[1] Nané matahai Yesus Énini fimiri bahana yohoniya, Ala mése gugu bake kuyomu woruméri emesumakini, gugu Égé bake dakamu wayamu emenan niye akiya yahae: Gugu guguna aduwosoho damu guguna sifing fimiri bohonané mahana égéki aguto sifing féri bahana gahakumu Ala bake kemerohonané. Damu guguna aduwosoho damu guguna sifing fimiri bohonané mahana égéki, gugu fani dosa afénan de esemu manggohomu beri Ala Éné modu hanikigi égéki emesuméri bunané. Ememere bahana nogoki ahu Yesus Énini fimiri bahana gugu esumu haiyangmu Ala bake sembayang yeri Éaukungguna égé kéré.
[2] Gugu ahu soho nokumu beri fani Yesus Énini fimiri bahana yoho keiyongmu emesumahana égéki fani hamemusumenan deyoho, meneféyané. Emohote, guguna sifing fimiri bahana égéki Ala bake kemerohonané, Ala emoné guguna sifing harahaimu fimiri degemu wayamu bohonané. Emohoni, Ala gugu niye Ala Éné sifing hanikéri emoné moho égéki nafamenan niye. U feki ukukuwoho wayamu égena égéki damu ukukuwoho Ala Éné modu hanikiné moho égéki gugusé nafamenané, damu gugu esumu haiyangmu bohonané, fe fani poréyahamu égé de égéki nafamenané.
[3] Damu Ala nu bake Éné modu kuyomu woruméri Éné furubo kurohoni, nu ahu-rasul kiri bere. Emohoni, gugu bahana ékému ahu isige-isige bake yahae: Gugu fani asuféri bahana deyohote, guku gugure fani ememere fimenan deyoho, "Nugu esumu asuféri beriya." Fani ememere fimenan deyoho, meneféyané! Emohote, gugu guguna modu amiféri guku guguki finané. U feki Ala emohoni gugu ahu isige-isige Kristus yahamutomu fimiri bahana rahamo Kristus kirimu fimiri bahana rahamo ememere deregemu Énini fimiri bahana. Ememere gugu deregemu Énini fimiri bahana hamu hanéri guguna modu amiféri guku guguki fifinané.
[4] Damu nuguna aduwosoho kamisige égéte, bero, bégé, habang, sunto, damu kiyo ememere égena. Damu énéyuhuwoho yohona furubo fani hamu hanéri égena deyoho.
[5] Hamemere nugu ahu aburohomu ériyate, nugu Kristus Yesus kumu kotoféri arari kamisigemu ériyani, Éné aduwosoho kamisige kiri égé. Damu nugu beriya ékému ahu isige-isige fete fe kumu kutumu arari kotoféri kamisigemu beriya.
[6] Damu Nugunabo Ala Éné modu esemu kuyomu woruméri nugu bake wayamu emoho. Ememere Ala Éné Ubana Hayo nugu bake habigiyo burahae deregemu égena égéki hamu hanéri kemeroho. Ala habigiyo-burahae-kemeroho fe égéki ahu yoho Ala Éné u dari hori ahu fe yoho bake yosumenané mahana égé kéré. Emohoni, ahu yohote esumu Ala u yoho égéki haiyangne ememere fimahana hamu hanéri yohonané.
[7] Damu Ala habigiyo-burahae-kemeroho fe égéki ahu yohona furubo yeri mahamu emenané mahana égé kéré. Emohoni, ahu yoho yohona modu kuyomu woruméri ahu fe yohona furubo yeri mahamu emesumenané. Damu Ala habigiyo-burahae-kemeroho fe égéki ahu yoho ahu fe yoho bake yokukubumenané mahana égé kéré. Emohoni, yoho habigiyoméri u haiyangmu égena égéki esemu yokukubumenané.
[8] Damu Ala hate habigiyo-burahae-kemeroho fe égéki ahu yoho ahu fe yoho bake akiya yohona égé kéré, emohoni yoho esemu ahu fe yohona modu afénané. Damu Ala habigiyo-burahae-kemeroho fe égéki ahu yoho habigiyoméri kukuwoho ahu fe yoho bake kuyomu kemerohonané mahana égé kéré, emohoni ahu yoho yohona modu esemu kuyoméri homereyaha kemerohonané. Damu hate Ala habigiyo-burahae-kemeroho fe égéki ahu yoho asuféri ahu fe yohoki hafuféri bohonané mahana égé kéré, emohoni yohote esemu habigiyoméri pafufoméri ahu fe yohoki hafuféri bohonané. Damu Ala habigiyo-burahae-kemeroho fe égéki ahu yoho yohona modu woruméri burahae emesumahana égé kéré, emohoni yohote ahu fe yoho bake yohona modu woruméri esumu hanikéri emesumenané.
[9] Gugu ahu yoho worumahana égéki kirimu haiyangmu worunané. Keiyongmu emesumahana égéki meneféyané. Emohote, wayamu emesumahana égéki esumu emesuméri bunané.
[10] Gugu ahu Yesus Énini fimiri bahana yoho guguna yahagisi yangna besingna gahakumu esumu kutumu worunané. Damu gugu ahu fe etori ahu asuféri baha ememere énaukuni bahana gahakumu kutumu aukuni bunané.
[11] Gugu fani burahae bohonan deyoho, mite guguna furubo yeri habigiyoméri bunané. Damu Ala Éné furubo yeri hanikéri habigiyoméri Ala bake mahamu enané.
[12] Ala gugu bake u yahamaki égéki awe esumu emoné ememere fisini fimiri bahana, emohoni asu-sawa guguna modu hanikinané. Damu sawa ukukuwoho poréyahamu égena damu ifiyo-tifiyomahanani kugutoméri bahana égéki, guguna modu dongkuni bunané. Damu gugu Ala bake u yosuméri bunané, fani modinan deyoho.
[13] Damu ahu Yesus Énini fimiri bahana yoho kukuwoho fe fimiri bohonangkumaka, yoho bake kemenorohoné. Damu sawa ahu Yesus Énini fimiri bahana yoho busu fe bohohona égéki, gugu yoho fani nafamahana deyohote, yoho bake nouwané. Emohoni, guguna kefo kiri guguna afahang ékému atunané.
[14] Ahu gugu bake poréyahamu emahana damu ifiyo-tifiyomahana yoho bake nouwané, "Nu fisini fimirini Ala gugu bake wayamu emoné." Damu Ala yoho bake poréyahamu emon niye u guni yohonan deyoho. Emohote, Ala yoho bake wayamu emon niye Égé bake nouwané.
[15] Sawa ahu yoho hanikigina égéki, kotoféri hanikinané; sawa ahu yoho efe uguna égéki, yoho kumu kotoféri efe nouwané!
[16] Gugu sifing féri bahana égéki modu kamisigemu damu sifing kamisigemu fimiri bunané. Damu gugu fani kokokéri ahu fe yoho amiféri bahanate, nugu esumu asuféri beriya ememere fimenan deyoho. Damu gugu guguna modu amiféri ahu toto karakigina nahu yoho kotoféri guguna hogigiyoho kiri arari bunané. Damu gugu fani guguki etori nugu esumu aburohomu nafamériya fani ememere fimenan deyoho, meneféyané!
[17] Damu ahu gugu bake keiyongmu emenangkumaka, yoho bake hate fani dakamu keiyongmu emenan deyoho, meneféyané. Ahu emu-hori-daha yoho etori ukukuwoho haiyangmu égena ememere fimahana égé remu enané.
[18] Damu u fe de guguki ibiméri de éyongkumaka, gugu esumu pafufoméri ahu emu-hori-daha yoho kumu kotoféri sebi yeri imo yeri bunané.
[19] Nané matahai Yesus Énini fimiri bahana yohoniya, nu guguki woruméré. Gugu ahu gugu bake keiyongmu emahana yoho bake dakamu hamu hanéri keiyongmu emenan deyoho, meneféyané. Emohote, meneféyané Ala Égésé ahu yoho bake hakereméri dakamu poréyahamu emoné. U nogoki Ala Éné Buku Kara ékému kara uwangki baha: "Ala emiyoho, 'Nu remu Nané na de égéni, Nute awe ahu keiyongmu emahana égéki hamu eme. Nu awe ahu keiyongmu emahana yoho bake hakereméri poréyahamu eme,' emiyoho."
[20] Emohoni, gugu fani ahu keiyongmu emahana yoho bake hamu hanéri keiyongmu emenan deyoho. Emohote, u Ala Éné Buku Kara kumu kara uwangki baha nogoki enané: "Gané kufe aren karakingkumaki, égé bake ohoru kunoro. Égé oho yakingkumaki, oho kunoro. Gu ememere emoho égéki gané kufe égé esumu hosumoné."
[21] Ahu gugu bake keiyongmu emahana yoho bake gugu hate hamu keiyongmu emenan deyoho, meneféyané! Emohote, gugu yoho bake wayamu emesunané. Emohoni, ahu énéyuhuwoho wakinanéte, gugute habigiyomenané.