[1] Sa kangay mga bilin in lakonaw kailangan in mga agpaniwala agpandalangin, agayay osai agkaanggay sa Diyos panawen sa boo mangyan.
[2] Dalanginen din in mga poon lakoy kadayo in boo apo tongkolin, matang kitam apyaan, agkaanggay in boway, agmaal sa Diyos osai mabait.
[3] Ina in maalno, makaanggay sa Diyos in Agpamaboway sa kantam,
[4] angkataw kansiyo beet piyaboway in boo mga mangyan, katawan in totoo.
[5] Angkataw osai waget in Diyos. Osai waget din in paywaraan sa Diyos osai sa mga mangyan, siyo in mangyan Kiristo Isos.
[6] Kansiyo tiyaboy kansiyo boway matang palpasen in boo mangyan. Ina mibaloy sa kabetek, matang atawanan in beet Diyos agpamaboway sa mga mangyan.
[7] Kaya ako iidang katiwala, matang agbarita sa mga yewed Odyo, agpamatoldo sa kansiro in betek pag agpaniwala. Totoo in kangay piyagsabi, yewed baribid.
[8] Sa boo betek agsamba, in kangay beet in mga kaliyakiyan in tokaw agpandalangin, kailangan siro maal pag mangyan, idapo remrem daet, yewed din agkagalit sa kansiro mga belag.
[9] In mga wakay kagbaiyan, kailangan siro ayaw agpamaalno agkasolokan, kadayo in damit, kadayo in abok. Ayaw siro agpakabwat sa mga kasangkapan kansiro bilog.
[10] Dayem in kansiro pamaalno in maalno pag ogali. Ina in betek sa mga kagbaiyan agpaniwala sa Diyos.
[11] Sa betek agsamba kailangan in mga kagbaiyan agadar, ayaw aglalae, dayem agpakabwatte gayed.
[12] Kangay piyagayaw in mga kagbaiyan agpatoldo, agpakabwat sa mga kaliyakiyan. Ayaw siro aglalae.
[13] Angkataw Adan in tokaw piyangwat, kadogay Iba.
[14] Yewed Adan, no yewed Iba in piyadaya, kalbas yewed maniwala sa Diyos.
[15] Kamay in kagbaiyan batay piyagpaboway panawen sa agpamodang no siyo agogali agpakabwatte in remrem agpaniwala, agpakayawte, osai agpamangwat maal.