[1] ལུང་སྟོན་ཧ་བཱ་ཁུག་ལ་སེམས་འགུལ་ཐེབས་ཏེ་སྨོན་ལམ་འདེབས་པ།
[2] ཀྱེ་གཙོ་བོ་ཡ་ཝཱེ་ལགས། ངས་ཁྱེད་ཀྱི་གསུངས་སྐད་ཐོས་ཤིང་། ང་ཁྱེད་ཀྱི་མཛད་པར་འཇིགས་པས། ཁྱེད་ཀྱིས་ལོ་འདི་དག་གི་ནང་དུ་ཡང་བསྐྱར་དར་བར་མཛོད་ཅིག་དང་། ལོ་འདི་དག་གི་ནང་དུ་མངོན་པར་མཛོད་ཅིག ཐུགས་ཁྲོ་བའི་དུས་སུ་སྙིང་རྗེ་གནང་རོགས་ཞེས་ཞུས་སོ།།
[3] དཀོན་མཆོག་ནི་ཐེ་མཱན་ཡུལ་ནས་ཕེབས་ཤིང་། དམ་པ་ནི་ཕཱ་རན་རི་བོའི་ཕྱོགས་ནས་འོངས་ཏེ། ནམ་མཁའ་ཡོངས་དང་། ས་གཞི་ཐམས་ཅད་དུ་ཁོང་ལ་བསྟོད་པའི་སྒྲ་ཡིས་ཁྱབ་ཡིན།
[4] ཁོང་གི་གཟི་བརྗིད་ནི་འོད་བཞིན་དང་། ཁོང་གི་ཕྱག་ལས་འོད་ཟེར་ཕྱོགས་བཞིར་འཕྲོས་ཤིང་། དེའི་ནང་དུ་ནུས་མཐུ་ཆེན་པོ་ཞིག་སྦས་ཡོད་པ་ཡིན།
[5] རིམས་ནད་ཁོང་གི་མདུན་དུ་བརྒྱུད་ཅིང་། གནོད་པ་དང་ནད་རིགས་ཁོང་གི་ཞབས་འོག་ཏུ་འབྱུང་ཞིང་།
[6] ཁོང་ཡར་བཞེང་དུས་ས་གཞི་ཐམས་ཅད་གཡོ་བ་དང་། ཁོང་གིས་གཟིགས་དུས་ཡུལ་ཁམས་ཀུན་ནི་འཇིགས་ཏེ་ཐོར་བར་གྱུར། གཏན་གནས་ཀྱི་རི་པོ་རྣམས་གས་པ་དང་། ཡུན་གནས་ཀྱི་རི་པོ་མཐོན་པོ་རྣམས་བརྡིབས་སོ།།
[7] ཀུ་ཤན་ཡུལ་གྱི་གུར་ལ་བར་ཆད་བྱུང་བ་ངས་མཐོང་སྟེ། མིད་ཡཱན་ཡུལ་གྱི་ཡོལ་བ་འཇིགས་ཤིང་སྐྲག་པར་གྱུར།
[8] ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་ཉིད་ཀྱི་རྟ་མཆོག་ལ་ཞོན་ནས། རྒྱལ་ཁ་ཐོབ་པའི་ཤིང་རྟའི་ཁ་ལོ་སྒྱུར་བ་ནི་ཆུ་དང་གཙང་པོའི་ཐོག་ལ་ཐུགས་ཁྲོས་ཤིང་། ཆུ་དང་གཙང་པོ་དང་། རྒྱ་མཚོར་འཁོན་ལན་སློག་པ་ཡིན་ནམ་ཅི།
[9] ཁྱེད་ཀྱི་གཞུ་ནི་ཕྱིར་མངོན་ཞིང་། ཁྱེད་ཀྱི་མདའ་ཡིས་གྲ་སྒྲིག་བྱས་ཏེ། ས་གཞི་འབྱེད་དེ་གཙང་ཆུ་མཛད།
[10] རི་པོ་རྣམས་ཀྱིས་ཁྱེད་ཉིད་མཐོང་སྟེ་འདར་བ་དང་། ཆུ་པོ་རྣམས་ནི་དྲག་ཏུ་བཞུར་ཞིང་བརྒྱུད་དེ། གཡང་གཟར་གྱིས་སྐད་སྒྲ་སྒྲོག་ཅིང་ལག་གཡུགས་བྱེད་པ་ཡིན།
[11] ཉི་ཟླ་གཉིས་རང་གནས་སུ་སྡོད་པ་དང་། ཁྱེད་ཀྱི་མདའ་ནི་འོད་ལྟར་བཏང་པ་དང་། ཁྱེད་ཀྱི་མདུང་གིས་འོད་འཕྲོས་ཤིང་གཟི་བརྗིད་མངོན་ནོ།།
[12] ཁྱེད་ཀྱི་ཐུགས་ཁྲོ་ཆེན་པོས་ས་གཞི་ཡོངས་བརྫིས་ཤིང་། ཁྱེད་ཀྱིས་ཐུགས་ཁྲོ་ཆེན་པོས་ཡུལ་ཁམས་ཀུན་ནི་མེད་པར་མཛད།
[13] ཁྱེད་ནི་སྣུམ་གྱིས་བྱུགས་ཤིང་ཉིད་ཀྱིས་བདམས་པའི་འབངས་མི་རྣམས་སྐྱོབ་པར་ཕེབས་ཤིང་། ཁྱེད་ཀྱིས་ངན་པའི་ཁང་སྟེང་ལ་བརྡུངས་ཏེ་རྨང་གཞི་རྣམས་མངོན་པར་མཛད་ཅིང་།
[14] ཁྱེད་ཀྱིས་དགྲ་ཡི་མདུང་གིས་དེའི་དམག་མིའི་མགོ་བོར་བཙུགས་ཤིང་། དེ་དག་རླུང་དམར་བཞིན་དུ་འོངས་ནས་ངེད་རྣམས་གཏོར་བ་དང་། ཁོ་ཚོ་ལྐོག་ནས་དབུལ་པོ་མེད་པར་བཟོ་བར་དགའོ།།
[15] ཁྱེད་ནི་རྟ་ལ་ཞོན་ཏེ་རྒྱ་མཚོ་སྟེང་དུ་བརྒྱུད་པ་ན། རྒྱ་མཚོའི་རྦ་རླབས་དྲག་ཏུ་འཕྱུར་ཞིང་།
[16] ངས་སྒྲ་དེ་ཐོས་མ་ཐག་ལུས་པོ་ཡོངས་འདར་ཞིང་། སྒྲ་དེ་རྐྱེན་གྱིས་ངའི་མཆི་ཡང་འདར་ཞིང་། ངའི་རུས་པ་རྣམས་རུལ་བར་གྱུར་བ་དང་། ང་ནི་རང་ཉིད་ལངས་ས་ནས་སྐྲག་སྐྲག་འདར་འདར་བྱས་ནས། ངས་གནོད་འཚེ་འབྱུང་བའི་དུས་དང་། ཡུལ་ལ་རྒོལ་པའི་མི་རྣམས་ཡར་འོང་བར་སྒུག་གོ །
[17] སེ་ཡབ་ཤིང་ལ་མྱུ་གུ་མི་འབུས་ཤིང་། རྒུན་འབྲུམ་ཤིང་ལ་འབྲས་བུ་མི་ཐོགས་ཤིང་། སྐྱུ་རུ་ཤིང་ལས་ཅི་ཡང་མི་ཐོན་ཞིང་། ཞིང་ས་ལས་ལོ་ཏོག་མ་ཐོགས་ཤིང་། ར་བ་ནང་གི་ལུག་རྣམས་ཚར་དུ་བཅད་ཅིང་། ནོར་ར་ནང་ནས་ནོར་མེད་ཀྱང་།
[18] ང་ནི་གཙོ་བོ་ཡ་ཝཱེའི་ཕྱིར་དུ་དགའ་ཞིང་། རང་ཉིད་སྐྱོབ་པའི་དཀོན་མཆོག་གི་ཕྱིར་དུ་སྤྲོ་བར་འགྱུར།
[19] གཙོ་བོ་ཡ་ཝཱེ་ནི་ངའི་སྟོབས་ཤུགས་ཏེ། ཁོང་གིས་ངའི་རྐང་པ་གཉིས་ནི་ཤྭ་མོ་བཞིན་དུ་མྱུར་བར་མཛད་དེ་མཐོ་ས་ནས་བསྐྱོད་པར་གྱུར་ཏོ།། བསྟོད་དབྱངས་ཕུལ་བའི་འགོ་དཔོན་གྱིས་སྒྲ་སྙན་གྱི་སི་རྒྱུད་ཀྱི་རོལ་ཆས་རམ་དཀྲོལ་བྱས་པ་ཡིན་ནོ།།