[1] Laki mga belag, ayaw kamo toloy maniwala sa baatte agsabi siyo apo in Abyan Diyos. Dayem tokaw kanyo tepengen in mangyan matang atawanan no batang ngani sa Diyos in kansiyo remrem. Angkataw aronaw wa bosliyen pag agpamarita in lomwas sa mga mangyan.
[2] No siyo in agpamarita keyen IsoKiristo mibaloy mangyan, na siyo piyagbalayan in Abyan batang sa Diyos. Ina in padalan matang kanyo atawanan no siyo piyagbalayan in Abyan Diyos.
[3] Kamay no siyo yewed kataw ina in agbarita panawen kay Isos, na siyo yewed piyagbalayan in Abyan batang sa Diyos. Dayem in kansiyo remrem batang sa agpakagwali Kiristo. Piyatoldo wa sa kanyo siyo batay rateng. Ngona atai wa daan sa kobat.
[4] Laki mga bodang, kamo sa Diyos wa agbangen. Kanyo wa diyaeg in mga bosliyen pag agpamarita, angkataw in Abyan agbalay sa kanyo. In kansiyo kabaloyan labi kay kalakoy sa remrem in agbalay sa mga taga kobat.
[5] In mga bosliyen pag agpamarita sa kobat agbangen, matang in kansiro piyagpatoldo batang sa kobat. Osai in mga agparengey sa kansiro sa kobat din agbangen.
[6] Kamay kitam sa Diyos agbangen. Kamayba nakay in katawan sa Diyos na agparengey sa kantam. Kamay in yewed sa Diyos yewed agparengey sa kantam. Kataw ina kantam atawanan in betek pag remrem, osai in baribid pag remrem.
[7] Laki mga belag, kitam malsipakayawtean, angkataw in agpakayawte batang sa Diyos. No siyo agpakayawte na siyo bodang Diyos, osai katawan sa Diyos.
[8] In yewed agpakayawte yewed katawan sa Diyos, angkataw in ogali Diyos palagi agpakayawte.
[9] Piyapangkit Diyos in siyo agpakayawte sa kantam, in siyo agsogo in kansiyo osai waget ka Bodang sa kobat, matang siyo in padalan kitam piyaboway.
[10] In agpakayawte kataw tai, yewed sa kitam in agkabeet sa Diyos, dayem kitam in kansiyo piyakayawte, osai kansiyo siyogo kansiyo Bodang, matang siyo in aglibangaw sa kantam mga daet.
[11] Laki mga belag, kataw kalakoy ina in Diyos agpakayawte sa kantam, na kailangan kitam malsipakayawtean.
[12] Kamayba nangkadogay idapo mangyan batang kangitan sa Diyos. Kamay no kitam agpalsipakayawtean na siyo agbalay sa kantam. Osai in siyo agpakayawte mibaloy wa gayed sa kantam galem.
[13] Kaya kantam atawanan kitam agpamataw sa Diyos, kalbas siyo wakay agbangen agpamataw sa kantam, angkataw kitam piyakan in kansiyo Abyan.
[14] Kanyam ngiitan osai piyagpaalam keyen siyogo in Amang in kansiyo Bodang matang agpamaboway sa boo mangyan.
[15] In agbarita keyen, Isos in Bodang Diyos, na agpamataw sa Diyos. Osai in Diyos wakay agbangen agpamataw sa kansiyo.
[16] Osai kantam atawanan in Diyos agpakayawte sa kantam. Ina in kantam piyagpasandigan. In ogali Diyos palagi agpakayawte. In yewed agempet agpakayawte na agpamataw sa Diyos, osai in Diyos wakay agbangen agpamataw sa kansiyo.
[17] No yewed kantam piyagkalimowan in Ibeng Agparosa, na mibaloy wa gayed sa kantam galem in agpakayawte, angkataw kitam kataw wa Kiristo, kamayba atai daan sa kobat.
[18] In agpakayawte gayed idapo agiyagem agkalimo, angkataw in agpakayawte gayed idbatay wa agkalimo. Kamayba nakay in agkalimo, na ikkay mibaloy gayed sa kansiyo galem in agpakayawte. Angkataw kaya siyo agkalimo panawen sa parosa.
[19] Kaya kitam agpakayawte, angkataw in Diyos in tokaw agpakayawte sa kantam.
[20] In agsabi keyen, Ako agkabeet sa Diyos, kamay agkabais daan sa kansiyo belag, na siyo bosliyen. No siyo yewed agpakayawte sa kansiyo belag piyagngitan, na siyo idbatay agkabeet sa Diyos in yewed kansiyo piyagngitan.
[21] In otos Kiristo sa kantam keyen, In agkabeet sa Diyos kailangan din agpakayawte sa kansiyo belag.