[1] Atawanan in piyagsabi in Abyan Diyos keyen, Sa kalobosan pag mga ibeng apo mga mangyan batay agbenglay in paniwala, batay paagem sa agpadaya pag mga mamaw, osai sa kansiro baribid pag piyagpatoldo.
[2] Ina piyagpatoldo in mga bosliyen pag mga mangyan. In kansiro mga remrem miyarkaan wa in kansiro kapwan, na ina in diyablo.
[3] Kansiro piyagayaw agpamangkit babai agpamangkit lalaki, osai in kalaati mga pamangnen. Bago in mga pamangnen piyangwat Diyos, maal kiyoman in mga agpaniwala, in mga katawan in betek osai agpandalangin agkaanggay sa Diyos.
[4] In boo mga piyangwat Diyos maal. Yewed kailangan piyagayaw, dayem maal kiyoman, agkaanggay sa Diyos.
[5] Angkataw ina maal sa Diyos panawen sa kansiyo agiplaong in agpangwat, osai panawen sa pandalangin.
[6] Kao batay maalno pag sogowan Kiristo Isos no anda pag mga bilin kaimo piyagpatoldo sa mga belag. Osai baatte kaimo piyagpatoldo, ina agpaistobo din sa kaimo paniwala sa maal pag adar kantam piyagpaniwalaan, kaimo datiyan piyaggisod.
[7] Osai ayaw agalapeten in idapo kabolowan pag mga panggisoden, dayem agpilit agogali maalno.
[8] No kitam ageyat na batay mistobo in eyat kantam bilog, kamay labi kay lakonaw in pakinabang agpilit agogali maalno, angkataw ina apo pakinabang yewed waget ngona pag boway, dayem kadayo sa agrateng pag boway.
[9] Ina pag siyabi totoo ngani, maal paniwalaanen.
[10] Kaya kitam agpilit ageyat agpanawen, angkataw kitam agpasandig sa Diyos in agkaboway, in Agpamaboway sa boo, labi kay sa mga agpaniwala.
[11] Ina pag mga bilin kaimo patoldowen.
[12] Kao bodang kay, kamay ayaw kao agpaidapowen kabolowan panawen ina. No yewed sa boo kaimo agiplaong osai sa kaimo mga ogali kailangan kao agpakayawte, agpaniwala, idapo daet, matang kao maalno pag toladan in mga agpaniwala.
[13] Kao agpilit agbasa in mga Agisolat sa kabetek agsamba, osai agpaliwanag osai agpatoldo, anggan ako rateng.
[14] Alapeten in kabaloyan in tiyaboy tangona in Diyos sa kaimo, sa kabetek miplaong in mga poropita in kao yaatang piyandalangin in mga koyay sa barkadaan mga bodang Diyos.
[15] In kangay mga bilin kaimo ngani pangwaten. Ayaw aglimbang asin matang piyagngitan in boo agistobo in kaimo kaalnowen.
[16] Kao agingat sa kaimo mga ogali, osai sa kaimo piyagpatoldo. Ayaw agempet agpangwat in kangay mga bilin, matang kao pabowayen kadayo in mga agparengey sa kaimo.