[1] ཡ་ཧུ་དཱའི་རྒྱལ་པོ་ཨ་མོན་གྱི་བུ་ཡོ་ཤི་ཡཱ་རྒྱལ་པོར་སྡོད་དུས་སུ། གཙོ་བོ་ཡ་ཝཱེའི་བཀའ་ནི་ཧི་ཟི་ཀི་ཡཱའི་གསུམ་ཚ་དང་། ཨ་མར་ཡཱའི་ཡང་ཚ་དང་། གེ་དལ་ཡཱའི་ཚ་བོ་དང་། ཀུ་ཤིའི་བུ་ཟེ་ཕན་ཡཱ་ལ་བྱུང་སྟེ།
[2] གཙོ་བོ་ཡ་ཝཱེས་འདི་སྐད་དུ། བདག་གིས་བྱ་དངོས་ཐམས་ཅད་ས་གཞི་ལས་མེད་པར་མཛད་ངེས་ཡིན་ཞེས་གསུངས་སོ།།
[3] ཡང་གཙོ་བོ་ཡ་ཝཱེས་འདི་སྐད་དུ། བདག་གིས་མིའི་རིགས་དང་། དུད་འགྲོ་རྣམས་དང་། གནམ་མཁའི་བྱ་དང་། རྒྱ་མཚོའི་ཉ་ཐམས་ཆད་མེད་པར་བྱ་སྟེ། བདག་གིས་མི་ངན་འགྱེལ་བར་འགྱུར་ཞིང་། མིའི་རིགས་ནི་ས་གཞི་ལས་མེད་པར་བྱའོ།།
[4] བདག་གིས་ཉིད་ཀྱི་ཕྱག་བརྐྱངས་ཏེ་ཡ་ཧུ་དཱ་ལ་རྒོལ་ཞིང་། ཡེ་རུ་སཱ་ལེམ་གྱི་མི་སྡེ་ཡོངས་ལ་རྒོལ་བར་འགྱུར་ཏེ། བདག་གིས་ས་གཞི་འདི་ནས་པཱ་ཨལ་གྱི་ཤུལ་རྣམས་མེད་པར་བྱ་སྟེ། སྐུ་འདྲར་དད་པའི་མཆོད་དཔོན་དག་གི་མཚན་དང་། ཡ་ཝཱེའི་མཆོད་དཔོན་རྣམས་མེད་པར་བྱ་སྟེ།
[5] དེ་མ་ཟད་ཁང་ཐོག་ནས་གནམ་མཁའི་སྣང་ཚུལ་མཐའ་དག་ལ་དད་པ་དང་། གཙོ་བོ་ཡ་ཝཱེར་དད་ཅིང་ཁོང་ཉིད་དཔང་དུ་བཙུགས་ཏེ་མནའ་སྐྱེལ་བ་དང་། ཡང་ལྷ་མིལ་ཀོམ་དཔང་དུ་བཙུགས་ཏེ་མནའ་སྐྱེལ་བ་རྣམས་དང་།
[6] གཙོ་བོ་ཡ་ཝཱེ་ལས་ལོག་པ་དང་ཁོང་གི་རྗེས་སུ་མི་འབྲང་བ་རྣམས། གཙོ་བོ་ཡ་ཝཱེ་མི་བཙལ་ཞིང་ཁོང་ལ་མི་ཞུ་བ་རྣམས་ཀྱང་མེད་པར་བྱའོ།།
[7] ཁྱོད་ནི་གཙོ་བོ་ཡ་ཝཱེའི་དྲུང་དུ་ཁུ་སུམ་པོར་སྡོད་ཅིག དེ་ཅིའི་ཕྱིར་ཞེ་ན། གཙོ་བོ་ཡ་ཝཱེའི་ཉིན་མོ་ནི་བསླེབ་ཉེ་ཞིང་། ཉིད་ཀྱིས་གདན་དྲངས་པའི་མི་རྣམས་དམ་པོར་མཛད་པའི་ཕྱིར། གཙོ་བོ་ཡ་ཝཱེས་མཆོད་རྫས་རྣམས་གྲ་སྒྲིག་བྱས་ཟིན་ནོ།།
[8] གཙོ་བོ་ཡ་ཝཱེ་ངས་མཆོད་པ་འབུལ་བའི་ཉིན་དུ་ངས་མགོ་དཔོན་དང་རྒྱལ་སྲས་རྣམས་ལ་ཆད་པ་གཅད་ཅིང་། ཕྱི་ཕྱོགས་པའི་ལྭ་གྱོན་པ་ཐམས་ཅད་ལ་ཉེས་ཆད་གཅད་པར་འགྱུར།
[9] ཉིན་དེ་བསླེབ་ཚེ། ངས་སྒོ་ཐེམ་ལས་ལྡིང་བ་ཐམས་ཅད་དང་། བཙན་ཤུགས་དང་གཡོ་འཕྲུལ་བདག་པོའི་ཁང་པར་ཁེངས་འཇུག་པ་ཐམས་ཅད་ཉེས་ཆད་གཅད་པར་འགྱུར་ཞེས་གསུངས་སོ།།
[10] གཙོ་བོ་ཡ་ཝཱེས་འདི་སྐད་དུ། ཉིན་དེ་བསླེབས་ཚེ། འབོད་སྒྲ་ནི་ཉ་སྒོ་ལས་འོང་ཞིང་། ངུ་འབོད་བྱེད་པའི་སྒྲ་ནི་གསར་གནས་ནས་འོང་ཞིང་། གས་པའི་སྒྲ་ཆེན་པོ་ནི་རི་ལས་འོང་ངོ་།།
[11] ཀྱེ་མག་ཏེ་སིའི་མི་སྡེ་རྣམས། ཁྱོད་རྣམས་ཀྱིས་སྨྲེ་སྔགས་ཐོན་ཞིག དེ་ཅིའི་ཕྱིར་ཞེ་ན། ཚོང་པ་ཐམས་ཅད་མེད་པར་བཟོས་ཤིང་། དངུལ་འཇལ་མཁན་ཐམས་ཅད་ཚར་དུ་བཅད་དོ།།
[12] དུས་དེར། ངས་སྒྲོན་མེ་ཡར་བཏེགས་ནས་ཡེ་རུ་སཱ་ལེམ་བཙལ་ཏེ། ཆང་ལ་དུངས་པའི་མི་དག་ལ་ཉེས་ཆད་གཅད་ཅིང་། མི་དེ་དག་གིས་སེམས་ནས་གཙོ་བོ་ཡ་ཝཱེས་བྱིན་རླབས་མི་གནང་ཞིང་། གནོད་འཚེ་ཡང་མི་མཛད་དོ་ཅེས་ཟེར་བར་འགྱུར།
[13] དེ་དག་གི་རྒྱུ་ནོར་དག་ནི་བཅོམ་ནོར་དུ་འགྱུར་ཞིང་། དེ་དག་གི་ཁང་པ་རྣམས་ནི་གྱང་རོ་རུ་འགྱུར་རོ།། དེ་དག་གིས་ཁང་པ་བརྩིགས་ཀྱང་དེའི་ནང་དུ་འདུག་མི་ཐུབ་ལ། དེ་དག་གིས་རྒུན་འབྲུམ་ར་བ་བཙུགས་ཀྱང་དེས་བསྙལ་བའི་ཆང་འཐུང་མི་ཐུབ་ཏོ།།
[14] གཙོ་བོ་ཡ་ཝཱེའི་ཉིན་ཆེན་པོ་དེ་བསླེབ་ཉེ་ཞིང་། བསླེབ་ཉེ་སྟེ། ཡང་དེ་ནི་ཤིན་ཏུ་མགྱོགས་ཤིང་། གཙོ་བོ་ཡ་ཝཱེའི་དུས་ཀྱི་སྒྲ་ལ་ཉོན་དང་། ཉིན་དེར་དཔའ་བོ་རྣམས་ཀྱིས་ཀྱང་ངུ་འབོད་བྱ་བར་འགྱུར།
[15] ཉིན་མོ་དེ་ནི། ཐུགས་ཁྲོའི་ཉི་མ། སྡུག་བསྔལ་དང་དཀའ་ཚེགས་ཀྱི་ཉི་མ། སྟོང་བ་དང་སྐྱོ་སྣང་གི་ཉི་མ། མུན་ནག་དང་སེམས་ཕམ་པའི་ཉི་མ། སྤྲིན་ནག་འཐིབས་ཤིང་མུན་པའི་ཉི་མ་ཡིན་པ་དང་།
[16] དེ་ནི་དུང་འབུད་ཅིང་ངར་སྐད་སྒྲོག་པ་དང་། མཁར་བཙན་པོར་རྒོལ་བ་དང་། ལྕགས་རི་མཐོན་པོར་རྒོལ་བའི་ཉིན་ཡིན་ནོ།།
[17] ངས་མི་ལ་སྡུག་བསྔལ་མྱང་འཇུག་ཅིང་། ཐ་ན་དེ་དག་ལོང་པ་བཞིན་དུ་སྐྱོད་པར་འགྱུར་ཞིང་། དེ་ཅིའི་ཕྱིར་ཞེ་ན། ཁོ་ཚོས་གཙོ་བོ་ཡ་ཝཱེ་ལ་འགལ་བའི་སྡིག་པ་བྱས་པའི་ཕྱིར་དུ། ས་རྡུལ་གཏོར་བ་བཞིན་ཁོ་ཚོའི་ཁྲག་ནི་ཕྱིར་བླུག་ཅིང་། ལུད་དོར་བ་བཞིན་དུ་ཁོ་ཚོའི་ལུས་པོ་དོར་བར་འགྱུར།
[18] གཙོ་བོ་ཡ་ཝཱེས་ཐུགས་ཁྲོའི་ཉིན་མོ་ལའང་། ཁོ་ཚོའི་གསར་དངུལ་གྱིས་ཁོ་ཚོར་བསྐྱབ་མི་ནུས་པར། ས་གཞི་ཐམས་ཅད་ནི་ཁོང་གི་ཕྲག་དོག་གི་མེ་ལྕེ་ཡིས་ཁྱུར་མིད་དུ་གཏོང་ཞིང་། དེ་ཅིའི་ཕྱིར་ཞེ་ན། ཁོང་གིས་ས་གཞི་ཐམས་ཅད་ཀྱི་མི་སྡེ་ཀུན་རྩ་བ་ནས་མེད་པར་མཛད་ཅིང་། དེ་ནི་ཤིན་ཏུ་འཇིགས་པའི་ཚར་གཅོད་ཡིན་ནོ་ཞེས་གསུངས་སོ།།