[1] Ayaw agpansabiyanen in mga kaliyakiyan mga koyay wa, no yewed patoldowen maal kataw in kaimo amang. In kasalokoyan pag mga kaliyakiyan pagawiten belag.
[2] In mga kagbaiyan mga koyay wa kaimo pagawiten inang, in kasalokoyan pag mga kagbaiyan kaimo pagawiten din belag. Kamay in kaimo ogali sa kansiro ayaw tomag agkapangwat daet.
[3] Tolongen in mga kagbaiyan balo in idapo agalapet.
[4] Kamay no in osai ka kagbaiyan balo apo mga bodang, no yewed apo mga popo, na siro agbangen in kailangan agalapet sa kansiro mga koyaywate, agremrem sa mga piyanaboy tangona in siro pangkalakoyte kay, angkataw ina in makaanggay sa Diyos.
[5] In kagbaiyan balo, in idapo agalapet, na sa Diyos waget siyo agpasandig, yewed aglimbang agpandalangin, ibeng osai yabi agpangayay tolong sa kansiyo.
[6] Kamay no in kagbaiyan balo daeten wa in ogali, na siyo kamayba agkaboway kay, kagwali wa matay.
[7] Ina pag mga bilin kaimo patoldowen sa kansiro matang siro idbatay agpangwat daet.
[8] Kamayba nakay in yewed agalapet sa kansiyo mga kabelagan, labi kay sa kansiyo mga koyay, mga bodang, na kansiyo wa biyaliwan in paniwala, in kansiyo daet lakonaw kay sa mga yewed agpaniwala.
[9] In paagemen sa listaan mga kagbaiyan balo alapeten in barkadaan, in mga waget kakoyay wa animnapo ka dagon, makaosai waget siyo batang apo lalaki,
[10] atawanan siyo mabait pag mangyan, in agalapet maal sa mga bodang, osai in agpabelag sa mga taga adayonaw, kadayo in agtolong kamayba nakay in piyagkailangan in mga iidang Diyos kadayo sa amat kay pag mga apo kailangan, osai in ageyat agpangwat in boote maal.
[11] -
[12] Ayaw agpaagemen sa listaan in mga balo bodang kay, angkataw kailangan siyo mangako kay Kiristo keyen siyo idbatay wakay mamangkit lalaki. Na no siyo mamangkit wakay lalaki na siida wa in kansiyo pangako kay Kiristo na siyo batay piyagparosa.
[13] Osai din siyo batay wa mibaloy bibelen, agpamalayan. Labi kay daet siyo batay agpanlibak, mga agpanlado sa idwakay kansiyo panawen, agiplaongan waget kamayba nangkataw.
[14] Na no sa kangay, maal kay siro mamangkit wakay lalaki, mamodang, agalapet sa kansiro talnakiyan, matang in mga agkagalit sa kantam idapo batay ngiitan daet sa barkadaan mga bodang Diyos.
[15] Angkataw apo wa mga balo bomaribid wa, paagem wa kay Katanas.
[16] In mga kagbaiyan agpaniwala, no siro apo kagbaiyan balo sa kansiro kabelagan, na kailangan siro wa in agalapet sa kansiyo, ayaw agpaalapeten sa barkadaan mga bodang Diyos, matang in barkadaan katolong sa mga balo idapo wa ngani agalapet sa kansiro.
[17] In mga koyay sa barkadaan mga bodang Diyos, no siro maal pag agpakoyay, labi kay no siro in mga agpabarita, agpatoldo in agiplaong Diyos, na siro pakanen lakonaw.
[18] Angkataw in mga Agisolat keyen, Ayaw agboksongen in bibi in baka anggan piyagparoyosan kay. Agisolat din keyen, In agpanawen pakanen bayad.
[19] In bintang sa osai ka koyay sa barkadaan ayaw agtanggapen no osai waget in agsabi.
[20] In mga agpamangwat ngani daet pagsabiyanen paparengeyen in boo, matang alimowan in kalaati.
[21] Kao kangay piyagpabilinan sa pangkit Diyos osai Kiristo Isos, anggan in kansiyo mga angil, kaimo ngani pangwaten ina pag mga bilin. Kao ayaw agpangidang, ayaw apo piyagpaagem.
[22] Kamayba nakay pag mangyan ayaw toloy agpakanen kabaloyan sa barkadaan mga bodang Diyos. Kao agingat, karam kao mipaagem sa daet in amat mangyan. Kao agpilit ayaw apo daet.
[23] Ayaw waget sapa in kaimo inemen. Dayem minem dinte alak panawen sa kaimo boyon, angkataw kao mapret apo maskit.
[24] Apo mga mangyan piyagngitan in daet ikkay rateng piyagosap. Kamay in amat wakay, in kansiro mga daet, yewed kay piyagngitan anggan isag kay.
[25] Kataw daan din ina apo mga maal pag panawen toloy piyagngitan. Kamay kamayba yewed toloy ngiitan ina batay ngiitan dogayan.