[1] མི་ལ་ངོ་ལོག་དང་། བཙོག་པ་དང་། བརྙམ་བཅོས་དང་གཉའ་གནོན་བྱེད་པའི་གྲོང་ཁྱེར་འདི་ནི་བཀྲ་མི་ཤིས་ཏེ།
[2] དེས་བཀའ་ལ་མི་ཉན་ཏེ། སློབ་གསོ་དང་དུའང་མི་ལེན་ཞིང་། དེས་གཙོ་བོ་ཡ་ཝཱེར་མི་བརྟེན་ཞིང་། དཀོན་མཆོག་དང་ཉེ་བར་ཡང་མི་བྱའོ།།
[3] གྲོང་ཁྱེར་ནང་གི་མགོ་དཔོན་དག་ནི་ངར་སྐད་སྒྲོག་པའི་སེང་གེ་སྟེ། གྲོང་ཁྱེར་ནང་གི་ཁྲིམས་དཔོན་དག་ནི་མཚན་མོའི་འཕར་སྤྱང་སྟེ། ཞོགས་པའི་བར་དུ་ཅི་ཡང་ལུས་པར་མི་འགྱུར།
[4] གྲོང་ཁྱེར་ནང་གི་ལུང་སྟོན་པ་དག་ནི་ཁ་ཡང་སྤྱོད་ཡང་དང་གཡོ་སྒྱུ་ཅན་ཡིན་པ་དང་། གྲོང་ཁྱེར་ནང་གི་མཆོད་དཔོན་རྣམས་ཀྱིས་དམ་རྫས་དག་བརླགས་ཤིང་། བཀའ་ཁྲིམས་དང་འགལ་ཏོ།།
[5] གཙོ་བོ་ཡ་ཝཱེ་ནི་གྲོང་ཁྱེར་ནང་དུ་བདེན་པ་ཉིད་ཡིན་པས། དྲང་བདེན་མིན་པའི་དོན་མི་མཛད་ཅིང་། ཁོང་གིས་ཞོགས་པ་རེ་རེ་ལ་བདེན་པ་ཉིད་མངོན་པས་ནམ་ཡང་མཚམས་མ་ཆད་པ་དང་། ཡིན་ཡང་དྲང་བདེན་མིན་པའི་མི་ཡིས་ངོ་ཚ་མི་ཤེས་སོ།།
[6] ཡ་ཝཱེ་ངས་ཡུལ་ཁམས་ཀུན་ཚར་དུ་བཅད་པ་དང་། དེ་དག་གི་ལྕགས་རི་རྣམས་གཏོར་བར་གྱུར། ངས་དེ་དག་གི་སྲང་ལམ་རྣམས་སྟོང་བར་བཅུག་སྟེ། ཐ་ན་མིའི་ཤུལ་ཙམ་ཡང་མེད་པར་དེ་དག་གི་གྲོང་ཁྱེར་བེད་མེད་དུ་བསྐྱུར་ལ། ཐ་ན་མི་ལུས་མཁན་མེད་དེ་འདུག་མཁན་ཡང་མེད་དོ།།
[7] དེ་ནས་ངས་འདི་སྐད་དུ། དེ་ཡིས་ང་ལ་བཀུར་ཞིང་སྐྲག་པ་དང་། སློབ་གསོ་དང་ལེན་བྱ་ངེས་ཡིན་ཞེས་གསུངས་ཤིང་། འདི་བཞིན་དུ་དེའི་སྡོད་གནས་ནི་ངས་སྔོན་ན་ཉེས་ཆད་གཅད་པར་དགོངས་པ་བཞིན་དུ་ཚར་དུ་མི་གཅོད་ཅིང་། ཡིན་ཡང་དེ་དག་གིས་ངན་སྤྱོད་སྤྱད་པར་བརྩོན་པས། རང་ཉིད་ཀྱི་བྱ་སྤྱོད་ཐམས་ཅད་ངན་པར་གྱུར་ཏོ།།
[8] གཙོ་བོ་ཡ་ཝཱེས་འདི་སྐད་དུ། དེ་བས་ཁྱོད་རྣམས་ཀྱིས་ང་ལ་སྒུགས་དང་། ང་ཡར་ལངས་ཏེ་བདེན་དཔང་བྱ་བའི་ཉིན་དེ་ལ་སྒུགས་དང་། ངས་མི་བརྒྱུད་ཀུན་དང་། ཡུལ་ཁམས་ཀུན་བསྡུ་བར་ཐགས་བཅད་དེ། ངའི་ཐུགས་ཁྲོ་སྟེ། ངའི་ཁོང་ཁྲོ་ཆེན་མོ་དེ་དག་གི་ཐོག་ཏུ་བླུག་པར་བྱའོ།། དེ་ཅིའི་ཕྱིར་ཞེ་ན། ས་གཞི་ཡོངས་ནི་ངའི་ཞེ་སྡང་གི་མེ་ལྕེ་ཡིས་ཁྱུར་མིད་དུ་གཏོང་བའི་ཕྱིར་ཞེས་གསུངས།
[9] དུས་དེར། མི་སྡེ་ཀུན་ལ་ཡ་ཝཱེའི་མཚན་ཞུ་བ་དང་། བློ་མཐུན་སེམས་གཅིག་གིས་ཡ་ཝཱེར་ཞབས་ཕྱི་ཞུ་འཇུག་པའི་ཕྱིར་དུ། ངས་མི་སྡེ་ཀུན་ལ་ཁ་གཙང་མ་ཞིག་ལྡན་པར་འགྱུར།
[10] དེ་ནས་ངས་ཁ་ཐོར་དུ་སོང་བཅུག་པའི་མི་སྟེ། ང་ལ་དད་པའི་མི་རྣམས་ནི་གུ་ཤ་ཡི་གཙང་པོའི་ཕ་རོལ་ནས་འོངས་ཏེ། ངའི་ཕྱོགས་སུ་ཞུ་རྟེན་དབུལ་བར་འགྱུར།
[11] ཉིན་དེ་བསླེབ་ཚེ། ཁྱོད་ཀྱིས་ང་ལ་ངོ་ལོག་བྱས་ཏེ་སྤྱད་པའི་ལས་ཀུན་གྱི་ཕྱིར་དུ་ངོ་ཚ་མི་དགོས་ཤིང་། དེ་ཅིའི་ཕྱིར་ཞེ་ན། དུས་དེར་ངས་ཁྱོད་ཀྱི་ནང་གི་མི་རང་རློམ་ཅན་དང་ང་རྒྱལ་ཆེ་བ་རྣམས་ཚར་དུ་གཅད་ཅིང་། ངའི་རི་དམ་པའི་སྟེང་དུ་ཁྱོད་ཡང་བསྐྱར་ང་རྒྱལ་སྐྱེ་བར་མི་འགྱུར་རོ།།
[12] ཡིན་ཡང་ངས་ཁྱོད་ཀྱི་ནང་གི་མི་ཁེངས་སྐྱུང་ཅན་དང་བབ་ཐོབ་ཞེན་པ་རྣམས་ལུས་པར་འགྱུར་ཏེ། དེ་དག་གིས་ཡ་ཝཱེའི་མཚན་ལ་བརྟེན་པར་འགྱུར།
[13] ཡེས་ར་ཨེལ་གྱི་ལུས་པའི་མི་རྣམས་ཀྱིས་ཡང་བསྐྱར་དྲང་བདེན་མིན་པ་མི་སྤྱོད་ཅིང་། རྫུན་ཡང་མི་བརྗོད་དེ། ཁོ་ཚོའི་ཁ་ནང་ནས་ཀྱང་གཡོ་སྒྱུའི་ལྕེ་མེད་པ་དང་། མི་དེ་དག་གིས་ལས་གང་ཞིག་སྤྱད་ཀྱང་ཁོ་ཚོར་འཇིགས་བསླང་མཁན་མེད་དོ།།
[14] ཀྱེ་ཛ་ཡན་གྱི་བུ་མོ། ཁྱོད་རྣམས་ཀྱིས་སྐད་གསང་མཐོན་པོས་གླུ་ལོངས་ཤིག ཀྱེ་ཡེས་ར་ཨེལ། ཁྱོད་ཀྱིས་དགའ་འབོད་བྱོས་ཤིག ཀྱེ་ཡེ་རུ་སཱ་ལེམ་གྱི་མི་སྡེ་རྣམས། ཁྱོད་རྣམས་ཀྱི་སེམས་སུ་དགའ་སྤྲོས་ཁེངས་བར་གྱིས་ཤིག
[15] གཙོ་བོ་ཡ་ཝཱེས་ཁྱོད་རྣམས་ཀྱི་ཉེས་ཆད་མེད་པར་མཛད་དེ། ཁྱོད་རྣམས་ཀྱི་དགྲ་ཟླ་དག་ཕྱིར་བསྐྲད་པར་མཛད། ཀྱེ་ཡེས་ར་ཨེལ་གྱི་རྒྱལ་པོ། ཡ་ཝཱེ་ཁྱོད་ཀྱི་ནང་དུ་བཞུགས་པས། ཁྱོད་རྣམས་ཡང་བསྐྱར་གནོད་འཚེ་ལ་འཇིགས་པར་མི་འགྱུར།
[16] ཉིན་དེ་བསླེབ་ཚེ། མི་ཡིས་ཡེ་རུ་སཱ་ལེམ་ལ་འདི་ལྟར་དུ། ཀྱེ་ཛ་ཡན་ལགས། མ་འཇིགས་ཤིག ཁྱོད་ཀྱི་ལག་པ་ཐུར་དུ་མ་འཕྱང་།
[17] ཡ་ཝཱེ་ཁྱོད་ཀྱི་དཀོན་མཆོག་ཁྱོད་ནང་དུ་བཞུགས་ཤིང་། ཁོང་ནི་བསྐྱབ་མཛད་མཁན་གྱི་ནུས་མཐུ་ཅན་ལགས་ཏེ། ཁྱོད་ཀྱི་ཕྱིར་དུ་ཐུགས་དགྱེས་པར་འགྱུར་ཞིང་། ཁྱོད་ལ་ཤིན་ཏུ་བྱམས་ཏེ། དུ་དུང་ཁྱོད་ཀྱི་ཕྱིར་དུ་དགའ་ཞིང་གཞས་གཏོང་བར་འགྱུར།
[18] ཁྱོད་ལ་གཏོགས་ཤིང་། མི་ཚོགས་ལ་ཡིད་སྨོན་བྱ་ཕྱིར་དུ་སྐྱོ་བའི་མི་དག་གིས་རང་གི་ངོ་ཚ་ཁུར་བས། ངས་དེ་དག་བསྡུ་བར་འགྱུར་ལ།
[19] ལྟོས་ཤིག དུས་དེར་ངས་ཁྱོད་སྡུག་ལ་གཏད་པའི་མི་རྣམས་ལས་ལན་འཇལ་ཞིང་། ངས་རྐང་པ་ཞ་བོ་ཡིན་པའི་མི་རྣམས་བསྐྱབ་ཅིང་། ཕྱིར་བསྐྲད་པར་གྱུར་བའི་མི་རྣམས་བསྡུ་ཞིང་། ས་གཞི་ཡོངས་ནས་ངོ་ཚ་ཐེབས་པའི་མི་རྣམས་ལ་ངས་བསྟོད་པ་ཐོབ་པར་གྱུར་ནས་མཚན་སྙན་ལྡན་པར་འགྱུར།
[20] དུས་དེར་ངས་ཁྱོད་རྣམས་ཕྱིར་ཁྲིད་འོང་ཞིང་། དུས་དེར་ངས་ཁྱོད་རྣམས་མཉམ་དུ་བསྡུས་ནས་ངས་བཙོན་དུ་ཁྲིད་པ་ཁྱོད་རྣམས་ཕྱིར་ལོག་འཇུག་པའི་ཚེ། ཁྱོད་ཅག་གི་མིག་མདུན་དང་། ས་གཞིའི་མི་སྡེ་ཀུན་གྱི་ནང་ནས་ཁྱོད་རྣམས་ལ་བསྟོད་པ་ཐོབ་པར་འགྱུར་ཞེས་གཙོ་བོ་ཡ་ཝཱེས་གསུངས་སོ།།