[1] ཀྱེ་ཁྲེལ་མེད་ཅན་གྱི་མི་སྡེ་ལགས། ཁྱོད་རྣམས་མཉམ་དུ་འདུས་དང་། མཉམ་དུ་འདུས་ཤིག
[2] བཀའ་མ་བབས་སྔོན་དུ། ཉི་མ་ནི་རླུང་ནང་གི་ཕུབ་མ་བཞིན་དུ་མ་འཕུར་སྔོན་དུ། གཙོ་བོ་ཡ་ཝཱེའི་ཐུགས་ཁྲོ་ཆེན་མོ་ཁྱོད་ཅག་གི་སྟེང་དུ་མ་བབས་པའི་སྔོན་དུ། གཙོ་བོ་ཡ་ཝཱེའི་ཐུགས་ཁྲོའི་ཉི་མ་ཁྱོད་ཅག་གི་ཐོག་ཏུ་མ་བབས་པའི་སྔོན་དུ་ཁྱོད་རྣམས་འདུས་ཤིག
[3] ཀྱེ་ས་གཞིའི་ཁེངས་སྐྱུང་ཅན་གྱི་མི་ཐམས་ཅད་དེ། གཙོ་བོ་ཡ་ཝཱེའི་བཀའ་ཁྲིམས་དག་བསྲུངས་པའི་མི་རྣམས། ཁྱོད་རྣམས་ཀྱིས་གཙོ་བོ་ཡ་ཝཱེ་ཚོལ་དང་། ཁྱོད་རྣམས་ཀྱིས་བདེན་པ་ཉིད་དང་། ཁེངས་སྐྱུང་ཚོལ་ཞིག་དང་། གཙོ་བོ་ཡ་ཝཱེའི་ཐུགས་ཁྲོའི་དུས་ནང་དུ་ཁྱོད་རྣམས་སྦ་ཐུབ་ཀྱང་སྲིད།
[4] གཱ་ཟཱ་དོར་ཞིང་། ཨ་ཤཱ་ཀེ་ལོན་སྟོང་བར་འགྱུར་བའི་རྐྱེན་གྱིས། ཨ་སི་དོད་ཀྱི་མི་སྡེ་ནི་ཉིན་གུང་གི་དུས་སུ་ཕྱིར་བསྐྲད་པ་དང་། ཨེག་རོན་ནི་རྩ་བ་ནས་འདོན་བར་འགྱུར་རོ།།
[5] མཚོ་རྒྱུད་ས་ཁུལ་ན་སྡོད་པའི་མི་སྟེ། ཀེ་རེད་པའི་མི་རྣམས། ཁྱོད་རྣམས་བཀྲ་མི་ཤིས་ཏེ། ཀྱེ་ཕེ་ལེ་ཤེད་ཀྱི་གནས་ཀ་ན་ཨན། ངས་ཁྱོད་ནི་གཏོར་བར་འགྱུར་ཞིང་། ཁྱོད་ཀྱི་གནས་སུ་མི་སྡོད་མཁན་མེད་དོ།།
[6] མཚོ་རྒྱུད་ས་ཆ་ནི་རྩྭ་ཐང་དང་། ལུག་རྫིའི་ས་ཕུག་དང་། ལུག་ཁྱུའི་ར་རུ་འགྱུར་ཞིང་།
[7] ས་དེ་ནི་ཡ་ཧུ་དཱ་ཁྱིམ་རྒྱུད་ཀྱི་ལྷག་མ་རྣམས་ལ་དབང་ཞིང་། དེ་དག་གིས་ས་དེ་རུ་ལུག་འཚོ་བ་དང་། དགོངས་མོ་དེ་དག་ཨ་ཤཱ་ཀེ་ལོན་གྱི་ཁང་པ་ནང་དུ་ཉལ་བར་འགྱུར། དེ་ཅིའི་ཕྱིར་ཞེ་ན། ཡ་ཝཱེ་ཁོ་ཚོའི་དཀོན་མཆོག་གིས་ཁོ་ཚོར་གཟིགས་སྐྱོང་མཛད་དེ། ཁོ་རྣམས་བཙོན་དུ་ཁྲིད་པའི་གནས་ལས་ཕྱིར་ལོག་པར་གྱུར།
[8] ངས་མོ་ཨབ་པའི་ངན་སྨྲས་བྱེད་པའི་སྒྲ་དང་། ཨམ་མོན་པའི་སྐུར་འདེབས་བྱེད་པའི་སྒྲ་ཐོས་ཏེ། ཁོ་ཚོས་ངའི་མི་སྡེ་ལ་སྨད་དེ། ཡང་རང་རློམ་ཆེ་བའི་སྒོ་ནས་དེའི་ས་མཚམས་བཙན་འཛུལ་བྱས་པས།
[9] དཔུང་ཚོགས་ཀྱི་ཡ་ཝཱེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ངས་ཉིད་ཀྱི་གཏན་དུ་གསོན་པ་ཉིད་དེ་དཔང་དུ་བཙུགས་ནས་མནའ་སྐྱེལ་དང་། མོ་ཨབ་པ་ནི་སཱ་དོམ་ལྟ་བུ་དང་། ཨམ་མོན་པ་ནི་གཱ་མོ་ར་ལྟ་བུར་ལྗང་ཚེར་དང་ཚྭ་དུང་། གཏན་དུ་སྟོང་བའི་གནས་སུ་འགྱུར་ཞིང་། ངའི་མི་སྡེ་ལྷག་མས་དེ་དག་གཞོམ་ཞིང་། ངའི་རྒྱལ་ཁམས་ནང་གི་ལྷག་པ་རྣམས་ནི་དེ་དག་ལ་ནོར་སྐལ་དུ་ཐོབ་པར་འགྱུར།
[10] དེ་དག་ང་རྒྱལ་ཆེ་བས། དོན་དེ་ནི་ཁོ་ཚོའི་ཐོག་ཏུ་འབྱུང་ཞིང་། དེ་དག་ནི་ཤིན་ཏུ་རང་རློམ་ཆེ་བས་དཔུང་ཚོགས་ཀྱི་ཡ་ཝཱེའི་མི་སྡེ་ལ་ངན་སྨྲས་བྱས་སོ།།
[11] ཁོ་ཚོར་མཚོན་ན་གཙོ་བོ་ཡ་ཝཱེ་ནི་འཇིགས་རུང་བ་ཡིན་ལ། དེ་ཅིའི་ཕྱིར་ཞེ་ན། ཁོང་གིས་ས་གཞིའི་ལྷ་རྣམས་མེད་པར་མཛད་ཅིང་། དུས་དེར། ཡུལ་ཁམས་ཀུན་གྱི་མཚོ་གླིང་སྟེང་གི་མི་སྡེ་རྣམས་ཀྱིས་རང་གི་ས་ནས་ཁོང་ལ་ཕྱག་འཚལ་བར་འགྱུར་རོ།།
[12] ཀྱེ་གུ་ཤ་པ་རྣམས། ཁྱོད་རྣམས་ཀྱང་ངའི་རལ་གྲིས་དགུམ་པར་འགྱུར་ཏེ།
[13] ཡ་ཝཱེས་ཕྱག་བརྐྱངས་ཏེ་བྱང་ཕྱོགས་ལ་རྒོལ་ནས། ཨ་སུར་མེད་པར་མཛད་ཅིང་། ནིན་ཝེ་སྟོང་སར་གྱུར་ནས་སྐམ་ཞིང་དབེན་སྟོང་དུ་འགྱུར་བར་འགྱུར།
[14] ཕྱུགས་ཁྱུ་དང་རི་དྭགས་སྣ་ཚོགས་ནི་དེའི་ནང་དུ་ཉལ་བར་འགྱུར་ཞིང་། འུག་པ་དང་ཕག་པ་བྱི་ཐུར་ཀ་བའི་རྩེ་རུ་གནས་ཤིང་། སྒེའུ་ཁུང་ནང་དུ་བྱིའུ་ཡི་སྒྲ་སྒྲོག་ཅིང་། སྒོ་ཐེམ་སྟེང་ནི་སྟོང་བར་འགྱུར་ལ། དེ་ཅིའི་ཕྱིར་ཞེ་ན། ཤུག་ཤིང་ཡང་ཕྱིར་མངོན་པར་འགྱུར་བའི་ཕྱིར།
[15] འདི་ནི་དགའ་སྤྲོ་ལྡན་ཞིང་བདེ་བར་གནས་པའི་གྲོང་ཁྱེར་ཏེ། སྔོན་ན་དེའི་སེམས་སུ་ན་རེ། ང་རང་ཁོ་ན་སྟེ། ང་མ་གཏོགས་གཞན་གང་ཡང་མེད་དོ་ཟེར་ཞིང་། ཡིན་ཡང་ད་ལྟ་དབེན་སྟོང་དང་། རི་དྭགས་ཉལ་སའི་གནས་སུ་ཅི་ལྟར་གྱུར་བ་ཡིན་ནམ། དེ་ནས་གནས་དེར་བརྒྱུད་མཁན་དག་གིས་ལག་པ་གཡུགས་ནས་འཕྱ་དགོད་བྱ་བར་འགྱུར།