[1] Na laki, kamayba nakay pag mangyan kao, no kao agsabi keyen in roma apo daet, na kao yewed batay kadailan. Angkataw in kao agpadaet sa roma na kaimo din piyagpadaet in kaimo sadiri. Angkataw kao agpamangwat din in kataw ina, in kaimo piyagsabi keyen daet.
[2] Kantam atawanan agibetek ngani in parosa Diyos sa mga mangyan agpamangwat kataw ina.
[3] Na nakay, kaimo lames remrem kao idbatay piyagparosa Diyos no kao agpadaet sa mga agpamangwat kataw ina kamay kao agpamangwat din?
[4] Kaimo lames piyagidapo kabolowan in Diyos angkataw siyo mabait, katawan agbanta, yewed toloy agkagalit? Kao yewed lames katawan kaya siyo mabait matang kao piyagpakan kabetek agbenglay kaimo daet?
[5] Kamay kataw kao marigen in remrem, osai idbatay agbenglay in kaimo daet, na labi kay kaimo piyagpaistobo in batay dogayan parosa sa kaimo sa ibeng piyagpalowas Diyos in kansiyo galit, piyagparosa in mga agpamangwat daet.
[6] Angkataw in Diyos in batay agbayad sa baatte mangyan no nakay in kansiro mga piyangwat.
[7] In bayad sa mga yewed aglimbang agpangwat maal angkataw kansiro beet siro piyagmaal Diyos, piyalakonaw, idbatay wa matay, na in bayad piyagtaboy Diyos sa kansiro, ina boway idapo kalobosan.
[8] Dayem sa mga madamot, mga agpaniwala sa baribid yewed sa betek, na sa kansiro agbangen in piyagtaboy Diyos galit lakoy agparosa.
[9] Kaidapan, maloba wa gayed idbatay apyaan in batay tiyaboy Diyos sa baatte mangyan agpamangwat daet, tokawan sa mga Odyo, kalbas kadayo din sa mga yewed Odyo.
[10] Dayem in piyagtaboy Diyos sa baatte mangyan agpamangwat maal, siro piyalakonaw, piyagmaal, osai apyaan. Ina din tokawan sa mga Odyo, kalbas kadayo din sa mga yewed Odyo.
[11] Angkataw in Diyos yewed agpangidang.
[12] In mga yewed Odyo idapo in mga Batas Diyos piyasolat kay Mowisis, siro batay piyagparosa Diyos kamayba siro yewed katawan sa mga Batas. In mga Odyo wakay agbangen siro katawan sa mga Batas, siro batay piyagparosa Diyos no nangkataw in siyabi sa mga Batas.
[13] Angkataw yewed in mga agparengey waget sa mga Batas, dayem in mga agpangwat ina, na siro in batay piyangwat Diyos idapo daet.
[14] In mga yewed Odyo no siro wakayte agpangwat in piyagsabi sa mga Batas, na ina kagwali wa batas sa kansiro kamayba siro idapo in mga Batas.
[15] Piyagngitan in mga Batas agibalay sa kansiro mga remrem, panawen sa kansiro piyagpangwat. In kansiro mga bait agsabi din ina agibalay sa kansiro mga remrem, angkataw apo betek in kansiro remrem keyen, Ina pag kangay piyangwat daet, apo wakay betek keyen, Anda agbangen maal.
[16] Ina boo batay mibaloy sa Ibeng dogayan in Diyos batay agosap sa mga mangyan panawen sa kansiro mga remrem piyagbetang. Kiristo Isos in sogowan agosap. Ina in piyagsabi in Maal pag Barita kangay piyagpatoldo.
[17] Kao keyen kao Odyo, agpasandig sa mga Batas Diyos, osai agpakalakonaw keyen, Kitam in mga Odyo in mga iidang Diyos.
[18] Kaimo atawanan in beet Diyos. Panawen kao agadar sa mga Batas kao katawan keyen anda maal, ina daet.
[19] In kaimo remrem kao agakay sa mga beleg, agparawa sa mga piyagkalenedan in remrem.
[20] Kao agpabait sa mga idapo bait, agpatoldo sa mga bodang, angkataw kaimo abel sa mga Batas in boo atawanan osai in boo betek.
[21] Kao agpatoldo sa mga roma, na nakay batang yewed piyatoldo in kaimo sadiri? Kao agpatoldo keyen, Ayaw agpanakaw. Baina, kao agpanakaw din.
[22] Kao keyen, Ayaw agpanggaraw, bago kao agpanggaraw din. Kao agkaramesan sa mga yewed Diyos. Baina, kao agpanakaw sa mga balay in mga yewed Diyos.
[23] Kao agpakalakonaw keyen kao sakop sa mga Batas, bago in kao yewed agpaniwala sa mga Batas, na in Diyos kaimo piyagpaidapo kabolowan sa pangkit mga roma.
[24] Kataw in mga Agisolat keyen, Panawen sa kanyo sa mga Odyo in ngaran Diyos piyagidapo kabolowan in mga yewed Odyo.
[25] No kaimo piyagpangwat in mga Batas Diyos na apo kabolowan in kao tiyoli. Kamay no kao yewed agpangwat in mga Batas, na idapo wa kabolowan in kao tiyoli.
[26] Kamayba in yewed Odyo, in yewed tiyoli no agpangwat in piyagsabi sa mga Batas na siyo kagwali wa daan tiyoli sa pangkit Diyos.
[27] Na in mga yewed tiyoli, panawen siro agpangwat in piyagsabi in mga Batas, siro batay agsabi sa kanyo keyen, Kamo in mga tiyoli apo daet, angkataw kamo apo wa daan in mga Batas sa mga Agisolat, kamay kamo yewed agpangwat ina.
[28] In totoo toli yewed waget in piyagpangwat sa bilog. Kaya in mangyan Odyo, yewed panawen waget sa piyagngitan sa kansiyo bilog,
[29] no yewed panawen sa bayo wakay kansiyo remrem, kansiyo bait. Ina in Abyan Diyos in agpangwat, yewed in mga Batas sa mga Agisolat. In kataw ina pag mangyan, in agmaal sa kansiyo yewed in mga mangyan no yewed in Diyos.