[1] Damu gu fani ahu yeyoho matahai yoho etori modu botokin deyoho, emohote gabo gahakumu agugoméri nouni yoho gané u areyonané. Damu gané yahagisi besing yoho bake wayamu yori emoho gahakumu ofo hayang yoho bake hamemere enu.
[2] Damu gu géni wayamu yori emoho gahakumu yang yeyoho ahu esumu ahu posukigina yoho bake hamemere enu. Damu gukuda yang bake wayamu yori emoho gahakumu yang amgebu hayang yoho bake hamemere enu. Damu wayamu etori hanggeramu enu, emohoni gu yoho bake fani dosa afén deyoho.
[3] Damu ahamo bahana yoho ahu fe fani yohoki etori bohonan dekumaka, ahu Yesus Énini fimiri bahana yohosé ahamo yohoki esumu etori bunané.
[4] Emohote, ahamo yoho yohonasiyo rahamo yohonasiyo yohonamu damu yohonasubang rahamo de bohonangkumaka, yohosé ahamo bahana yohoki esumu wayamu etori bohonané. Ememere emenangkumaka, yoho Ala Éné u dari bahana ememere kubumoné, damu yohonabo, yohonéni, damu yohonepi yohote yoho bake wayamu emesumakena hamemere yohote yoho bake awe hamemere emenané. Damu ememere ahu yoho emahana égéki Alasé esumu hanikigi.
[5] Emohote, ahamo ofo fani bahana de yoku pumise bahana, damu ahu fe fani yohoki etori bahana de yoho de bahana. Ahamo ememere bahana yoho kamu Alaki ibimiri bahana, damu yoho asu-sawa Ala bake u yosumahana. Damu yoho kukuwoho fe fimiri égena égéki Ala Égé bake fisini yosuméri bahana.
[6] Emohote, ahamo tuhuremu yoho yoku yohona modu hanikinané mahana égéki emahanate, Ala Éné modu hanikiné moho égéki fani emahana deyoho. Ememere bahana yoho damu sifing féri bahanate yohona ubana mése kungguna, emohoni ahu kungguna gahakumu bahana.
[7] Damu ahu-jemaat yoho bake ahamo yohoki etori bohonané mahana éné u mése yoré égéki hanggeramu nou, emohoni yohote dakumu fimenané. Emoho nemohoni, yoho u fe fani degemu poréyahamu emenan deyoho, emohoni ahu fe yoho ahu Yesus Énini fimiri bahana gugu bake fani dirimeféri yohonan deyoho.
[8] Damu ahu fe yori emiyoho, "Nu mése Yesus Énini fimiri bere." Ememere yohote, égé ahu yeyoho matahai yoho damu ahu éné afahang kumu bahana yoho damu éné yahagisi yoho fani wayamu etori bohon dekumaki, égé fani Yesus Énini fimiri baha deyoho ememere kubumoho. Ahu fani Yesus Énini fimiri baha de égé poréyahamu baha, mite ahu Yesus Énini fimiri bahate éné yahagisi takenamu égena yohoki fani etori bohong dekumaki, égéte esumu poréyahamu baha kéré.
[9] Damu ahu-jemaat yoho ahamo yohoki etori bohonan niye yohona fi kara nou. Damu ahamo yoho ememere bohonangkumaka, yohona fi kara nou: Yoho yohona sufébégé asuféri 60 mu égena. Damu hate kamu hu kamisigemu yahana.
[10] Damu ahamo énéyuhuwoho nogoki ahu fe yoho yohona kiyo kukuuri etohonaka, damu emiyohona, "Ahamo yoho wayamu emesumahana," ememere yohona. Ukusi feki yoho ememere bahana: Yohoku yohonasiyo ohoru wayamu erohonani fiko kesumahana, damu yoku yohona afahang womu kumu fengféri ahu kefo dahana yoho wayamu emahana, damu Ala Énahu Yesus Énini fimiri bahana yohoki mahamu emahana, damu ahu kukuwoho fimahana damu ahu kumangkigina yoho bake mahamu emahana, damu furubo atomatoma égéki haiyangméri wayamu yahana. Ahamo ememere bohonangkumaka, yohona fi kara nou. Emohoni, ahu Yesus Énini fimiri bahana yoho ahamo yohoki etori bohonané.
[11] Damu ahamo amgebu hayang yohona fi fani kara unggon deyoho. Ahamo énéyuhuwoho awe hu tafe afénané mahana égéki esemu butumu fimenané, damu ahamo yoho bagumu hu tafe afénan kiyoho. Emohoni, ahamo yoho nugu ahamo ré ememere yohona damu Ala Éné furubo aféyané ememere u yahamahana égéki awe modinané: Yoho emiyohona, "Nugu ahamo ré damu Ala Éné furubo aféyané."
[12] Emohoni, ahamo yoho u mumangge yahamahana égé fani hamemenan deyoho. Damu yoho ememere poréyahamu emenané, emohoni Ala yoho bake hakereméri poréyahamu emoné.
[13] Damu ahamo amgebu hayang yoho ahu fe yohona afahang osu-musumahana. Damu yoho fani esemu koru kiwiyokinan deyoho, damu yoho esemu hanikéri ahu fe yoho fani kotoféri égena de égéki, yohona hahafeyori sisi yohona. Damu ahu fe yohona u dukuméri yohonané mahana égéki kotoféri hahabamahana, damu u fani hamu hanigi de égéki homereyaha yohona.
[14] Emohoni, nu gu bake akiya yahae: Ahamo amgebu hayang yoho maha yoku hu tafe afénanéka, damu yoho ofo kuhungsufiyonané, damu yohonuhu etori bohonané, damu yohonamkesiyo wayamu etori bohonané. Emohoni, nuguna kufe yoho ahamo yohoki etori ahu Kristus Yesus kotoféri beriya nuguna sisi dirimeféri yohonan deyoho.
[15] Damu ahamo tuhuremu yoho Kristus Yesus Éné sifing fimiri emoné moho égéki fani hamemere emahana deyoho. Emohoni, nu ememere yahae, "Yoho hohoi yohona Ahuhabang Iblis éné sifingmu fimiri emoné moho égéki hamemere etori bahana," emiyoré.
[16] Damu nu tafe yahae: Ahu-jemaat bahana ékému yang yoho rahamo besing yoho rahamo yohona yahagisi fe ahamo kiri bohongkumaki, ahamo égéki mahamu enané. Fani modinani ahu-jemaat yoho ahamo égéki fani etori bohonan deyoho. Emohote, ahamo ofo fani bahana de yoku pumise bahana yoho damu ahu fe fani ahamo yohoki etori bahana de yohoki ahu-jemaat yohote esumu etori bohonané.
[17] Ahu ahu-jemaat etori bahana yoho yohona furubo yeri wayamu emesumenangkumaka, ahu Yesus Énini fimiri bahana yohote yohona u yoho égéki wayamu dari bunané damu hate yoho bake kuyomu wayamu enané. U feki ahu ahu-jemaat etori bahana yoho kukuwoho fimahana égéki damu yohona aneséyang égéki kunoro: Mumangge ahu ahu-jemaat hafuféri bahana ékému ahu Ala Éné u akiya yohona yohona aneséyang kunoro. Damu Ala Éné u ayoméri yokukubumahana ememere bahana yoho bake hamemere enané.
[18] Ala Éné Buku Kara womu kumu ahu ahu-jemaat etori bahana yoho yohona na esumu afénané mahana égéki wi-sapi énegoméri furubo yahana éné sisi aseméri kara uwangki égé, "Wi-sapi égé du-gandum éné ero asisimohoni, tama degemu égena damu ero uku degemu égena. Ememere emoho égéki, wi-sapi susung fani amukong siri kumenan deyoho, meneféyané. Emohoni, wi-sapi égé awe énegoméri furubo aféné." Damu tafe ememere yori kara unggu, "Ahu fe furubo yaha égé éné na de égéni, éné kukuwoho awe aféné."
[19] Damu ahu kamisige égésé ahu ahu-jemaat etori bahana yohoki ditini yohonangkumaka, fani "yahae" ememere yohon deyoho. Emohote, ahu ukuma rahamo ahu ukumasiyo rahamo yokuné kiyo kukuuri etahana yohosé emiyori yohonangkumaka, "yahae" ememere nou.
[20] Damu ahu ahu-jemaat etori bahana yoho égena ékému fe dosa de éyongkumaka, ahu emu-hori-daha Yesus Énini fimiri bahana yohona sama kumu égé bake hanggeramu nou. Emohoni, ahu ahu-jemaat etori bahana tuhuremu yoho etori mokéri fani dosa afénan deyoho.
[21] Damu namu Timotius, nu gu bake hanggeramu yahae, nu ahu ahu-jemaat etori bahana yohona akiya yoré nogoki esumu enu! Nugunabo Ala kumu Kristus Yesus kumu Ala malaikat yohona fi iri kubumu yoho yoho kumu ememere kotoféri yohona kiyo kukuuri nuguki etosuméri bahana. Emohoni, ahu ahu-jemaat etori bahana nahu yoho égena ékému fani kamu kamisige remu éniyomon deyoho, damu ahu emu-hori-daha ahu-jemaat etori bahana yoho bake hamu hanéri enu.
[22] Damu gu fani kakumu hahafoméri ahu ahu-jemaat etori bahana yoho kubuméri damu gané bero yohona habang teyo kumu kufiyori Ala Éné fi iri yobuwoméri yohon deyoho. Dakasuhumu moguri ahu yoho efefenu. Ahu yoho embahae dosa afénangkumaka, gu hate poréyahakiné. Damu wayamu etori enu, emohoni gu Ala Éné sama kumu fani dosa afén de manggohomu emesuméri bohoné.
[23] Damu gu koku hahaimusumoho égéki wayamu emoné karakin niye oho fani homereyaha yahang amin deyoho. Emohote, gu fimiri esumu anggur noho yahamutoméri kotoféri damu nemi.
[24] Ahu yahamuto yoho fani fake dosa yahana égéki ahuhabang égé efefeméri yori inggemon de moguri haharemu égenani, ahu yoho mése nafamahana. Emohote, ahu fe yoho fake dosa yahana égéki fani kakumu haharemu éyonan deyoho. Emohoni, ahu tuhuremu yoho fani nafamahana deyoho. Emohote, embahae awe haharemu éyonanéka, damu ahu tuhuremu yoho awe nafamenané.
[25] Hamemere ahu yahamuto yoho ahu fe yoho bake mahamu eméri wayamu emesumahana. Ememere emahana égéki kakumu yobuwomahanani, ahu tuhuremu yoho nafamahana. Emohote, ahu fe yoho fake ahu yoho mahamu emahanate, ahu tuhuremu yoho esemu fani nafamahana deyoho. Emohote, embahae wayamu emesumahana égéki awe yobuwomenanéka, damu ahu tuhuremu yoho ukukuwoho fake wayamu emesumahana égéki awe nafamenané.