[1] Na ngani in mga agiyagem kay Kiristo Isos, idbatay wa piyarosa.
[2] Ako idwa sakop sa batas daet osai katayan, angkataw ako piyalpas wa in agpamaboway pag batas in Abyan Diyos panawen kay Kiristo Isos.
[3] Piyangwat in Diyos in yewed apangwat in mga Batas panawen sa idapo kabaloyan in mangyan. Kansiyo siyogo in kansiyo Bodang apo bilog kataw kantam, kamay in kantam agbangen agpamangwat daet. Isos siyogo matang tiyaboy in kansiyo boway panawen sa daet. Kalbas in betek siyo apo ina pag bilog in daet kansiyo wa gayed piyakadaet.
[4] Ina pag piyangwat Diyos matang in boo mga otos sa mga Batas kantam wa abaloyan, in kitam idwa agogali in piyagkabeet kantam bilog no yewed in piyagkabeet in Abyan Diyos.
[5] Angkataw in mga agogali in mga piyagkabeet kansiro bilog, kansiro remrem baatte sakop sa mga piyagkabeet kansiro bilog. Kamay in mga agogali in mga piyagpatoldo in Abyan, kansiro remrem baatte sakop sa piyagkabeet in Abyan.
[6] In mga apo remrem sakop sa mga piyagkabeet kansiro bilog, ina agitaboy sa katayan. Kamay in mga apo remrem sakop sa piyagkabeet in Abyan, na agkaboway, apyaan.
[7] Angkataw in baatte agremrem sa mga piyagkabeet in bilog, ina aglaban sa Diyos, yewed agpaniwala sa mga Batas Diyos, yewed din kabaloy maniwala.
[8] In mga agogali in mga piyagkabeet kansiro bilog idbatay kabaloy agpakaanggay sa Diyos.
[9] Kamay no agbalay ngani sa kantam in Abyan Diyos, na kitam idwa agogali in mga piyagkabeet kantam mga bilog, no yewed in piyagkabeet in Abyan Diyos. No in osai ka mangyan idapo in Abyan Kiristo, na siyo yewed kay Kiristo.
[10] Angkataw no Kiristo agbalay sa kantam na kamayba wa kantam bilog matay wa panawen sa kantam daet, na agkaboway in kantam abyan panawen kitam piyaidapo wa daet.
[11] No agbalay sa kantam in Abyan Diyos in agpaboway wakay kay IsoKiristo, na ina din pag Diyos in batay agtaboy boway sa kantam mga agkatay pag bilog, angkataw in kansiyo Abyan agbalay sa kantam.
[12] Na, laki mga belag, idwa kitam sakop sa mga piyagkabeet kantam bilog. Na kitam idwa kailangan agogali sa mga piyagkabeet kantam bilog.
[13] No kitam agogali in mga piyagkabeet kantam bilog, na kitam batay ngani matay. Dayem no sa kabaloyan in Abyan kantam piyagbono in mga daeten pag ogali kantam bilog, na kitam batay boway.
[14] In boo mga piyagpatoldo in Abyan Diyos siro mga bodang Diyos.
[15] Angkataw in Abyan tiyaboy Diyos sa kantam yewed agpansakop agpamalimlimo sa kantam, no yewed kitam kansiyo piyagpangwat bodang Diyos matang sa kabaloyan in Abyan maal wa kitam agawit sa Diyos keyen, Amang, kangay Amang.
[16] In Abyan Diyos sarig ngani kantam abyan in keyen kitam ngani mga bodang Diyos.
[17] Kalbas panawen kitam kansiyo mga bodang kitam batay piyagpakan in mga piyangako Diyos. Sarig Kiristo kitam batay piyagpakan in mga siyandata Diyos batay kay Kiristo. No ngona kitam kansiyo sarig piyagpaidapan, na dogayan kitam batay din piyagpakalakonaw sarig siyo.
[18] Kamayba nangkalakoy in mga kaidapan ngona betek no sa kangay ina tomag idapo daan no batay piyagpaytikkalakoy osai in kalakoyen lakoy piyagpalowas batay sa kantam.
[19] In boo mga piyangwat Diyos agkabeet wano in piyagpalowas Diyos in kansiyo mga bodang.
[20] In boo mga piyangwat masida wa, idbatay wa mibaloy in kaalenen kaya siro piyangwat. Kaya kataw ina yewed panawen sa kansiro beet dayem panawen ina in remrem Diyos. Kamay kamayba kataw ina na batay wakay maal,
[21] angkataw in boo mga piyangwat kamayba ngona agkabolok, dogayan batay piyalpas, idwa agkabolok, matang sarig in mga bodang Diyos in siro piyalpas wa gayed.
[22] Kitam katawan anggan ngona in boo mga piyangwat agdaing sa piyagkaidapan kataw in kagbaiyan agboslotan.
[23] Yewed waget siro in kataw ina, kadayo din kitam in piyakan in Abyan, in tokawan tiyaboy Diyos sa kantam, kitam din agdaing agkabyatan sa kantam galem anggan kitam agpanaya kay sa kabetek in Diyos batay agpalowas in kitam kansiyo ngani mga bodang, in kitam piyalpas wa gayed kadayo in kantam mga bilog.
[24] Kitam piyaboway wa, kalbas kantam piyagpanaya ina pag batay mibaloy. Kamay no abel wa in piyagpanaya na idwa piyagpanaya. Nakay in agpanaya sa abel wa daan?
[25] Kamay no kitam agpanaya sa yewed kay kantam abel, na kitam yewed aglimbang agpanaya.
[26] Osai kay ka dailan kaya kitam piyagtolong in Abyan Diyos angkataw kitam idapo kabaloyan. Kitam yewed gayed katawan mandalangin maal, matang in Abyan in agpangayay sa Diyos panawen sa kantam. In kansiyo piyagalapet in mga agiplaong idbatay masabi mangyan.
[27] In Diyos in kabaloy agpangkit sa remrem mangyan, siyo katawan daan in beet siyabi in Abyan, angkataw in piyagpandalangin in Abyan sa mga bodang Diyos, ina wa daan in beet Diyos.
[28] Kantam wa atawanan sa boote mga mibaloy sa mga agkaanggay sa Diyos siyo agtolong sa kansiro matang in boote mibaloy maal sa kansiro, siro in kansiyo mga iidang matang piyagpangwat in kansiyo beet.
[29] Angkataw tangona daan naw in Diyos katawan wa daan no nakay agbangen in kansiyo, kalbas siro kansiyo wa siyandata matang kataw wa daan kansiyo Bodang, matang siyo wa ngani in panganay sa tayariyan aro.
[30] In kansiyo mga siyandata kansiyo iidang, kalbas in kansiyo mga iidang kansiyo wa piyangwat idapo daet, kalbas in kansiyo piyangwat idapo daet kansiyo piyakalakonaw.
[31] Batang asin pag boo nakay in kantam atawanan? No in Diyos sa kantam agbangen, na nakay in batay kapandaeg sa kantam? Idapo.
[32] Yewed kansiyo piyagayaw in kansiyo Bodang, dayem tiyaboy ngani sa kantam boo. Na no tiyaboy sa kantam in kansiyo Bodang, na batay din tiyaboy sa kantam in boote sarig kansiyo Bodang.
[33] Nakay in batay agabla sa kantam, sa mga iidang Diyos? In Diyos idbatay, angkataw siyo wa daan in agpangwat sa kantam idapo daet.
[34] Nakay in batay agparosa sa kantam? Kiristo Isos idbatay, angkataw siyo in biyono, kalbas piyaboway wakay, kalbas ngona sa pamalang agbangen Diyos agpandalangin sa kantam.
[35] Kamayba kitam maloba piyagpaidapan, piyagpangwatan daet, agkayawes, maidap, piyagpamalimlimowan, kamayba piyagbono, na idapo batay kapasoway sa kantam sa pakayawte Kiristo. Idapo.
[36] Kataw in siyabi sa mga Agisolat keyen, Panawen sa kaimo kami boo ibeng batay piyagbono, kami kataw in mga topa batay piyagbono.
[37] Idapo ngani. Asin pag boo kitam mandaeg daan panawen sa kabaloyan Kiristo in agpakayawte sa kantam.
[38] Kangay ngani atawanan idapo batay kapasoway sa kantam sa pakayawte Diyos. Kamayba matay, kamayba boway, kamayba angil, kamayba mamaw, kamayba nakay ngona betek, kamayba sa agrateng kay, kamayba in mga poon mamaw,
[39] kamayba in mga sa ogbos, kamayba in mga sa galem diya, kamayba nakay pag mga piyangwat, na idapo wano kabaloy agpasoway sa kantam sa pakayawte Diyos piyagpalowas Kiristo Isos kantam Kapwan.