[1] རྒྱལ་པོ་དར་ཡཱས་སྲིད་སྐྱོང་བའི་ལོ་གཉིས་པའི་ཟླ་དྲུག་པ་ཡི་ཚེས་གཅིག་ལ། གཙོ་བོ་ཡ་ཝཱེའི་བཀའ་ལུང་སྟོན་ཧག་གཱ་ཨི་བརྒྱུད་དེ་ཞིད་ཨལ་ཐེ་ཨེལ་གྱི་བུ་སྟེ་ཡ་ཧུ་དཱའི་མགོ་དཔོན་ཟེ་རུ་པཱ་པེལ་དང་། ཡེ་ཧོ་ཙ་དག་གི་བུ་སྟེ་མཆོད་དཔོན་ཆེན་པོ་ཡོ་ཤུ་ཨ་ལ་བྱུང་སྟེ་འདི་སྐད་དུ།
[2] དཔུང་ཚོགས་ཀྱི་ཡ་ཝཱེས་འདི་སྐད་དུ། མི་སྡེ་རྣམས་ཀྱིས་ན་རེ་ཡང་བསྐྱར་གཙོ་བོ་ཡ་ཝཱེའི་ཕོ་བྲང་བརྩིག་པའི་དུས་ད་དུང་བསླེབ་མེད་ཟེར་ཞེས་གསུངས་པ་དང་།
[3] དེ་ནས་གཙོ་བོ་ཡ་ཝཱེའི་བཀའ་ལུང་སྟོན་པ་ཧག་གཱ་ཨི་ལ་བྱུང་སྟེ་འདི་སྐད་དུ།
[4] ཕོ་བྲང་འདི་ད་དུང་སྟོང་བར་བཞག་ཡོད་པས། ཁྱོད་རྣམས་གནམ་གཅལ་ལྡན་པའི་ཁང་པར་སྡོད་པའི་དུས་དེ་ཡིན་ནམ་ཞེས་གསུངས་ཤིང་།
[5] ད་ལྟ་དཔུང་ཚོགས་ཀྱི་ཡ་ཝཱེས་འདི་སྐད་དུ། ཁྱོད་རྣམས་ཀྱིས་རང་གི་སྤྱོད་པ་རྟོགས་ཤིག་དང་།
[6] ཁྱོད་རྣམས་ཀྱིས་ས་བོན་མང་པོ་བཏབ་ཀྱང་བསྡུ་བ་ཉུང་བས། ཁྱོད་ཅག་གིས་ཟས་ཀྱང་མ་འགྲང་། འཐུང་ཡང་མ་འདང་། ཁྱོད་རྣམས་ཀྱིས་གོས་གྱོན་ཡང་མ་དྲོས། གླ་ཆ་ཐོབ་ཀྱང་རུལ་ཁུག་ནང་དུ་བཅུག་ཅེས་གསུངས་སོ།།
[7] དཔུང་ཚོགས་ཀྱི་ཡ་ཝཱེས་འདི་སྐད་དུ། ཁྱོད་རྣམས་ཀྱིས་རང་གི་སྤྱོད་པ་རྟོགས་ཤིག་དང་།
[8] ཁྱོད་རྣམས་ཤིང་ཆ་ལེན་དུ་རི་ལ་འཛེགས་ཏེ་ཕོ་བྲང་བཞེངས་ཤིག་དང་། ང་དེའི་ཕྱིར་དུ་ཡི་རང་ཞིང་གཟི་བརྗིད་ཀྱང་ཐོབ་པར་འགྱུར་ཞེས་གཙོ་བོ་ཡ་ཝཱེས་གསུངས།
[9] ཁྱོད་རྣམས་ཀྱིས་ལོ་ལེགས་འབྱུང་བར་རེ་སྒུག་བྱེད་ཀྱང་དེ་ལས་ལྡོག་སྟེ་ཉུང་དུ་བསྡུ་ཞིང་། ཁྱོད་ཚོས་ཁྱིམ་དུ་བསྡུ་བ་དག་ལ་ངས་ཕུ་གདབ་ཅིང་། དེ་ཅིའི་ཕྱིར་ཞེ་ན། དཔུང་ཚོགས་ཀྱི་ཡ་ཝཱེས་འདི་སྐད་དུ། ངའི་ཕོ་བྲང་སྟོང་བར་གྱུར་ཡང་། ཁྱོད་རྣམས་རེ་རང་གི་ཁང་པའི་ཕྱིར་དུ་རྒྱུག་པའི་ཕྱིར།
[10] དེ་བས་ཁྱོད་ཅག་གི་ཕྱིར་དུ་གནམ་ནས་ཆར་མི་འབབ་ལ། ས་ནས་ཐོན་རྫས་མི་འབྱུང་ངོ་།
[11] ངས་ས་གཞི་དང་། རི་རྣམས་དང་། འབྲུ་རིགས་དང་། རྒུན་ཆང་གསར་པ་དང་སྣུམ་གསར་པ། ས་ཡི་ཐོན་རྫས་ཐམས་ཅད་དང་། མི་དང་དུད་འགྲོ་དང་། མིའི་ངལ་རྩོལ་ལས་ཐོབ་པ་ཐམས་ཅད་ཀྱི་སྟེང་དུ་ཐན་པ་བྱུང་བར་འཇུག་ཅེས་གསུངས་སོ།།
[12] དུས་དེར་ཞིད་ཨལ་ཐེ་ཨེལ་གྱི་བུ་ཟེ་རུ་པཱ་པེལ་དང་། ཡེ་ཧོ་ཙ་དག་གི་བུ་སྟེ་མཆོད་དཔོན་ཆེན་པོ་ཡོ་ཤུ་ཨ་དང་མི་ཕྱི་ལུས་ཐམས་ཅད་ཀྱིས་ཡ་ཝཱེ་རང་གི་དཀོན་མཆོག་གི་གསུངས་དང་། ཁོ་ཚོའི་དཀོན་མཆོག་ཡ་ཝཱེས་མངགས་པའི་ལུང་སྟོན་པ་ཧག་གཱ་ཨིའི་བཀའ་ལ་ཉན་ནས། མི་རྣམས་ཀྱིས་གཙོ་བོ་ཡ་ཝཱེའི་དྲུང་དུ་གུས་ཤིང་སྐྲག་པའི་སེམས་ཤིག་བཅངས་ཡོད།
[13] གཙོ་བོ་ཡ་ཝཱེའི་ཕོ་ཉ་ཧག་གཱ་ཨི་ཡིས་ཁོང་གི་བཀའ་བཞིན་དུ་མི་སྡེ་ལ་ན་རེ། ང་ཁྱོད་དང་མཉམ་དུ་ཡོད་ཅེས་གཙོ་བོ་ཡ་ཝཱེས་གསུངས་སོ་ཞེས་སྨྲས་སོ།།
[14] དེ་ནས་གཙོ་བོ་ཡ་ཝཱེས་ཞིད་ཨལ་ཐེ་ཨེལ་གྱི་བུ་སྟེ་ཡ་ཧུ་དཱའི་མགོ་དཔོན་ཟེ་རུ་པཱ་པེལ་གྱི་སེམས་དང་། ཡེ་ཧོ་ཙ་དག་གི་བུ་སྟེ་མཆོད་དཔོན་ཆེན་པོ་ཡོ་ཤུ་ཨའི་སེམས་དང་། མི་ཕྱི་ལུས་ཐམས་ཅད་ཀྱི་སེམས་ལ་སྐུལ་སློང་མཛད་པས། དེ་དག་འོངས་ནས་རང་གི་དཀོན་མཆོག་དཔུང་ཚོགས་ཀྱི་ཡ་ཝཱེའི་ཕོ་བྲང་བརྩིགས་པའི་ལས་འགོ་བཙུགས་པ་དང་།
[15] དུས་དེ་ནི་རྒྱལ་པོ་དར་ཡཱས་སྲིད་སྐྱོང་བའི་ལོ་གཉིས་པའི་ཟླ་དྲུག་པ་ཡི་ཚེས་ཉེར་བཞི་ཡིན་ནོ།།