[1] Gugu esumu haiyangne ememere fimiri ukukuwoho fe égena égéki emenangkumaka, Ala fani gugu bake poréyahamu emon deyoho. Emohote, ahu Yesus Énini fimiri bahana tuhuremu yoho fani habigiyoméri bahana deyoho, emohoni gugu haiyangne ememere fimahana égéki fani hamu hanéri fimahana deyoho. Emohoni, gugu ahu énéyuhuwoho fimahana égéki guguna modu hanikéri demoho ememere finané. Damu gugu ahu énéyuhuwoho deregemu fimahana égéki etori yoho kumu kutumu bomugasuma afénan deyoho, meneféyané!
[2] Ukusi fe ememere égé: Ahu Yesus Énini fimiri bahana ékému tuhuremu yoho habigiyoméri fimahanani ohoru koru emu-hori-daha égéki awe esemu arenané. Emohote, ahu tuhuremu yohona modu fani habigiyoméri u nogoki haiyangne fani ememere fimahana deyoho, mite yohote fimahanani ohoru koru fe awe fani arenan de, kamu sayur remu arenané.
[3] Damu ahu ohoru koru emu-hori-daha énggamsumahana yoho fani ahu sayur remu énggamsumahana yoho bake ememere dirimeféri yohonan deyoho, "Nugu wayamu emériyate, kamu sayur remu énggamsumahana gugu fani wayamu bahana deyoho." Fani ememere dirimeféri yohonan deyoho, meneféyané! Damu ahu sayur remu énggamsumahana yoho ahu ohoru koru emu-hori-daha énggamsumahana yoho bake fani ditini yohonan deyoho, "Gugu ohoru koru emu-hori-daha énggenani, gugu degemu poréyahamu emahana." Fani ememere ditini yohonan deyoho, meneféyané! Maha finané: Ala Uku fimohoni guguna matahai yoho mése Énahu kiri bahana.
[4] Damu guguna matahai yoho Nugunabo Éné u dari Éné furubo yeri bahana. Emohoni, gugu ditini yohonané mahana guguna na karawoho. Emohoni, gugu Nugunabo Éné furubo yahana yoho bake fani ememere ditini yohonan deyoho, "Gugu degemu poréyahamu emahana." Yoho yoku haiyangmu bahana rahamo poréyahamu bahana rahamo ememere yohoné moho égéki Nugunabo Égé séré. Damu Nugunabo Égé habigiyoméri bahani, yoho sifing deregemu fimiri bahana yoho bake haiyangmu emoné, yohote haiyangmu bohonané.
[5] Damu ahu tuhuremu yoho yori emiyahana, "Sawa kamisige fe esumu wayamu égéni, Ala bake sembayang yeri Énaukumowané, mite sawa tuhuremu fani wayamu égena deyoho." Emiyohonate, ahu tuhuremu yoho yori emiyahana, "Sawa emu-hori-daha égena égéki hamemere esumu wayamu égenani, nugu Ala bake sembayang yeri Énaukumowané." Gugu u nogoki yori fani kutumu bomugasuma afénan deyoho, meneféyané! Emohote, ahu isige-isige yoho yoku yoho niye yohona sifingmu haiyangne ememere fimahana égéki hamu hanéri yori inggemenané.
[6] Damu ahu sawa fe wayamu égé ememere yori inggeméri Ala bake sembayang yeri Énaukungguna égéki Nugunabo Ahuyaha Éné modu hanikin niye. Damu ahu ohoru koru emu-hori-daha arenangkumaka, yoho ohoru énggena égéki Nugunabo Ahuyaha Éné modu hanikin niye. Damu yoho fani ohoru arenan de, dakasuhumu Ala bake degi kuroho ememere yori Ala Énaukungguna égéki kubumahana. Damu ahu fani ohoru koru énggena de yoho yoku hate Nugunabo Ahuyaha Éné modu hanikin niye. Damu ahu énéyuhuwoho yoho kubumahanani yoho arenané mahana égéki mumangge Ala bake degi kuroho ememere yori Énaukungguna.
[7] Damu nugu beriya ékému ahu fe fani uku éné modu hanikin niye bohon deyoho. Damu nugu beriya ékému ahu fe fani uku éné modu hanikin niye akumon deyoho.
[8] Nugu sifing féri beriya égéki Nugunabo Ahuyaha Éné modu hanikin niye. Damu nugu akumowané mériya égéki uku hate Nugunabo Ahuyaha Éné modu hanikin niye. Emohoni, Nugu Nugunabo Ahuyaha Kristus Énahu kiri beriyani, Nugu sifing féri beriya damu akumowané mériya nogoki nugu Éné modu hanikin niye.
[9] Kristus mése kungguni, damu Ala emohoni Égéte ahu honubakiginato ékému dakamu dotaki. U égéki Kristus Égé awe ahu emu-hori-daha mése honubakiyakena yoho kumu nugu emu-hori-daha kumu damu sifing féri beriya ékému Nugunabo Ahuyaha kiri bohon niye.
[10] Emohote, gugu makemohore guguna matahai Yesus Énini fimiri bahana yoho bake kutumu ememere yori ditini yohonae?: "Gugu degemu poréyahamu emahana." Fani ememere yohonan de, meneféyané! Damu hate gugu makemohore ememere kutumu dirimeféri yohonae?: "Nugu wayamu eméri beriya. Emohote, ahu fe yohote fani wayamu eméri bahana deyoho." Fani ememere yohonan de, meneféyané! Maha u nogoki fifinané: Nugu emu-hori-daha beriya awe Ala Ahuhabang Éné abuge-kursi kumu baha Éné sama kumu dukuméri éyowané, damu Égésé awe nuguna u efefeméri degemu poréyahamu emériya égéki yori inggemoné moho kéré.
[11] U nogoki Ala Éné Buku kumu ememere yaki égéki kara uwangki égé: "Nu esumu de bere damu bahae embahae posu-posukiné. Nuku katugo nogoki u yahae méré nogoki awe haiyangmu éyoné. Ahu emu-hori-daha yoho awe Nané sama kumu Nanaukumenan niye bukumu tini uhung hori yobuwoméri emiyohonané, 'Nu Nuku Ala kéré.'"
[12] Emoho nemohoni, ahu isige-isige nugu Ala Éné sama kumu nugu ukukuwoho wayamu emesumériya égéki damu poréyahamu emesumériya égéki Égé bake ayoméri yobuwoméri utuhu haméri yohowané.
[13] Ala nuguna u efefeméri yori inggemoné mohoni, nugu kutumu ditini yori ememere yohowan deyoho, meneféyané: "Gugu poréyahamu emahana." Emohote, gugu esemu hanikéri guguna modu womu kumu ememere fimiri yori inggenané: "Nugu fani nuguna matahai mése Yesus Énini fimiri bahana yoho bake poréyahamu emowané, yohote dosa fani afénan deyoho."
[14] Damu nu Paulus Nugunabo Yesus kumu kotoféri arari ériyani, nu haiyangne ememere fimiri nafaméré égéki yahae: Nugu ohoru anggenekigina égéki areyangkumaka, nugu fani degemu poréyahamu emériya deyoho. Emohote, ahu fe yoho ohoru anggenekigina égéki arenangkumaka, yoho mése poréyahamu emahana ememere fimahana. Ahu énéyuhuwoho ememere fimahanani, ohoru anggenekigina égéki arenangkumaka, yoho dosa yahana.
[15] Damu gugu ohoru anggenekigina égéki mése énggenani, guguna matahai tuhuremu yoho gugu ohoru énggena égéki etori yohona modu budiyahangféri bohonangkumaka, gugu ohoru énggena égé niye guguna matahai yohoki fani etori worumahana deyoho. Damu gugu ohoru énggena égéki emohoni guguna matahai yoho fani tafe Yesus Énini fimiri bohonan de kiyoho. Emohoni, gugu fani ememere emenan deyoho, meneféyané! Maha u nogoki finané: Kristus soho nokumu deri guguna matahai énéyuhuwoho niye mése kunggu kéré.
[16] Emohoni, gugu ukukuwoho manggohomu égena ememere fimahana égéki emahanani, guguna matahai Yesus Énini fimiri bahana yoho emiyohonané, "Gugu emahana égéki fani manggohokigi deyoho." Ememere yohonangkumaka, gugu fani emenan deyoho, meneféyané.
[17] Ala Nuguna Ahuhabang kiri nuguki hafuféri baha égéki nugu ohoru makerahare areya damu oho makerahare amiya ememere égena éné u nogo deyoho. Emohote, Ala Ahuhabang kiri nuguki hafuféri baha égéki Éné Ubana Hayo Éné habigiyo féri emohoni, nugu Ala Éné u dari Éné sama kumu haiyangmu bohowané; u fe karakigini, nuguna modu gemu wayamu bohowané; nuguna modu hanikéri bohowané ememere bohowané.
[18] Ahu ememere beri Kristus Éné furubo yahana yohoki Alasé etori Éné modu hanikiné. Damu hate ahu fe yoho ahu énéyuhuwoho etori hanikéri yohonaukumenané.
[19] Emohoni, marohoné, nugu esemu ukukuwoho wayamu égena égéki pafufoméri emesumowa! Emohoni, nugu ahu fe Yesus Énini fimiri bahana yoho kumu u fe karawohote, nuguna modu gemu wayamu bohowané. Damu nugu mése ahu énéyuhuwoho yoho kumu kutumu mahamu emériyani, nugu kotoféri esemu habigiyoméri Yesus Éné u dari u yohoto hamemere bohowané, damu tafe habigiyoméri bohowané.
[20] Damu ahu tuhuremu yoho fimahanani ohoru anggenekigina égéki fani arenan deyoho. Emohote, gugu ohoru anggenekigina égéki énggena. Gugu ememere ohoru énggena égé féri Ala Éné furubo yeri mése wayamu emoho égéki fani poréyahamu emenan deyoho. Nugu Yesus Énini fimiri beriyani, ohoru emu-hori-daha égéki awe esumu areyané. Emohote, gugu ohoru anggenekigina égéki énggenani, ahu fe Yesus Énini fimiri bahana yoho guguki etori dosa afénangkumaka, gugu poréyahamu emahana kéré.
[21] Damu gugu ohoru koru énggenani, guguna matahai Yesus Énini fimiri beri fani ohoru koru énggena de yoho awe dosa afénangkumaka, gugu fani ohoru koru arenan deyoho, meneféyané. Damu gugu anggur noho miginani, guguna matahai Yesus Énini fimiri beri anggur noho fani migina de yoho dosa afénangkumaka, gugu fani anggur noho aminan deyoho, meneféyané. Damu gugu fani emahana de égéki esumu wayamu égé.
[22] Damu gugu ukukuwoho fe emahana égéki Ala Éné sama kumu haiyangmu égé ememere fimenangkumaka, u égéki kamu Ala bake yobuwoméri yori kotoféri nafaméri bunané. Damu ahu yoho Ala Éné sama kumu ukukuwoho haiyangne ememere esumu fimiri emesumahana. Emohoni, yoku yohore degemu poréyahamu emahana fani ememere ditini yohonan dekumaka, ahu énéyuhuwoho yohona modu esumu hanikinané.
[23] Emohote, gugu ohoru fe anggenekigina égéki arenané mahana égéki, ohoru égé arena rahamo modina rahamo ememere gagitoméri homereyaha arenangkumaka, gugu fani haiyangne ememere fimiri emahana deyoho. Emohoni, gugu poréyahamu emahana kéré. Emoho nemohoni, nugu haiyangne fani ememere fimiri ukukuwoho emowan dekumaka, nugu dosa yariya kéré.