[1] Nané matahai Yesus Énini fimiri bahana yohoniya, nu nané matahai Israel nahu yoho niye butumu fimiri damu Ala bake u yosuméri bere. Ala bake u yosuméré égéki Égé nanahu yohoki awe umburomon niye.
[2] Damu nu nané kiyomu etori nafaméré égéki yahae: Israel nahu yoho esumu hanikéri habigiyoméri Ala Éné sifing fimiri emoné moho égéki kotoféyonan niye pafufomahana. Emohote, yoho Ala Éné sifing fimiri emoné moho égéki kotoféyonané mahana égéki fani haiyangmu nafamahana deyoho.
[3] Damu Ala ahu dosa yahana yohoki haiyangmu emoné damu Énahu kiri aféné moho égéki yohosé fani nafamahana deyoho. Emohoni, yoho yoku yohona sifingmu fimiri Ala yohoki Énahu kiri afén niye yohona habigiyo féri pafufomahana. Yoho ememere emahanani, Ala Ukuné sifingmu fimiri ahu yohoki haiyangmu emoné damu Énahu kiri aféné moho égéki fani dari kotoféyahana deyoho.
[4] U feki Kristus Égé deri nuguna dosa tobunsuméri umburomoné moho. Emohoni, ahu yoho Musa éné hukum emu-hori-daha dari u yohoto hamemere emenangkumaka, Ala ahu énéyuhuwohoki Énahu kiri aféné moho égéki Kristus Égésé eméri feyahafumoho. Emoho nemohoni, katugo nogoki Ala ahu isige-isige Kristus Énini fimiri bahana yohoki Énahu kiri aféné.
[5] Ahu yoho anggo posuyahaki Musa éné hukum emu-hori-daha yohoto hamemere emenangkumaka, emohoni Ala yohoki Énahu kiri yaha ememere Musa kara uwangki baha: "Ahu hukum emu-hori-daha égena égéki hamesumahana yohosé ememere emahanani, awe bohonané embahae posu-posukiné."
[6] Emohote, ahu yoho Kristus Égé yoho niye emoho égéki haiyangne ememere fimiri bahana égé féri Ala yohoki haiyangmu eméri Énahu kiri yaha. U nogoki ememere yohona: "Guguna modu kumu ememere yohonan deyoho, meneféyané: 'Ahu menohosé awe Ala Éné busu mene ékému atune?' (Emohoni, Yesus Égéki awe yeri miyoné.) Damu 'Ahu menohosé awe ahu hosanggigina yoho hori kidabahanato ékému awe oguwone?' " (Emohoni, Yesus awe yeri musoné.)
[8] U nogoki u fe makerahare? U feki ememere kara uniyéré: "Ala Éné u yofiyoho daha égéki mése gugu kumu esumu takenamu égena. U égéki guguna hato kumu yohona, damu guguna modu kumu yeri égena." Kristus Égé ahu yoho niye emoho égéki haiyangne ememere fimahana égé féri Ala ahu yohoki Énahu kiri yaha éné u égéki takenamu égé. U égéki nugu gugu bake yobuwoméri yosumériya égé kéré.
[9] Gugu guguna hato féri Yesus Égé Nugunabo kéré ememere yobuwoméri yohonangkumaka, damu guguna modu féméri Ala mése emohoni Yesus ahu honubakiginato ékému dakamu dotoho égéki haiyangne ememere fimenangkumaka, emohoni Ala guguna dosa tobunsuméri umburomoné.
[10] Ahu yoho yohona modu féméri Yesus kuni dakamu dotoho égéki haiyangne ememere fimahanani, Ala yohoki emohoni haiyangméri bahana damu yohoki Énahu kiri yaha. Damu ahu yohona sama kumu yohona hato féri Yesus Nugunabo kéré ememere yobuwoméri yohonangkumaka, Ala yohona dosa tobunsuméri umburomoné.
[11] Damu Ala Éné Buku womu kumu ememere mése kara uwangki baha: "Ahu Énini fimiri bahana yoho awe fani yohona modu gikiro aunan deyoho."
[12] Ala u yoho nogoki ahu emu-hori-daha yoho niye fani deregemu emoho deyoho: Ala Yahudi nahu yoho damu Yahudi nahu de yoho umburomon niye hamu hanéri emoho. Ala kamu kamisige bahani, ahu emu-hori-daha Énini fimiri bahana Yohonabo kiri baha kéré. Damu ahu énéyuhuwoho Égé bake yohoki mahamu emon niye yohonangkumaka, emohoni Égé Éné modu kuyomu woruméri komukuni wayamu emoho kéré.
[13] U nogoki Ala Éné Buku Kara kumu ememere kara uwangki baha: "Ahu menohosé Nabo Ala nuki umburonu ememere yohongkumaki, Nugunabo Égé awe ahu égéki umburomoné."
[14] Emohote, ahu fani Kristus Énini fimiri bohonan dekumaka, yoho Égé bake yohoki mahamu emon niye yohonane? Karawoho! Damu ahu fani Éné sisi areyonan dekumaka, yoho Énini fimiri bohonane? Karawoho! Damu ahu fani Éné sisi yobuwoméri yohonan dekumaka, ahu fe yoho Éné sisi areyonane? Karawoho!
[15] Damu Ala ahu yoho fani kusumoné defenan dekumaka, ahu yoho deri Kristus Éné sisi égéki yobuwoméri yohonane? Karawoho! Ala kusumoné ahu yoho defenané mahana éné u nogoki Ala Éné Buku Kara ememere kara uwangki baha: "Ala kusumohoni ahu u manggoho yeri dahanani, ahu fe yohona modu esumu hanikigina."
[16] Emohote, Ala kusumohoni ahu yoho deri Yesus Éné sisi manggoho yosumahanate, fani ahu emu-hori-daha yoho hanikéri dagena deyoho: Ahu tuhuremu yoho hanikéri dagenate, ahu aburoho yoho fani hanikéri dagena deyoho. U nogoki ahu-nabi Yesaya ememere kara uwangki baha: "Nabo Ala, nugu ahu yoho bake Gané u yoriyate, kamu ahu yahamuto yoho haiyangne ememere fimiri bahana!"
[17] Emohoni, nugu Kristus Éné sisi dariyani, nugu haiyangne ememere fimiri beriya, damu ahu yoho Kristus Éné sisi yo hohonani, nugu sisi égéki dariya.
[18] Emohote, nu u fe abamu yahae, "Israel nahu yoho mése Kristus Éné sisi égéki mése dagenae?" Yahae, yoho mése dagena. Ala Éné Buku Kara womu kumu ahu Kristus Éné sisi yo hohona u égéki ememere kara uwangki baha: "U manggoho yo hohona égéki soho emu-hori-daha ékému hohona. Damu yohona u manggoho égé yofiyahanani hori soho tuhu kumu hori soho tuhu kumu égé."
[19] Emohote, nu tafe u feki abamu yahae, "Israel nahu yoho Kristus Éné sisi égéki nafamahanae?" Yahae, yoho nafamahana. Emohote, yoho Kristus Égéki undomahana. U nogoki mumangge Ala Israel nahu yoho bake u yoho égéki Musa égésé dari ememere kara uwangki baha: "Nu awe Nanahu de yohoki wayamu emeni, gugu yohoki etori modu kimenané. Damu ahu fani Nuki nafamahana de yohoki wayamu emeni, gugu yohoki etori guguna modu hakeremenané."
[20] Damu ahu-nabi Yesaya égé fani mokigi de égé habigiyoméri Ala Yahudi nahu de yohona u yoho égéki ememere u yaki: "Ahu fani Nanini agugumahana de yoho mése Nuki gebuuguna. Damu ahu fani Nané sisi abamu yohona de yoho bake Nuku mése kibikubuméré."
[21] Emohote, Ala Israel nahu yohona sisi yoho égéki ahu-nabi Yesaya dari ememere kara uwangki baha: "Yoho Nu bake defenangkumaka, Nu hanikéri yoho wayamu eme niye sawa yorung Nané bero féri kusuméré hoho yaki. Emohote, yoho gung botokéri Nané u fani dagena de ansakuméri bahana."