[1] Nané matahai yangna besingna Yesus Énini fimiri bahana yohoniya, nu gugu bake nuguna matahai yang fe mahamu emenan niye yahae. Yang éné fi Febe, égé ahu-jemaat Kengkrea busu fikoyaha ékému bahana yoho niye Yesus Éné furubo fe yeri mahamu emesumoho.
[2] Emohoni, égé mése Nugunabo Ahuyaha Yesus kumu kotoféri arari égéni, gugu égéki hanikéri wayamu enané. Gugu Febe égéki etori hanikéri wayamu emenané mahana égéki Ala Énahu Yesus Énini fimiri beriya nugu esumu kutumu emesumériya égé kéré. Damu égé mése ahu aburoho yohowa damu hate nuwa ememere mahamu emesumoho. Emohoni, égé aneséyang rahamo ohoru rahamo kukuwoho fe rahamo ememere fimongkumaki, gugu égé mahamu enané.
[3] Gugu nané u yofiye ahainé moho nogoki Priskila bake damu énuhu Akwila yoho bake nouwané, "Gugu fake bunané." Anggo feki yoho Kristus Yesus kumu kotoféri arari égenani, yoho nu kumu kotoféri Kristus Yesus Éné furubo égéki yari berekang.
[4] Damu Priskila damu énuhu Akwila yoho nu akume méré ékému umburomenan niye akumenané mahana égéki fani mokigina deyoho. Emohoni, yoho bake kamu nu remu degi kuroho fani ememere yahae deyoho. Emohote, ahu-jemaat ahu Yahudi nahu de yoho emu-hori-daha yoho hate kotoféri yoho bake degi kuroho ememere yohonané.
[5] Damu gugu nané u yofiye ahainé moho nogoki ahu-jemaat Priskila damu énuhu Akwila yohona afahang ékému dukumahana yoho bake nouwané, "Gugu fake bunané." Damu hate nané u yofiye ahainé moho nogoki Epenetus Yesus Énini fimiri baha égé bake nouwané, "Gu fake bunu." Nu égéki woruméré. Égé ahu mumangge Asia soho ékému Kristus Yesus Énini fimiri baki égé séré.
[6] Damu nané u yofiye ahainé moho nogoki Maria bake nouwané, "Gu fake bunu." Égé mése ahu-jemaat Roma busu fikoyaha kumu bahana gugu niye furubo aburohomu yeri baki.
[7] Damu hate nané u yofiye ahainé moho nogoki Andronikus damu énahamo Yunias yoho bake nouwané, "Gugu fake bunané." Yoho nané matahai Yahudi nahu kéré. Damu nu fani Kristus Yesus Énini fimiri de damu ahu-rasul kiri bere de égéki, dakasuhumu yoho mése mumangge Kristus Yesus Énini fimiri bakena. Damu ahu-rasul fe yoho fimahanani yoho Yesus Éné sisi manggoho wayamu yosumahana nahu kiri wayamu bahana ememere yohonaukungguna. Damu yoho anggo feki nu kumu kotoféri bui kumu berekang.
[8] Damu nané u yofiye ahainé moho nogoki Ampliatus égé bake nouwané, "Gu fake bunu." Égé Nugunabo Ahuyaha Yesus kumu kotoféri arari égenani, nu égéki woruméré.
[9] Damu nané u yofiye ahainé moho nogoki Urbanus bake nouwané, "Gu fake bunu." Égé Nugunabo Ahuyaha Kristus Yesus kumu kotoféri arari éri Éné furubo yeri bahani nuguna hogi kéré. Damu hate nané u yofiye ahainé moho nogoki Stakhis bake nouwané "Gu fake bunu." Nu égéki woruméré.
[10] Damu nané u yofiye ahainé moho nogoki Apeles bake nouwané, "Gu fake bunu." Égé ukukuwoho agefekigi ikuhamahanani, égé damu modu dongkuni kugutoméri baha. Damu nugu nafamériyani égé damu Kristus Éné u dari Égéki ibiméri baha. Damu nané u yofiye ahainé moho nogoki ahu Yesus Énini fimiri Aristobulus éné afahang ékému bahana yoho bake nouwané, "Gugu fake bunané."
[11] Damu hate nané u yofiye ahainé moho nogoki nané hogi Yahudi nahu Herodion égé bake nouwané, "Gu fake bunu." Damu nané u yofiye ahainé moho nogoki ahu Nugunabo Ahuyaha Yesus Égé kumu kotoféri arari beri Narkisus éné afahang ékému bahana yoho bake nouwané, "Gugu fake bunané."
[12] Damu nané u yofiye ahainé moho nogoki Nugunabo Ahuyaha Yesus Égé niye esumu habigiyoméri furubo yahana Trifena damu énukuda Trifosa yoho bake nouwané "Gugu fake bunané." Damu hate yang fe Persis Nugunabo Ahuyaha Yesus Égé niye esumu habigiyoméri furubo yaha égé bake nouwané, "Gu fake bunu." Nu égéki woruméré.
[13] Damu nané u yofiye ahainé moho nogoki Rufus damu énéni bake nouwané, "Gugu fake bunané." Nugunabo Ahuyaha Égésé Rufus égéki kubumohoni, égéte esemu Éné furubo habigiyoméri yaha kéré. Damu énéni égé wadi gahakumu baha kéré.
[14] Damu nané u yofiye ahainé moho nogoki Asinkritus, Filegon, Hermes, Patrobas, Hermas, damu nané matahai Yesus Énini fimiri bahana yoho kumu kotoféri bahana yoho bake nouwané, "Gugu fake bunané."
[15] Damu hate nané u yofiye ahainé moho nogoki Filologus damu énahamo Yulia, damu Nereus damu énokuda yang, damu Olimpas, damu hate Ala Énahu emu-hori-daha yoho kumu kotoféri Yesus Énini fimiri bahana yoho bake nouwané, "Gugu fake bunané."
[16] Damu gugu besing fe besing fe damu yang fe yang fe bero aiyoméri damu kutumu woruméri wofusunané, "Gu de wayamu bahare?" damu "Yahae, de wayamu bere," ememere kutumu yori wofusunané. Damu ahu-jemaat emu-hori-daha Kristus Yesus Énini fimiri bahana yoho gugu bake u yofiyonané ahainé moho, "Gugu fake bunané."
[17] Emohote, nané matahai yangna besingna nu gugu bake akiya yahae: Gugu bahana ékému ahu fe hanikéri gugu ahahamenané mahana yohoki etotoméri bunané. Damu gugu ukukuwoho yokukubumahanani mése nafaméri égena égéki hate ahu fe yoho degemu yokukubumenané gugu modinanéka, yoho kotoféyonané mahana égéki etotoméri bunané. Damu gugu ahu ememere bahana yohoki hamamu bunané.
[18] Ahu ememere bahana yoho fani Nugunabo Ahuyaha Kristus Éné furubo yeri bahana deyoho. Emohote, yoho yoku yoho niye yohona sifingmu fimiri hanikigina égéki emesumahana. Damu ahu yoho bake yahamu yohonangkumaka, yohote dari bagumu haiyangne ememere fimiri degemu poréyahamu emenané mahana yoho bake yokuni yohonané. Damu yoho ahu énéyuhuwoho bake esemu yohona modu afénané hanikinané mahana éné u égéki yori yahamu yokukubumahana.
[19] Ahu emu-hori-daha yoho dagenani gugu Roma busu fikoyaha kumu beri mése Nugunabo Kristus Éné u dari u yohoto hamemere emesumahana. Damu nu guguna u égéki dari nané modu hanikéré. Damu gugu ukukuwoho wayamu égena égéki wayamu nafaméri eméri bunané, damu ukukuwoho keiyongmu égena égéki emuméri bunané.
[20] Ala nuguna modu emoné nuguna modu gemu wayamu bohowané mériya Égé séré. Ala ememere baha Égésé awe hohoi yohona ahuhabang Iblis éné habang nuguna bégé fu kumu unggusamoné. Damu nu Ala bake fisini yahae, "Nugunabo Ahuyaha Yesus, Gané modu kuyomu woruméri ahu-jemaat Roma busu fikoyaha ékému bahana yoho bake enu, emohoni yoho awe wayamu bohonané."
[21] Timotius nohogi égé nu kumu kotoféri furubo yariya. Égé ahu Yesus Énini fimiri bahana yangna besingna gugu bake u yofiyoné defené moho, "Gugu fake bunané." Damu nohogigiyoho yoku Lukius, Yason, damu Sosipater yoku nanahu Yahudi nahu kiri bahana. Damu yoho hate gugu bake u yofiyonané defené moho, "Gugu fake bunané."
[22] Tertius uku hate Nugunabo Ahuyaha Yesus kumu kotoféri arari beri u yofiyoné ahainé moho, "Gugu fake bunané." Damu Tertius égésé Paulus nané furubo mahamu eméri u yo horéni nané u nogoki dari kara nogoki mahamu unggu.
[23] Damu Gayus égé hate gugu bake u yofiyoné defené moho, "Gugu fake bunané." Damu égé nu bake yohoni éné afahang ékému osuri bereké, damu ahu-jemaat nokumu bahana yoho éné afahang ékému dukumusuméri sembayang yeri Ala Énaukungguna. Damu hate Erastus damu nuguna matahai fe Kuwartus yoho hate u yofiyonané defené moho, "Gugu fake bunané." Damu Erastus égé uku busu nokumu ahu asuféri beri aneséyang etori baha nahu we. [
[24] Nugunabo Ahuyaha Yesus Kristus Éné modu kuyomu woruméri guguki wayamu emoné gugu wayamu bohonané. Amin.]
[25] Ala Énaukumowa! Nu Yesus Kristus Éné sisi manggoho yobuwoméri yokukubuméré hamu hanéri Ala Égésé habigiyoméri bahani, Égé emoné gugu habigiyoméri Yesus Énini fimiri bohonané. Damu nu Yesus Kristus Éné sisi manggoho katugo yobuwoméri yo hohomusuméré égéki posu-posukéri kasuni éyakini, ahu yoho fani nafamakena deyoho.
[26] Emohote, katugo nogoki haharemu égé. Damu ahu fe yoho kumu nu kumu kotoféri ahu-nabi yoho Ala Éné Buku Kara ékému Yesus Kristus Éné sisi manggoho kara uwangki égéki yobuwoméri yo horiya. Damu Ala bohoné embahae posu-posukiné moho Égésé u yakito hamu hanéri nugu yobuwoméri yo horiya. Emohoni, Yahudi nahu de yoho soho hamu bahana yoho awe nafamenané, yohote haiyangne ememere fimiri Éné u dari hamemere bohonané.
[27] Damu Ala Égé esemu Ala kamisige kéré, damu Égé ukukuwoho emu-hori-daha égena égéki esumu nafaméri baha. Yesus Kristus Égé emohoni, nugu Ala Énaukumowané embahae posu-posukiné! Amin U fe karawoho.