[1] U fe ememere égé: Ahu asuféri ahu-jemaat hafuféri baha égé de baha. Emohoni, ahu menohosé ahu asuféri ahu-jemaat hafuféri bohoné ememere fisini fimongkumaki, ahu égé furubo esumu manggohomu égé égéki afén niye fisini fimoho. U ememere égé nogoki haiyangne.
[2] Emoho nemohoni, ahu asuféri ahu-jemaat yoho hafuféri baha égé ememere esemu wayamu bohoné: Ahu égé éné u fe fani degemu poréyahamu emon deyoho. Damu énahamo kamisige yeri wayamu etori baha, damu égé fani yang aburoho afén deyoho. Damu égé uku éné modu damu éné aduwosoho degemu poréyahamu fimiri emoné moho égéki ukuni hafuféri bohoné. Damu u fe de éyongkumaki, égé u égéki esumu aburohomu nafaméri wayamu emesuméri bohoné. Damu égé haiyangmu bahani, ahu aburoho yohote égéki yauri bohonané. Damu égé uku éné afahang kumu wayamu fengféyori ahu kefo dahana yoho wayamu emoné. Damu égé habigiyoméri ahu fe yoho bake yokukubumoné.
[3] Damu égé fani oho migamsuméri wambumusumon deyoho. Damu égé uma fani afén deyoho, mite égé kuyomu woruméri emoné. Damu fani aneséyangni butumu fimiri bohon deyoho.
[4] Damu égé hate esumu asuféri nafaméri énahamo damu énamkesiyo damu ahu éné afahang kotoféri bahana yohoki hafuféri wayamu bohoné. Damu égé énamkesiyo yokukubumoné, emohoni énamkesiyo yohote yohonabo hanikéri éné u dari wayamu bohonané.
[5] U feki ahu asuféri ahu-jemaat hafuféri bahana yoho yoku énahamo damu énamkesiyo damu ahu éné afahang kotoféri bahana yohoki fani wayamu hafuféri etori bohon dekumaki, égé Ala Éné jemaat yohoki wayamu hafuféri etori bohone? Karawoho.
[6] Damu ahu asuféri ahu-jemaat yohoki hafuféri bohoné moho éné fi iri kubumenané mahana égéki, ahu fe kageto age Yesus Énini fimiri baha égéki fani kubumu yohonan deyoho. Ahu kageto Yesus Énini fimiri baha égéki kubumu yohonangkumaka, embahae égété esumu éné modu kokokiné, damu anggo posuyahaki hohoi yohona ahuhabang Iblis kokokéri poréyahamu emakini, Ala Iblis bake poréyahamu emaki hamemere Ala ahu égéki poréyahamu emoné.
[7] Damu hate ahu asuféri ahu-jemaat hafuféri baha égé uku éné fi esemu wayamu etori bohoné. Emohoni, ahu fani Yesus Énini fimiri bahana de yoho hate égéki etori énaukumenané. Emohote, égé fani ememere bohon dekumaka, ahu fani Yesus Énini fimiri bahana de yohote awe égéki dirimeféri yohonané. Damu hohoi yohona ahuhabang Iblis égé ahu asuféri ahu-jemaat hafuféri baha égéki ikuhamoné, damu égéte donggomiri hohoi yohona ahuhabang Iblis éné waya ékému funé.
[8] Damu ahu tuhuremu ahu-jemaat mahamu emahana yoho de bahana: Ukusi feki yoho ahu-jemaat bahana ékému ahamo Yesus Énini fimiri bahana yohoki mahamu emahana, damu besing yoho rahamo yang yoho rahamo yohona gogo dukumusuméri Ala bake sembayang yeri Énaukungguna égéki hafuféri mahamu emesumahana. Emohoni, ahu ahu-jemaat mahamu emahana yoho hate ememere esemu wayamu bohonané: Yoho esumu wayamu bohonané, emohoni ahu tuhuremu yohote yohonaukumenané. Damu yoho u kabeng ukumamu fani yahamu yohonan deyoho. Damu oho fani aburohomu miri wambumenan deyoho. Damu yoho fani kamu aneséyangni butumu fimiri bohonan deyoho.
[9] Damu yoho Ala yobuwoméri Yesus Éné sisi manggoho yoho égéki dari esumu haiyangne ememere fimiri bohonané; yohona modu ugunate, u fe karawoho ememere haiyangmu bohonané.
[10] Namu Timotius, gu yoho kubumu yohoné moho égéki, dakasuhumu yohoki hate ikuhanu. Yoho u fe fani poréyahamu emahana deyoho, emohoni ahu yoho fani ditini yohonan dekumaka, kubumu nou. Emohoni, yohote Ala Éné furubo nogoki yeri ahu-jemaat yohoki mahamu emenané.
[11] Ahu ahu-jemaat mahamu emahana yoho emesuméri bahana hamemere yohonahamo hate esumu wayamu emesuméri bohonané, emohoni ahu fe yoho yohonaukumenané. Damu yoho fani ahu fe yoho bake dirimeféri yosuméri bohonan deyoho. Damu yoho yoku yohona modu damu yohona aduwosoho degemu poréyahamu fimiri emenané mahana égéki ukuni hafuféri etori bohonané. Damu yoho u yahamahana égéki hamemere emesuméri bohonané.
[12] Damu ahu ahu-jemaat mahamu emahana yoho yohonahamo kamisige yahanate, fani aburoho afénan deyoho. Damu yoho esumu wayamu nafaméri yohonahamo damu yohonamkesiyo damu ahu éné afahang bahana yohoki wayamu hafuféri etori bohonané.
[13] Yoho ahu-jemaat yohoki wayamu mahamu emenangkumaka, yoho wayamu emesuméri bahana, emohoni ahu-jemaat tuhuremu yoho bake ahu manggohokigi ememere yori yohonaukumenané. Damu yoho habigiyoméri Kristus Yesus Énini fimiri bahana yohona sisi égéki ahu fe yoho bake yosumenané.
[14] Nu fisini hanikéri kakumu gu bake deri gebufu méréte, u emu-hori-daha égéki nu kara nogoki éuni.
[15] Emohoni, nu gu bake kebemu defekumaki, gute kara uni nogoki etori awe ememere nafamoné: Ahu Yesus Énini fimiri bahana yoho Ala Énamkesiyo kiri bahanani, yohona matahai Ala Énamkesiyo kiri yangna besingna ememere bahana yoho kumu kotoféri haiyangmu emesuméri bohonané mahana égéki gusé nafamoné. U feki Ala Énamkesiyo kiri bahana yohosé Ala damu de baha Éné jemaat kéré. Damu Ala Éné jemaat yohote Yesus Éné sisi manggoho haiyangmu égé égéki dari emesuméri etori bohonané, damu yohote ahu fe yoho bake yokukubumenané. Emohoni, Yesus Éné sisi manggoho haiyangmu égé égéki fani degemu éyon de esumu habigiyoméri de éyoné.
[16] Haiyangne! Nugu nafamériyani nugu Kristus Yesus Éné sisi manggoho égéki haiyangne ememere fimiri beriya égéki esumu wayamu égé. Anggo posuyahaki Ala Kristus Éné sisi manggoho fani yobuwoméri yaki deyoho, emohote kageto nogoki nugu bake yobuwoméri yohoni nafamériya: "Kristus Ahu hayang kiri soho nokumu kibikubumaki. Ala Éné Ubana Hayo Égésé ememere kubumaki, 'Égé Ala Énamu kéré.' Damu malaikat yohosé Égé baha égéki yohona kiyomu etori nafamakena. Damu ahu-rasul yoho Éné sisi manggoho égéki ahu soho emu-hori-daha bahana yoho bake yo hohomusumakena Emohoni, ahu busu-busu hamu soho nokumu bahana yohosé dari Énini fimiri bakena. Damu Ala emohoni Égé Ala Éné busu mene ékému osuwaki."