma uk amtasipxañamataki. “Ukanaksti janiw qalltatpach sapkäyäsmati, nayan jumanakampïskatax layku.
[5] Jichhasti khititix khithankitu ukaruw sarxä; jumanakat janiw khitis jiskt'kituti, ¿kawkirurak sarätasti?, sasa;
[6] jan ukasti, akanak arsutaxat llakitakïxapxtawa.
[7] Ukampis kunatix chiqäki uk sapxsma: jumanakatakix nayan sarxañaxax askiwa. Nayatix jan sarkiristxa, janiw Chuymachirix jumanakar jutkaspati, ukampis nayatix saräxa, juparux khithanïwa.
[8] Kunapachatix Qullan Ajayux jutkan ukkhaxa, akapachankir jaqinakarux khitis juchani, khitis jan juchani, khitirakis Diosan taripäwip katuqani, taqi ukanak uñacht'ayani.
[9] ¿Khitirak juchararasti? Nayar jan iyawsiriw juchararaxa;
[10] ¿khitirak jan juchanïki ukasti? Naya, Awkixan ukar saraskta, jumanakasti janiw juk'amp uñjkxapxitätati;
[11] ¿khitirak Diosan taripäwip katuqanisti? Khititix akapach apnaqki ukawa, jupasti niya juchañchatäxiwa.
[12] “Juk'ampinakaw jumanakar arsuñaxax utjaskitu, ukampis jichhax janiw amuyt'apkasmati.
[13] Kunapachatix Qullan Ajayux jutkan ukkhasti, jupaw taqi kunatix chiqäki uk yatichapxätam; janiw jupa pachpat parlkaniti, jan ukasti kuntix ist'ki uk sani, ukatsti kunanakatix qhipa urunakan luraskani uk yatiyarakini.
[14] Jupaw nayan kankañax uñacht'ayani, nayankki uk katuqatap layku, uksti jumanakaruw yatiyapxarakïtam.
[15] Kunatix Awkin utjki ukax nayankiwa; ukat sista: ‘Qullan Ajayux nayankki uk katuqani, uksti jumanakaruw yatiyapxarakïtam’ sasa.
[16] “Akat mä qawqha urunakatxa, janiw uñjkxapxitätati, ukampis uka qhipat wasitat uñjxapxarakitäta.”
[17] Yatiqirinakapat yaqhipasti jupanakkamaw jiskt'asipxäna, akham sasa: —¿Kun sañarak munpachasti: “Akat mä qawqha urunakatxa, janiw uñjkxapxitätati, ukampis uka qhipat wasitat uñjxapxarakitäta, Awkin ukar saraskatax layku” sasasti?
[18] ¿Kamsañarak munpachasti: “Akat mä qawqha urunakata” sasasti? Janiw kunat parlatapsa amuyktanti —sasa.
[19] Jesusasti kuntix yatiqirinakapax jupar jiskt'asiñ munapkän uk amuyäna, ukat sarakïna: —Nayax sapxäyäsmawa: “Akat mä qawqha urunakatxa, janiw uñjkxapxitätati, ukampis uka qhipat wasitat uñjapxarakitäta” sasa. ¿Ukti jumanakax jiskt'añ munapxista?
[20] Qhanak sapxsma, jumanakax jachapxätawa, llakisipxarakïtawa, akapachankir jaqinakasti kusisipxaniwa. Ukampis, jumanakan llakimax kusisiñaruw kipstani.
[21] Kunapachatix usur warmix wawachasiski ukkhax wal t'aqhisi; ukampis wawax yurxi uka qhipatsti, uka t'aqhisitapat janiw amtaskxiti, jan ukasti, mä wawa aka uraqir apanitapat wal kusisi.
[22] Jichhasti jumanakax llakisipxtawa; ukampis nayax wasitat jumanakar uñjapxäma ukapachasti, chuymanakamax kusisiniwa, janirakiw khitis uka kusisiñ apaqapkätamti.
[23] “Uka urunsti janiw kunsa jiskt'xapxitätati. Qhanak sapxsma, kuntix nayan sutixar mayipkäta ukxa Awkix churapxätamwa.
[24] Jichhakamasti, jumanakax janiw kunsa nayan sutixar mayipktati; mayipxam, katuqapxätawa, ukhamat kusisiñampi phuqt'atäpxañamataki.
[25] “Jichhakamasti taqi akanakxa uñacht'äwinak tuqiw sapxsma; ukampis pachax purininiwa, ukkhasti janiw uñacht'äwinak tuqi parlkxapxämati, jan ukasti Awkixat qhanpach arsupxäma.
[26] Khä urunxa, jumanakax nayan sutixaruw mayipxäta; ukampis janiw Awkixar nayan jumanakatak mayiñax wakiskxaniti,
[27] pachpa Awkin jumanakar munatap layku. Diosax jumanakarux munasipxtamwa, jumanakan nayar munapxatamata, Diosat nayan jutatax iyawsapxatam layku.
[28] Nayax Awkixan jak'apat akapachar jutañatak mistunta; jichhasti Awkixan ukar kutt'xañatakiw akapach jaytawayxta” sasa.
[29] Yatiqirinakapasti sapxarakïnwa: —Jichhakuchapï jan uñacht'äwimpik qhan arsupxistaxa.
[30] Jichhax taqi kun yatitam yatipxta, janirakiw khitin jumar jiskhiñapsa munktati. Ukat nanakax Diosat jutatam iyawsapxta —sasa.
[31] Jesusasti jupanakarux sarakïnwa: —¿Jichhakit iyawsapxtasti?
[32] Ukhamax pachax purinxiwa, ukasti jichhawa, sapa mayniw taqi tuqir jaltxapxäta, nayarusti sapak jaytapxitäta; ukampis nayax janiw sapäkti, jan ukasti, Awkiw nayampïski.
[33] Taqi akanaksti sapxsmawa, jumanakan nayar iyawsatanakamat samarañ jikxatapxañamataki. Akapachansti jumanakax t'aqhisipxätawa; ukampis ch'am katxatapxam, nayax akapacharux atipjawaytwa —sasa.