[1] Laki kangay mga bodang, kaya anda kangay piyagsolat sa kanyo, matang kamo ayaw agpangwat daet. Kamay no siyo agpangwat daet, na kitam apo IsoKiristo in idapo daet. Kitam kansiyo piyagpandalangin sa kansiyo Amang,
[2] angkataw siyo in aglibangaw sa kantam mga daet. Yewed waget sa kantam, kadayo din in daet sa boo mga mangyan.
[3] No kitam agpangwat in kansiyo mga otos, na totoo ngani kantam atawanan in Diyos.
[4] No siyo agsabi keyen, Siyo kangay atawanan, kamay aglaban sa kansiyo mga otos, na siyo bosliyen, na yewed wano betek siyo.
[5] Kamay in agpaniwala sa kansiyo mga agiplaong, na siyo totoo ngani agkabeet sa Diyos. Kataw ina kantam atawanan kitam sa kansiyo wa.
[6] No siyo agsabi keyen, Ako sa Diyos wa, na kailangan siyo agogali kataw in mga ogali IsoKiristo.
[7] Laki mga belag, yewed bayo wakay pag otos in kangay piyagsolat sa kanyo, dayem in datiyan daan otos, in kanyo atawanan ibat daan sa parakayan. Ina in agiplaong piyatoldo sa kanyo.
[8] Kamay maal din piyagawit bayo pag otos in kangay piyagsolat, kataw agkaidapo wa in lened, osai agrawa wa in tinglaw gayed. In kay Kiristo mga ogali in agpapangkit ina in betek pag otos, osai in kanyo mga ogali.
[9] In agsabi keyen, Ako sa rawa, kamay agkabais daan sa kansiyo belag, na siyo sa lened daan.
[10] Kamay in agpakayawte sa kansiyo belag, na siyo agpamataw sa rawa. Na siyo idapo ogali makasalangbed sa mga mangyan.
[11] Kamay no siyo agkabais daan sa kansiyo belag, na siyo sa lened daan. Na siyo agipanaw sa lened. Yewed atawanan no sa nakay wa agtaboy, angkataw piyagbeleg wa lened.
[12] Mga bodang, ako agsolat sa kanyo, angkataw panawen kay Kiristo liibangaw wa in kanyo mga daet.
[13] Mga koyay, ako agsolat sa kanyo, angkataw kanyo atawanan siyo in sa parakayan kay datiyan wa agkaboway. Mga begle, ako agsolat sa kanyo angkataw kanyo wa diyaeg in kapwan daet.
[14] Mga bodang, kamo kangay piyagsolatan, angkataw kanyo atawanan in Diyos Amang. Mga koyay, kamo kangay piyagsolatan, angkataw kanyo atawanan siyo in sa parakayan kay datiyan wa agkaboway. Mga begle, kamo kangay piyagsolatan, angkataw kamo maeyat, in agiplaong Diyos kanyo piyagalapet, osai kanyo wa diyaeg in kapwan daet.
[15] Kamo ayaw agkabeet sa kobat, kamayba nakay pag sangkap sa kobat. In agkabeet sa kobat yewed daan agkabeet sa Amang,
[16] angkataw in boo atai sa kobat, kataw in mga daet pag piyagkaamag in bilog, osai in mga daet pag makapangkit, osai din in agpakabwat remrem, in mga kataw ina yewed batang sa Amang, dayem sa kobat daan.
[17] In kobat agkalobos wa, kadayo in boo asin makaamag. Kamay in agpamangwat in beet Diyos batay agkaboway idapo kalobosan.
[18] Laki mga bodang, bangen wa in kalobosan kobat. Kataw in piyatoldo sa kanyo, agrateng in agpakagwali Kiristo. Ngona daan karowan wa in lomwas agpakagwali Kiristo, matang kantam atawanan bangen wa in kalobosan.
[19] Kamayba ina pag mga mangyan datiyan agyanggat sa kantam, siro yewed gayed sa kantam. No siro sa kantam daan, na siro baywi daan nges sa kantam. Kamay siro panaw, matang atawanan wa gayed siro boo yewed sa kantam.
[20] Kamay kamo piyakan Kiristo in Betek pag Abyan. Panawen ina kamo boo katawan wa in betek.
[21] Kaya ako agsolat sa kanyo angkataw kanyo atawanan in betek, yewed panawen sa yewed kanyo atawanan. Kanyo din atawanan idapo bosliyen batang sa betek.
[22] In bosliyen, siyo in agsabi keyen Isos yewed in Kiristo, in piyangako Diyos, in Agpamaboway. Na siyo in agpakagwali Kiristo, in dayo wano katawan sa Amang kadayo sa Bodang.
[23] No siyo yewed katawan sa Bodang na siyo yewed din katawan sa Amang. Kamayba nakay in agsabi in Bodang in Kiristo, na sa kansiyo wa din in Amang.
[24] In piyatoldo sa kanyo ibat sa parakayan kanyo alapeten sa kanyo remrem. No kanyo piyagalapet sa kanyo remrem in piyatoldo sa kanyo ibat sa parakayan, na kamo batay agpamataw sa Bodang osai sa Amang.
[25] In piyangako Kiristo sa kantam boway idapo kalobosan.
[26] Ina kangay piyagsolat sa kanyo panawen sa mga beet aglibangaw sa kanyo.
[27] In Abyan tiyaboy wa Kiristo sa kantam. Anggan siyo agpamataw daan sa kanyo, kamo idwa kailangan piyatoldo kamayba nakay. Angkataw in Abyan in agpatoldo sa kanyo in boote. In kansiyo piyagpatoldo betek, yewed baribid. Na kataw daan in piyatoldo in Abyan, kamo ayaw panaw kay Kiristo.
[28] Laki mga bodang, kitam mamataw sa kansiyo, matang no siyo rateng wa, na asin pag ibeng kitam apyaan in remrem, yewed din arikoyan kitam sa kansiyo.
[29] Kataw kanyo atawanan betek in Kiristo, na kanyo din nges atawanan in boo agpangwat betek, ina in mga bodang Diyos.