[1] Kanyo remremen in kalakoyen in agpakayawte in Amang sa kantam, in kitam piyagawit mga bodang Diyos. Kitam ngani bodang wa gayed Diyos. Kaya in mga mangyan yewed katawan sa kantam, angkataw siro yewed katawan sa Diyos.
[2] Laki mga belag, ngona kitam mga bodang wa Diyos, kamay ikkay atawanan no kitam dogayan kagwali nakay. Kamay kantam atawanan no Kiristo rateng wakay na kitam batay kataw daan siyo, angkataw kantam batay piyagngitan gayed no kataw nakay siyo.
[3] Na in agpasandig sa kansiyo, na siyo agpangwat maal kataw daan Kiristo, angkataw Kiristo maal.
[4] In beet siyabi daet in aglaban sa mga otos Diyos. Na in aglaban sa mga otos Diyos na ina in agpangwat daet.
[5] Kanyo atawanan atai pataboy in Kiristo matang kansiyo kowaen in daet mga mangyan. Siyo idapo daet.
[6] No siyo agpamataw kay Kiristo na siyo idbatay wa agpamangwat daet. In agpamangwat kay daet idbatang kangitan, osai idbatang din katawan sa kansiyo.
[7] Laki mga bodang, ayaw aakayan sa mga agpatoldo baribid, kamayba kay nakay. No siyo agpamangwat in betek, na siyo betek, kataw Kiristo.
[8] Kamay in agpamangwat kay daet na siyo sarig in diyablo, angkataw sa parakayan kay in diyablo agpamangwat wa daan daet. In Bodang Diyos atai pataboy matang sidaen in mga piyangwat diyablo.
[9] No siyo bodang wa Diyos, na siyo idbatay wa agpamangwat daet, angkataw bayo wa in kansiyo boway batang sa Diyos. Siyo idbatay wa kapamangwat kay daet, angkataw Diyos in kansiyo Amang.
[10] Atai atawanan no nakay in bodang Diyos, no nakay din in bodang diyablo. In kamayba nakay in yewed agpangwat in betek, yewed din agpakayawte sa kansiyo belag, na siyo yewed bodang Diyos.
[11] In piyatoldo sa kanyo ibat kay sa parakayan keyen, Kitam malsipakayawtean.
[12] Ayaw kitam kataw Kain. Siyo bodang diyablo, siyo agbono kansiyo ariyan. Kaya kansiyo biyono, angkataw daeten in kansiyo mga panawen, kamay betek in mga panawen kansiyo ariyan.
[13] Ayaw kamo agsoyo, mga belag, no kamo piyagkabaisan in mga mangyan.
[14] Kaya kantam atawanan kitam kiyowa wa sa katayan, piyataboy wa sa bayo pag boway, angkataw kantam piyagpakayawte in mga belag. Kamay in yewed agpakayawte baywi kay sa katayan.
[15] In agkabais sa kansiyo belag, na siyo kagwali agbono wa mangyan. Kamay kanyo atawanan in agbono mangyan idapo in boway idapo kalobosan.
[16] Tiyaboy wa Kiristo in kansiyo boway anggan sa katayan panawen sa kantam. Asin kantam atawanan no nangkataw ngani in agpakayawte. Na kailangan din kantam taboyen in kantam boway anggan sa katayan panawen sa mga belag.
[17] No siyo in apo, kamay kansiyo atawanan kansiyo belag idapo, kalbas siyo dayo agtaboy, na yewed mayadi siyo agsabi keyen, siyo agkabeet sa Diyos.
[18] Laki mga bodang, kitam agpakayawte, ayaw bosliyen pag agiplaong, dayem in betek pag panawen.
[19] No kataw ina na kitam katawan kitam sa betek wa agbangen, osai agkapyaan wa in kantam remrem sa adap Diyos,
[20] no betek magolo in kantam remrem. Angkataw in Diyos labi kay kalakoy in kantam remrem, nangkataw kansiyo atawanan in boote.
[21] Laki mga belag, no yewed agkagolo in kantam remrem, na kitam apyaan omadap sa Diyos.
[22] Osai kitam piyagpakan kamayba nakay in kantam piyagayay sa kansiyo, nangkataw kitam agpaniwala sa kansiyo mga otos, osai piyagpangwat in mga makaanggay sa kansiyo.
[23] In kansiyo otos keyen kitam pasandig sa kansiyo Bodang IsoKiristo, osai malsipakayawtean kataw in otos Kiristo sa kantam.
[24] No siyo agpaniwala sa mga otos Diyos, na siyo agpamataw sa Diyos, osai in Diyos agpamataw sa kansiyo. Kaya kantam atawanan in Diyos agpamataw sa kantam, panawen sa Abyan kansiyo tiyaboy sa kantam.