[1] In baatte mangyan pasakop sa mga poon lakoy. Angkataw idapo kabaloyan yewed batang sa Diyos. Ina pag mga kabaloyan piyangwat Diyos.
[2] Matang no siyo aglaban sa mga apo kabaloyan na siyo aglaban sa piyangwat Diyos. In agkataw ina agayay parosa.
[3] In mga agpamangwat maal yewed kailangan agkalimo sa mga poon. Dayem in mga agpangwat daet, na siro agkalimo ngani. No kitam beet yewed agkalimo sa mga poon, na kitam agpangwat wa maal, na kitam kansiro batay piyagmaal.
[4] Angkataw siro mga sogowan Diyos agalapet sa kantam. Kamay no kitam agpangwat daet na kitam agkalimo wa, angkataw siro apo ngani kabaloyan agparosa. Siro sogowan Diyos, matang parosaen in mga agpamangwat daet.
[5] Na kailangan ngani kitam pasakop, yewed waget matang idbatay piyarosa Diyos, no yewed panawen ina wa daan in betek.
[6] Ina din in dailan kaya kitam agbayad bowis. In mga poon apo kabaloyan siro mga sogowan Diyos. Ina in kansiro tongkolin.
[7] Kantam taboyen sa baatte osai in kailangan taboyen. Bayaden in bowis sa kailangan piyagbayadan, maniwala sa kailangan paniwalaen, pagmaalen in kailangan pagmaalen.
[8] Ayaw agpangotang, dayem kitam maybelagan, angkataw in agpakayawte sa roma, na ina agpaniwala wa sa mga Batas.
[9] Angkataw in mga Batas kataw in ayaw agpanggaraw, ayaw agbono mangyan, ayaw agpanakaw, ayaw agpansolang, kadayo in roma kay pag mga batas, na ina pag boo agisagalem atai pag siyabi keyen, Pagmaalen in roma mangyan, kataw daan in kaimo bilog.
[10] In agpakayawte yewed agpangwat daet kamayba kay nakay. Na in agpakayawte, ina in agpaniwala sa boo mga Batas.
[11] Kaya kailangan kantam pangwaten ina angkataw kantam atawanan in kabetek ngona, idwa kabetek age sek. Kitam mipolaw wa, angkataw bangen wa in kitam piyagpaboway, bangen wa labi kay sa tangona in kitam bayo kay agpasandig sa kansiyo.
[12] In yabi agkaidapo wa, bangen wa in mapawa. Kantam wa benglayen in boo mga daet piyagpangwat sa yabi. Boo remrem piliten wa agpangwat in maal sa mapawa.
[13] Kailangan in kantam mga ogali maalen, yewed makarikoy. Ayaw agsidaen in kabetek kataw in aglasing, osai in daeten pag agkaanggay. Ayaw agpanggaraw, mga makarikoy pag panawen. Ayaw agpalaway, agpalpanagiri.
[14] Dayem kantam soroyen in Kapwan IsoKiristo. Ayaw wa kantam agremremen in boo daeten pag makaanggay sa kantam bilog.