[1] Namu Timotius, gu ahu Yesus Énini fimiri beri ahu yohonabogiyoho yohona u dari furubo yahanate aneséyang fani yahana de yoho bake yokukubunu, emohoni yohote yohonabo yoho asuféri bahana ememere fimiri damu yohona u dari u emu-hori-daha égéki wayamu etori bohonané. Ememere emenangkumaka, ahu fe yoho Ala bake dirimeféri yohonan deyoho damu nugu u haiyangmu yokukubumériya égéki fani haiyangmu égé deyoho ememere yori dirimeféri yohonan deyoho.
[2] Damu yohonabogiyoho Yesus Énini fimiri bohonangkumaka, ahu yohonabogiyoho yohona furubo yahana yoho fani ememere fimenan deyoho, "Nugunabo yoho nugu kumu kotoféri Yesus Énini fimiri beriyani, nuguna yahagisi kéré. Emohoni, yohona u fani areyowan deyoho." Ahu menohosé ememere fimiri fani énabo éné u dari furubo wayamu aféna dekumaki, égé bake nou, emohoni égéte fani ememere emon deyoho. Damu yohonabogiyoho hate yoho kumu kotoféri Yesus Énini fimiri bahana, damu yoho yohona furubo yahana yohoki worumahana. Emohoni, ahu yohonabogiyoho yohona furubo yahana yoho esemu yohonabo yohona u dari yohona furubo yeri wayamu emenané. Damu nu gu bake u harahai fe awe yahae, emohoni ukukuwoho harahai emu-hori-daha égéki akiya yori yokukubunu.
[3] Ahu tuhuremu nugu yokukubumériya égéki fani hamemere yokukubumahana deyoho. Nugunabo Ahuyaha Yesus Kristus haiyangmu yokukubumoho égéki yohosé haiyangne fani ememere fimahana deyoho. Yoho hate ahu yoho emenané Ala Éné modu hanikiné moho égéki fani yokukubumahana deyoho.
[4] Damu ahu ememere égena yoho yoku fimahana, "Ahu fe yoho yahamutomu nafamahanate, nugusé esemu aburohomu nafamériya." Ememere fimahanate, yoho fani femu nafamahana deyoho. Emoho nemohoni, yoho hanikéri u fe u fe efefeméri u égéki hanggerakéri bomugasuma kemahana, emohoni yohona habang haimoho. Damu yoho yokukubumahana égéki emahanani, ahu fe yoho wayamu égena égéki etori modu kimahana, damu ahahaméri gogo fe gogo fe deregemu dukumahana, damu ahu fe éné sisi yahamu yori hahafeyohona, damu kukuwoho fe wayamu égé de égéki homereyaha poréyahamu fimahana.
[5] Damu yoho u fe hanggerakéri efefeméri damu u égéki bomugasuma kemahana égéki fani mungguna deyoho. Damu ahu yohona sifing égéki mése poréyahakigi, damu fani haiyangmu égé égéki nafamahana deyoho. Yoho Ala Éné u yokukubumenangkumaka, yoho esemu toto aburoho yeri bohonané ememere fimahana.
[6] Emohote, nugu Ala Éné modu hanikiné moho égéki nafaméri hamemere emowa. Ememere eméri nuguna na égena égéki degigi ememere fimiri bohowangkumaka, uku de esumu wayamu égé. Damu nugunéni nugu asufiyaki égéki, nugu kukuwoho fe fani yeri derekang deyoho. Damu hamemere nugu akumangkumaka, kukuwoho fe fani yeri ahayan deyoho. Emohoni, nuguna kukuwoho etori beriya nogo remu nuguna na we.
[8] Emohoni, nuguna ohoru areyané mériya damu nuguna ifita kumowané mériya de éyongkumaka, nuguna na égena égéki degigi ememere fimowa.
[9] Emohote, ahu toto aburoho afénané ememere fimahana yoho de bahana. Yoho esumu toto aburoho afénan niye butumu fimahanani, yoho keiyongkéri eméri dosa afénané. Yoho yohona sifingmu fimiri emesuméri bahanani, yoho ohoru waya kufiyoho ékému uguna gahakumu hohoi yohona ahuhabang Iblis éné waya kumu osuri funé. Damu ahu toto aburoho afénan niye fimahana égéki emoné, yokuné ha kungguna, damu yoho ememere butumu fimahana wogoki awe emoné yohona ha kuni poréyahamu éyoné.
[10] Damu ahu fe égé aneséyang aburoho afén niye butumu fimohoni, égé awe ukukuwoho aburohomu deregemu keiyongkéri awe emoné. Ahu tuhuremu aneséyang aburoho afénan niye fimiri ememere bahanani, yoho Yesus Éné sisi manggoho yokukubumériya égéki fani tafe haiyangne ememere fimahana de mungguna. Damu yoho u fe aburohomu poréyahamu égena égéki gebuuri yoku yohona aduwosoho ugunani kugutomahana gahakumu égena.
[11] Emohote, namu Timotius gu Ala Énahu kéré. Emohoni, gu ukukuwoho keiyongmu égena égéki hamamu beri wayamu etori ena, damu habigiyoméri u haiyangmu égé égéki enu, damu Ala Éné modu hanikiné moho égéki ahu fe yoho bake yori enu, damu Kristus Yesus Énini fimiri bunu, damu ahu fe yoho worunu. Damu u agefikigina égéki gebuuri kugutoméri bahate, guku fani Yesus munggu de damu Égé kotoféri ena, damu fani singbotokéri bohon de hafumu kuyoméri bunu.
[12] Damu gu Ala Yesuski kubumu yohoni Ahuhabang kiri baha ememere fimiri baha. Emohoni, ahu yoho gané u dari ansakuméri yohona, damu ukukuwoho aburohomu poréyahamu égena égéki gebuugu. Emohote, gu bohoné embahae posu-posukiné moho égéki butumu fimiri etori bunu. Ememere bohoné moho nogo niye Ala Égésé gané fi iri guki kubumu yoho kéré. Damu gu ahu aburoho dukumahana yohona sama kumu mése Ala Yesuski kubumohoni Ahuhabang kiri baha Énini fimiri bere ememere ayoméri wayamu yobuwoméri yoho kéré.
[13] Nu Nugunabo Ala damu Kristus Yesus yohona kiyomu etahana yohona sama kumu gu bake u e yoré égéki ukuni bunu. Ala Égé emohoni ukukuwoho emu-hori-daha égena égéki sifing féri bahana. Damu Yesus Égé Roma nahu yohona ahuhabang-gubernur Pontius Pilatus éné sama kumu éri u haiyangmu yoho.
[14] Gu u fe fani degemu poréyahamu emon deyoho, emohoni ahu fe fani gu bake dirimeféri yohon deyoho. Damu Kristus Éné u mése dari u yohoto hamemere haiyangmu enu, embahae Nugunabo Ahuyaha Yesus Kristus dakumu defené.
[15] Sawa Ala Uku mése yori inggemaki égéki Égé emoné Nugunabo Ahuyaha Yesus awe dakumu defené. Ala manggohokigi ememere yori Énaukumériya Égé séré. Égé Ala kamisige ahu yoho hafuféri baha Égé séré. Égé ahuhabang-raja emu-hori-daha égena ékému Yohona Ahuhabang-Raja kéré, damu yohonabo emu-hori-daha égena ékému Yohonabo kiri baha.
[16] Damu kamu Égésé fani akumon deyoho, damu Égé kakani hori égéto ékému bahani esemu kakani hori égé, damu ahu fe fani Égéki takenamoho deyoho. Damu ahu fe yoho fani Égé etosumahana deyoho, damu ahu fe fani Égéki etohon deyoho. Damu nu fisini fimirini ahu yoho Ala Éné u dari hanikéri bohonané, damu Égé esumu habigiyoméri bohoné embahae posu-posukiné. Amin!
[17] Damu namu Timotius, ahu toto aburoho yeri soho nokumu bahana yoho bake nou. Yoho ememere fimahana, "Ahu fe yoho fani manggohomu bahana deyohote, nugusé esemu manggohomu beriya." Emohoni, yoho bake nouni, yoho yohona aneséyang égéki fani uku damu éri kebemu éyon deyoho ememere nafaméri yoho fani kamu aneséyangni fisini fimiri bohonan deyoho. Damu hate yoho bake nou, emohoni Ala kukuwoho fimahana égéki esumu kurohoné. Damu kukuwoho emu-hori-daha égéki Éné modu kuyoméri yoho bake kurohoné, emohoni yohote hanikéri afénané ememere nafaméri Alani ibimiri bohonané.
[18] Damu hate yoho bake nou, emohoni yoho aneséyang aburohomu égena hamemere aburohomu wayamu emesuméri bohonané. Damu hate yoho bake nou, emohoni yoho yohona modu kuyomu ahu aneséyang rahamo kukuwoho rahamo ememere fimiri bahana yoho bake hanikéri kemerohonané.
[19] Ememere ahu toto aburoho bahana yoho wayamu emenangkumaka, emohoni yoho wayamu emesumahana égéki toto éné ka siyahakigi gahakumu yoku yoho niye Ala Éné busu mene bahato ékému kufiyonané. Emohoni, yoho awe bohonané embahae sawa fe defengkumaka, yoho awe hokumu wayamu bohonané.
[20] Namu Timotius, Ala gané fi iri gu bake furubo kuraki égéki fani modin de yeri esumu etori enu. Damu Ala Éné modu hanikin niye sisi soho nokumu fani haiyangmu égena de égéki fani areyon de, menefé. Damu Yesus Éné sisi manggoho haiyangmu yokukubumériya égéki ahu fe yohote geiméri yohona. Damu tinibiyakuni yoho yokukubumahana égéki haiyangmu nafamahana kéré ememere yohona égéki fani areyon de, menefé. Emohote, yoho u yohona égéki fani haiyangmu égé deyoho.
[21] Ahu tuhuremu degemu poréyahamu yokukubumahana égéki haiyangne ememere yobuwoméri yohona. Damu ememere yokukubumahana égéki emahanaka, damu yoho Yesus Éné sisi manggoho égéki fani tafe haiyangne ememere fimiri bahana deyoho. Damu nu Ala bake gugu niye fisini yahae, "Nugunabo Ala yoho bake Gané modu kuyomu woruméri enu," ememere yoré. U fe karawoho.