[1] Emohoni, nu mumangge akiya yahae: Namu Timotius, gu ahu-jemaat yoho bake ememere yokukubunu: Ahu Yesus Énéné fimiri bahana gugu ahu emu-hori-daha Yesus Énini fimiri bahana yoho niye esumu Ala bake nouwané. Damu ahu fe yoho ukukuwoho fimiri bahana égéki Ala bake fisini nouwané, emohoni Ala yohoki mahamu emoné. Damu Ala bake ahu emu-hori-daha yoho niye degi kuroho ememere nouwané!
[2] Damu gugu ahuhabang yoho damu ahu emu-hori-daha habigiyoméri ahu tuhuremu yohoki hafuféri bahana yoho niye Ala bake nouwané. Emohoni, ahu énéyuhuwohote nuguki wayamu hafuféri bohonané, nugu ememere bohowané: Nugu awe gemu wayamu bohowané, damu ahu fe yoho nuguna ahai fani asinan deyoho. Damu nugu Ala Éné u dari Éné modu hanikiné moho égéki emesuméri bohowané. Damu nugu fani dosa aféyan de wayamu bohowané, emohoni ahu tuhuremu yoho nugu bake ahu manggohokigi ememere nugunaukumenané.
[3] Ememere nugu ahu emu-hori-daha yoho niye Ala bake yohowané mériya égéki haiyangne. Damu ememere u yohowangkumaka, Ala nuguna dosa tobunsuméri umburomoné moho Éné modu hanikiné.
[4] Damu Ala Égé ahu emu-hori-daha yohona dosa tobunsuméri umburomoné moho égéki fisini fimoho. Damu ahu emu-hori-daha yoho Yesus Éné sisi manggoho égéki haiyangne ememere fimiri nafamenané mahana égéki Alasé fisini fimoho.
[5] Damu Ala de kamisige baha. Kristus Yesus de kamisige baha. Damu Égésé emohoni Ala kumu ahu yoho kumu kutumu sebi yeri bahana. Damu Kristus Yesus Égésé Ahu hayang kéré.
[6] Damu Égé ahu emu-hori-daha yohona dosa tobunsuméri umburomon niye ahu Égéki ahai siri bemahana yoho bake Uku Éné aduwosoho kuroho. Damu sawa Ala mése yori inggemaki hamu hanigi égéki, Ala kubumu yohoni Yesus ahu emu-hori-daha yoho umburomon niye yedi abuwomoho. Emohoni, nugu etori wayamu nafamériyani Ala ahu emu-hori-daha yoho umburomoné moho égéki fisini fimoho kéré.
[7] Emoho nemohoni, Yesus mése nané fi iri nuki kubumu yohoni, nute ahu-rasul kiri busu fe busu fe hori Éné sisi manggoho nogoki yobuwoméri yo horé. U katugo éyoré nogoki haiyangne, damu fani yahamu yoré deyoho. Damu hate nuki kubumu yohoni, nute Yesus Éné sisi manggoho haiyangmu égé égéki Yahudi nahu de yoho bake yokukubume, damu yohote dari Énini fimiri bohonané.
[8] Emoho nemohoni, ahu Yesus Énini fimiri bahana yoho dukuméri sembayang yeri Énaukumenané mahana égéki, ememere enané: Ahu besing ahu Yesus Énini fimiri bahana yohona sama kumu Ala bake yobuwoméri yohonané mahana égéki, ahu besing fani dosa afénan de sifing kamisigemu Alani fimiri wayamu bahana yohosé Ala bake yohonané. Damu yoho Ala bake yohona bero kusumahana atuni Ala bake yohonané mahana égéki, yohona modu esumu fani ahu fe hakeremenan deyoho, damu hate esumu ahu fe kumu uma fani afénan deyoho.
[9] Hamemere yang yoho ifita esumu manggohokigi kunggunani, ahu fe yoho etori ahu égé ifita manggohokigi égéki kunggu ememere yohonané mahana égéki modinané. Damu fani habang mohong asinan deyoho. Damu yohona haha iyobégé-emas hate iyobégé-mutiara damu ifita ememere aneséyang éné ka siyahakigi égéki fani kumenan deyoho. Ememere emahana égéki yang yoho toto aburoho bahana yohona modu kokokéri égena ememere kubumahanani, fani ememere emenan deyoho. Emohoni, yang yoho ifita wayamu égéni kukumusumahana égé féri kumenané, emohoni ahu yohote etori hanikinané.
[10] Damu yang yoho esumu wayamu emesuméri bohonané. Emohoni, ahu fe yoho etori yohonaukumenané. Ememere bahana égéki yang yoho yoku Ala Éné u dari Ala Éné modu afénan niye wayamu emesumahana égéki kubumoho. Yang Yesus kotoféri bahana yoho ememere bahana égéki haiyangne.
[11] Damu ahu Yesus Énini fimiri bahana gugu dukuméri sembayang yeri Énaukumenané mahana égéki, besing yoho yokukubumahana égéki yang yoho weikéri yohona modu amiféri esumu dari bohonané.
[12] Yang yoho fani besing yoho yokukubumenan deyoho. Esumu meneféyané. Damu yang yoho besing yohoki hafuféri bohonan deyoho, meneféyané. Yang yoho besing yoho yokukubumahana égéki dari weikéri bohonané.
[13] Yang yoho ememere emenané mahana éné u égéki Ala mumangge Adam emohoka, damu mo Hawa emoho kéré.
[14] Damu hohoi yohona ahuhabang Iblis Adam bake fani yahamu yoho deyohote, yang égé bake yahamu yohoni, ememere Hawa uku Ala Éné u yoho égéki nahangkunggu kéré.
[15] Damu Hawa dosa yahani Ala égé bake poréyahamu emoho. Emohoni, Hawa éné go yang ofo afénané mahana égéki yohona koku kirimu haimahana. Emohote, yang yoho uku ememere éyonangkumaka, Ala yohona dosa tobunsuméri umburomoné: Yoho Nugunabo Ahuyaha Yesus Énini fimiri bohonané, damu yoku damu ahu fe yoho woruméri bohonané, damu Ala Énahu kiri Éné u dari esumu manggohomu bohonané, damu ahu yoho haiyangne ememere fimahana égéki emesuméri bohonané.