[1] Totoo in piyagsabi keyen, In mangyan agkabeet agpapoon sa barkadaan mga bodang Diyos, na lakonaw pag panawen in kansiyo piyagremrem.
[2] Na kailangan in agpapoon idapo piyagngitan daet sa kansiyo, kailangan din osai waget in babai, osai katawan agsakop sa kansiyo remrem, yewed galiten, maalen in ogali, agpabelag sa mga mangyan, osai katawan agpatoldo.
[3] Kailangan din siyo yewed agpanlasing, yewed matapang, yewed agpagolo, dayem mabait, osai yewed agpanremrem waget sa mga sangkap.
[4] Kailangan siyo katawan agpapoon sa kansiyo talnakiyan, piyagmaal osai piyagpaniwalaan kansiyo mga bodang.
[5] Angkataw no siyo yewed kabaloy agpapoon sa kansiyo talnakiyan na nangkataw siyo batay kabaloy agpapoon sa barkadaan mga bodang Diyos?
[6] Kailangan siyo dogay wa agpaniwala. No yewed na karam siyo batay agpakabwat kataw in diyablo, na batay piyarosa din kataw in diyablo.
[7] Kailangan din siyo piyagmaal in mga yewed agpaniwala, matang siyo idbatay piyaidapo kabolowan, idbatay abel in diyablo.
[8] Kadayo in mga katolong sa barkadaan kailangan siro mga maalen in ogali, yewed bosliyen, yewed agpanlasing, yewed agkabeet sa mga sangkap.
[9] Kailangan siro yewed piyagbaslag in remrem, agpaniwala gayed sa adar piyalowas wa.
[10] Kailangan atawanan in kansiro ogali, kadayo no idapo ngiitan daet sa kansiro, na bayo siro pangwaten wa mga katolong.
[11] Kadayo in kagbaiyan pag mga katolong sa barkadaan, kailangan din siro maalno in ogali, yewed agpanlibak, dayem katawan agsakop sa kansiro remrem osai mabait.
[12] Kailangan din in katolong osai waget in babai, katawan agpakoyay sa kansiyo talnakiyan, piyagpaniwalaan kansiyo mga bodang.
[13] In mga katolong yewed aglimbang sa panawen na siro batay piyagmaal in boo, kalbas batay ngani piyagparengey in siro agpatoldo panawen sa agpasandig kay Kiristo Isos.
[14] In kangay beet idwa dogay ako rateng wakay sa kaimo. Kamay anda pag mga bilin kangay piyagsolat sa kaimo,
[15] matang no ako yewed toloy rateng, na kaimo din atawanan in maal ogaliyen in mga bodang Diyos in agkaboway, ina in kansiyo mga mangyan, in mga agalapet, mga agatang sa betek pag paniwala.
[16] Totoo ngani lakonaw lakoy in batang piyagbetang piyalowas wa, in kantam piyagpaniwalaan keyen, Kiristo ngiitan mibaloy wa mangyan, siyo piyapangkit in Abyan Diyos betek, siyo ngiitan mga angil. Siyo piyabarita sa boo mangyan, siyo piyaniwalaan sa boo kobat, siyo piyaonaik wakay sa langit.